La mar y la navidá

La mio parrafada de los xueves nel programa Noche tras Noche de la RPA

El mi lio d'esta selmana tien que ver cola mar y la navidá. Tien que ver porque fai güei ocho díes, a esta mesma hora, Felipe y Miguel, taben los dos na mar, a trés milles del Cabu Peñes, cola agua pol pescuezu y agarraos a la proa d'un barquín pequeñu, apenes cuatro metros y mediu, pidiendo socorru. Tuvieron asina dolce hores… Dolce hores, de nueche y na mar del Cantábricu. Xusto hasta l’otru día pela mañana, que foi cuando, por fin, pudieron rescatalos.

Dolce hores garraos práuticamente a nada, n'alta mar y de nueche son munches hores, tien que facese mui llargu.

El casu qu'ayer Felipe y Miguel abandonaron l'Hospital de Jove y lo primero que dixeron foi que cuando taben na mar, cola agua al pescuezu, nun paraben de dase ánimos l'unu al otru. Seguro que nun van escaecer esa nueche nin el momentu en que los rescataron. Agora vuelven a casa contentos y dicen que casi en plena forma y dispuestos p’adientrase de nuevu na mar… qu'amás d'oficiu ye una pasión pa estos dos pescadores.

Pa min son dos fazañes: la d'ellos por caltenese a flote y la quienes llograron rescatalos, pero si m’apetez camentalo nun ye solo por eso. Ye porque tamos a una selmana y picu de la navidá, de la famosa cena de Nuechebona, y como siempre falamos muncho del pescáu y del mariscu y de los precios qu'algamen por estes feches. Falamos muncho del preciu y poco del riesgu.

Si yá sé que los pescadores, d'esi preciu ven solo una parte y nun ye la más grande. Pero más al mio favor… Más pa mirar al cielu y la mar, dende la oriella, y convidavos a pensar que cuando’l tiempu se pon gafu y vemos eses foles xigantes, neses condiciones hai quien se mete nuna lanchina de cuatro metros y mediu y sal a pescar. Y tamién los hai qu'arriesguen la vida polos cantiles pa coyer eses percebes que van llucir llueu na mesa p'arguyu de los anfitriones.

Lo de Felipe y Miguel…. Y lo de tantos otros qu'arriesguen la vida na mar pue sirvinos pa pensar que'l pescáu y el mariscu nun se cueyen, precisamente, nel muelle. Salir a pescar, o a coyer mariscu, por estes feches nun ye un negociu ye la única forma de vida que tienen dalgunos.

Asina que nun sé a vosotros pero, a min, dende'l calorín que fai equí dientro dame respigos pensar como tará agora la mar. Tará d'un fríu que pela mientres nós tamos contentos y arrodiaos de lluces de colorinos esperando la Navidá. Esperando vivir esi cuentu de tolos años. Ye un cuentu que presta pero préstame, inclusu, más que Felipe y Miguel volvieren a casa sanos y salvos. La so aventura y pa cuntalo… pue quedar como'l meyor cuentu de navidá esti iviernu.

Milio Mariño

Lo que val un asturianu

La mio parrafada de los xueves nel programa Noche tras Noche de la RPA

El mi lio d'esta selmana ye d'eses coses que si non les dices revientes. Llevaba dándome vueltes dende facía dos o trés selmanes y nun principiu dexáralo pa prau por aquello de non lliala cola rodiella de Cataluña, pero cuando vi que los presidentes d'Asturies, Galicia y Castiella y Llión, axuntábense n'Uviéu y clamaben contra la financiación autonómica, nun pudi pasalo por altu y dexalo como si nada.

D'eso se trata, de la desigualdá de tratu na financiación autonómica. Dalgo que nun ye d'agora, que yá vien de llargu, pero resulta que si en cuenta de correxílo entovía lo ponen peor ye cuando unu s’enciende y esplota llenu de rabia.

Tamién esplotaron, pero cola boca pequeña, los presidentes d'Asturies, Galicia y Castiella, qu'esti llunes n'Uviéu, trataben de ponese d'alcuerdu en trés custiones nes qu'anden a la par: la llucha contra los incendios forestales, el declive demográficu y los planes de reforma de la financiación autonómica.

Dicía que falaron cola boca pequeña porque los trés pertenecen a partíos políticos, dos al PP y unu al PSOE, que tuvieron d’alcuerdo col cupu vascu… Con eso de que se rebaxe la cantidá qu'Euskadi va tener que pagar al Estáu en conceutu de Cupu, los próximos cinco años…. Que, pa nun andar enredando y que lo tengáis claro supón, según los últimos datos publicaos pol Ministeriu de Facienda, qu'Asturies recibe del Estáu, al añu, 2.249 euros de financiación per cada asturianu mentes que los vascos, pol mesmu conceutu, reciben 4.654 euros.

Yá sé que l'agraviu nun ye solo con Asturies que tamién hai diferencies importantes con otres comunidaes autónomes. Pero equí tamos falando d'Asturies y la diferencia ente lo que recibe, del Estáu, un asturianu y un vascu son 2.407 euros per añu… Recibimos la metá menos, una cifra qu’entovía pue aumentar cola rebaxa del Cupu.

Cuando los datos son asina de claros pocu más hai que dicir. Hai que preguntase, si acasu, por qué los Presidentes d'eses trés Comunidaes Autónomes protesten pola inxusticia y resulta que los partíos políticos a los que pertenecen acaben d'aprobala nel Congresu los Diputaos.

Supongo qu’agora entendéis la mio indignación del entamo. Pal Estáu, un asturianu val la metá qu'un vascu. Y la cosa nun acaba ehí porque eso que tán falando de camudar el modelu de financiación de Cataluña, como una ufierta pa solucionar el conflictu, nun ye otra cosa que da-yos más perres a ver si asina nun aportunen cola independencia.

Yá me diréis si nun ye pa tar indignáu. Resulta que'l País Vascu, col PIB per cápita más altu d'España yá nun ye que nun apurra nada, sinón que recibe fondos del restu d'España. Ye pa ponese d'un humor que te lleven los demonios. Pero tampoco quiero amargavos esti ponte festivu y estos díes tan guapos. Yo yá me desafogué y ehí queda eso.

Milio Mariño

Les Térmiques y el Carbón

La mio parrafada de los xueves en Noche tras Noche

El mi lio d'esta selmana ye poles térmiques y el carbón. Por esi alcuerdo al que llegaron nel Congresu los Diputaos d'adelantar trenta años el zarro de les centrales térmiques que consumen carbón. Un zarro que taba previstu pal añu 2050 y acaben d'adelantalo, naide sabe mui bien por qué. Digo que naide lo sabe porque los mesmos partíos que lo refuguen n'Asturies fueron los que lo aprobaron en Madrid. Hai quien diz qu'ellí, nel Congresu, lo que pasó foi que s’equivocaron al votar. Daqué que nun tien qu'estrañanos porque los diputaos deciden les votaciones pulsiando dos botones, unu del sí y otru del non… Y eso ye complicáu… Ye fácil enquivocase porque namás tienen dos manes y una cabeza con tanto morgazu dientro que cualquier día españa y alluma la bóveda del Congresu como si fueren fueos artificiales. Asina que bonu, hai qu'aceutar que daveces s’equivoquen… Lo raro ye que nunca s’equivoquen a favor. Siempre lo faen en contra.

El casu qu’ente que los diputaos s’equivoquen, o non, y qu'Iberdrola acaba d'anunciar el zarro de la central térmica de Llada, yá tenemos otru problema pa celebrar agora per Navidá. Si porque nun son, solo, los 90 puestos de trabayu, que la central promete recolocar, ye que'l Musel va perder hasta un 20% del tráficu marítimu. Pol Musel entren cada añu alredor de cuatro millones de tonelaes de carbón con destín a les térmiques d'Asturies, Llión y Palencia, de cuenta que la conclusión ye cenciella: si nun hai térmiques nun hai tráficu y l'actividá amenórgase abondo.

La disculpa p'acabar coles térmiques y el carbón, el poco que yá queda equí y el que vien de sabe Dios, ye qu'apuesten poles enerxíes llimpies y renovables. Y que nos faen un gran favor con eso de dir quitando les emisiones de CO2, qu'allá, nel añu 2030 tienen que ser un 50% menos comparaes colos niveles de 2007. Y claro, cuando falen d'amenorgar la contaminación, a ver quién ye'l guapu que s'opón, por muncho que digamos que n’Asturies provoca un problema social y que'l control del preciu de la enerxía nun se sostién namás coles renovables.

Nun se discute que les centrales térmiques habrá que zarrales y que'l carbón pasará a la hestoria. Lo que choca ye que nun sé a qué vien que si había unos plazos y unes feches, que la Unión Europea afitaba nel añu 2050, agora decidan adelantales non un añu nin dos sinón na menos que trenta. Nun sé por qué tanta priesa….Un cierre aceleráu, y ensin alternatives, como se ta plantegando en Llada, va tener consecuencies bien graves pa l'actividá económica d'Asturies. Y nun valen esculpes. Nun val qu'equí digan non los que dixeron si en Madrid porque s’enquivocaron en pulsiar un botón. Tien qu’haber otra esplicación… Mui llistos yá sabemos que nun son pero fatos hasta esi puntu tampoco. Asina que lo menos que podemos pidir ye que nos digan la verdá…

Milio Mariño

Esperanza de vida

Milio Mariño

Hace dos días, leíamos en este periódico que una vecina de Miranda, Etelvina Fernández, había cumplido 110 años. Una edad que produce vértigo y siempre nos lleva a la misma pregunta; a preguntarles, a los centenarios, qué es lo que han hecho para vivir tantos años. No sé lo que respondería Etelvina, pero la respuesta suele ser nada. Es lo que responden todos. No revelan ningún secreto ni ninguna fórmula mágica. Se limitan a decir que han pasado por penalidades, y momentos más o menos duros, y han vivido como han podido. Somos nosotros los que insistimos tratando de buscar algo que justifique lo que no justifica su respuesta. Nos cuesta aceptar que no se hubieran propuesto vivir tantos años y sospechamos que esconden el truco.

Pero no hay truco, son seres excepcionales que han llegado a la edad que tienen sin saber cómo ha sido. Y ahí los tenemos. Según la estadística, referida a enero de este año, en España hay 17.423 centenarios, de los cuales 471 viven en Asturias. La proporción, aunque aquí es mayor, suele ser de dos mujeres por cada hombre, y lo que también apuntan los datos es que aproximadamente la mitad gozan de buena salud y son independientes. Algo que, todavía, nos causa asombro por aquello de que, hace nada, vivir un siglo era impensable.

Ya no lo es. Los avances de la medicina han propiciado que seamos, cada vez, más capaces de vivir muchos años. De hecho, los científicos están planteando que la sociedad del futuro será diferente. Dicen que la reducción de nacimientos irá en aumento, de modo que seremos menos de los que somos ahora pero más longevos. Y, a este respecto, ven como muy posible que, en tres o cuatro generaciones, podamos alcanzar los 130 años de edad. Cosa que no será tan simple como que nos pongan una inyección milagrosa, o nos tomemos media tonelada de pastillas, y a vivir. Será una combinación de distintos tratamientos que aumentarán el índice de resistencia a la oxidación y mantendrán el metabolismo dentro de los límites de lo normal.

Sí damos por bueno lo que auguran los científicos, resultaría que el problema de la longevidad estaría medio resuelto. Digo medio porque en un mundo como el nuestro, en el que se desprecia la vejez, ya no vale, como solución, que solo consigan hacer que vivamos más años. En principio, tal vez fuera esa era la idea, superar la barrera de los cien, pero las exigencias han cambiado y lo que ahora exigimos es seguir pareciendo jóvenes hasta poco antes de morir. El enemigo a batir ya no es, solo, la edad, es el espejo. Queremos vivir más años pero haciendo que no se cumpla aquello que cantaba Alberto Cortez. “La vejez es la grave ceremonia de clausura de lo que fue la juventud alguna vez”.

En eso andamos ahora, deseando vivir muchos años pero, sobre todo, pidiendo que se retrase el momento de la vejez. La cuestión ya no es si la duración media de la vida humana aumentará en las próximas décadas. Que aumentará lo damos por hecho y pensamos que esa conquista no tendrá marcha atrás. Lo que está por ver es si conseguiremos posponer el envejecimiento hasta que cumplamos los cien. Ahora parece un sueño. No creo que ni Etelvina ni yo lo veamos, pero apuesto que habrá viejos jóvenes, casi con toda seguridad.

Milio Mariño / Artículo de Opinión / Diario La Nueva España

El llobu

La mio parrada de los xueves nel progrma Noche tras Noche

El mi lio d'esta selmana ye pola situación del llobu n'Asturies. Por eso de que los ganaderos nun paren de quexase y digan que'l problema llegó a un puntu que ye insoportable, -apuntando qu'hai que matar más llobos pa que l’equilibriu vuelva a so sitiu - y la postura de les asociaciones d'ecoloxistes, que dicen que nun hai que matar a dengunu.

Asina tan les coses. Les dos postures tienen sos razones y hai que considerales ensin idees preconcibíes. Nun pue ser que'l llobu y los ganaderos sían incompatibles. El problema nun son los llobos, ye'l dañu que causen. Por eso, anque les estadístiques apunten que l'añu pasáu, lloñe d'aumentar, los ataques del llobu fueron a menos, calculen que, ente'l ganáu equino, bovín y caprinu, sufrieron esos ataques unos 3.500 animales.

Ye verdá qu'hai compensaciones, pero son escases, páguense con retrasu y reciben un tratu distintu según la dómina del añu. Al paecer ye más fácil cobrar por un ataque del llobu en xineru, col presupuestu recién estrenáu, que por otru qu'asoceda agora en payares.

El problema ta ehí y la solución nun pue ser cruciase de brazos y esperar qu’escample. Asina nun s’arreglen les coses. Tien qu'haber una solución que nun sía dexar que los llobos crezan ensin tasa nin que s'entamen batíes pa matalos a mansalva. Nun pue ser que'l llobu siga con aquella chulería del cuentu, nel qu’entrugaba… ¿a ónde vas Caperucina?... Que güei de xuru respondería… Voi a onde me sal d’ehí, de lo políticamente incorreuto… Nin que los ganaderos merquen, toos, una escopeta y anden pel monte a tiros.

Llevo un cachu falando de llobos y a lo meyor echáis en falta que, inda, nun dixera cuantos llobos pue haber, agora, n'Asturies. Voi intentar ponevos al tantu. Los llobos nun los cunten unu a unu, cuantifíquense por manaes… Y anque unos cifren la manada en 7 o 8 y otros en 6 o 7, les manaes que tienen censaes anden poles 40. Asina que taríamos falando de casi 300 llobos perhí al debalo. Que nun sé a vosotros pero a mi paécenme munchos pa lo que somos de territoriu. Munchos pa que puean percanciase la ración diaria de carne ensin echar mano de les oveyes, les cabres, les vaques o los caballos.

La cosa ta clara, hai qu’atopar una solución. Yá sé que falando equí pela radio soluciónense tolos problemes. De mou que nun voi dicir que sía fácil pero, nesti casu, la solución que veo ye nun da-yos la razón a los que planteguen les dos midíes estremes. Quiero dicir que nin matar llobos a punta pala nin nun matar a dengunu. Hai que permediar la cosa… Toi d’alcuerdo en que consideremos al llobu como especie protexida… Pero ¿ qué pasa col ganaderu?. El ganaderu tamién ta en víes d'estinción. Cada vez queden menos. Asina qu’habrá que mirar un pocu por ellos…. Digo yo….

Milio Mariño

Oviedo / Uviéu

La mio parrafada de los xueves nel programa Noche tras Noche de la RPA

El mi lio d'esta selmana ye por esi trebolgu que se formó con cuenta la cooficialidá del Asturianu y la decisión del tripartíu, de que la capital d’Asturies figure con dos nomes separaos por un palín torcíu: Oviedo / Uviéu. Al paecer hai xente que nun-y gusta. Xente que nun almite qu'Oviedo y Uviéu puean convivir y dir de la mano. Argumenten que'l nome n'asturianu ye una imposición que nun vien al casu porque naide o mui pocos dicen Uviéu.

Dellos ampárense neso, pero otros, que presumen de ser más estudiosos, dicen que'l términu nun ta claru y que nun hai certidume de que'l nome d'Oviedo n'asturianu, sía Uviéu. Apunten que con Xixón nun hai duldes pero qu'Oviedo,  primero qu'Uviéu, pue ser Ovieo o Oviedu y, anque la intención aparenta como que busquen argumentos de pesu, vien ser la mesma de los que s'oponen porque nun-yos gusta.  Lo d’ellos nun ye clarificar el verdaderu nome d’Oviedo, n'Asturianu, ye semar duldes y que nun s'apruebe la denominación billingüe que proponen dende'l Conceyu. 

Si queréis que vos diga lo que pienso, téngolo claro. Cuéstame entender qu'haya xente que s’enfade y cueya un resabiu porque apaeza'l nome de la so ciudá en dos idiomas, ensin que s'obligue a naide a usar unu u otru. Ca cuál pue escoyer el que más-y pete y dexar l'otru pa quien quiera usalo. ¿Qué dalgunos piensen que ye una babayada qu'haya quien quiera dicir Uviéu ?…. Pos bonu, tamién hai xente que llega a les cuatro a casa y yá se pon en piyama… Pa gustos… Colos gustos de los demás hai que ser tolerantes. Tien poco sentíu montar un espolín y facer una plataforma y una campaña pa oponese a dalgo a lo que naide obliga.

Yo pienso asina pero resulta que la campaña ta en marcha. Nun sé si van ser pocos o munchos los que la suscriban… A lo meyor… qué sé yo, son los mesmos que dicía aquel refrán: Xente d’Uviéu tambor y gaita…Que nun creo que quiera dicir que tola xente d'Uviéu seya d’esa traza.  Pa m’idea, el vieyu refrán, referíase namás los que berren a l’altu la lleva por dalgo que nun ye pa ponese asina… Dalgo como facer posible que la ciudá na q’unu vive puea nomase n'asturianu y en castellán, cosa que paez de lo más normal.

Normal hasta'l puntu que los defensores de que namás se diga Oviedo, en bona lóxica, tamién tendríen que reclamar que non los llamaremos carbayones, que los llamaremos robledones. Yá sé que suena fatal  pero ye lo que tien ser tan intransixente col usu del asturianu… Los d'esti llau nun obligamos a naide a dicir Uviéu…. Y a los que quieran dicir Oviedo pidímos-yos lo mesmo. Asina que nun sé por qué nun puen convivir Oviedo y Uviéu separaos por esi palín torcíu que los xunta pa que caún puea dicir lo que-y pete.

 Milio Mariño

La gripe como negociu

El mio camentario de los xueves en Noche tras Noche, RPA

El Mi lio d'esta selmana ye pola campaña de vacunación contra la gripe. Por esi empeñu de la Conseyería de Sanidá de vacunar más y llevar la campaña a los organismos públicos, entidaes ya empreses, pa sensibilizar a la población sobre la importancia de vacunase.

Petezme camentalo porque lo de vacunase contra la gripe, coriza, trancazu o como queramos llamalo, ye un enfotu que vuelve tolos años por estes feches. Tolos años, les autoridaes sanitaries aportunen coles campañes de prevención contra esi procesu viral que suel visitanos allá per Navidá.

El casu ye que con esto de la vacuna pasa como con munches coses… Hai opiniones pa tolos gustos. Hai xente que se niega a vacunase, porque diz que nun val pa nada… Y haylos qu'atienden el conseyu y vacúnense anque solo sía por si acasu.

Según les estadístiques el nivel d'aceptación anda pol 6o%, poco más de la metá. De cuenta que la cosa ta estremada ente los que tienen fe en que la vacuna sirva pa dalgo y los que piensen que la gripe ye como la llotería, que toca a quien toca. Y si te toca nun hai quien te llibre d'una selmana na cama porque contra'l gripe non val remediu nengunu. Nin vacunes, nin tratamientos caseros, nin los socorríos antibióticos. Inda nun s'inventó nada que nun sía lo de siempre: paracetamol, beber muncha agua y pasar unos díes na cama esperando qu'escampe.

Lo curiosu ye qu'anque, ellos y nosotros, sepamos que nun hai remediu nin una medicación eficaz, tenemos que soportar un bombardéu d'anuncios q’ufierten tou tipu de productos a sabiendes de que nun valen pa na y lo único qu'apurren son efeutos secundarios. Alifaces como suañu, ablayu o atontamientu en xeneral... Pero nun vos esmolezáis que tamién vienden remedios pa combatir esos efeutos secundarios…

Ta tou previstu… De mou que si nos paramos a pensalo, con un poco d’aquello, resulta que la gripe ye un gran negociu…. Primero la vacuna, que cuesta una pasta y nun ta probáu que sía eficaz…. Depués los remedios que tampoco valen de muncho pero comprámoslos… Y a la fin los pañuelos de papel y les aspirines que tamién ayuden a facer caxa.

Hai quien diz, inclusu, que ta demostráu si se cierra la seronda con poques ventes, les farmacéutiques vuelven crear una alarma inxustificada en xineru… Son bien capaces… Sía ciertu o non, el casu ye que la gripe llega tolos años coles mesmes carauterístiques, los mesmos ingresos hospitalarios, les mesmes muertes y el mesmu absentismu llaboral. Nun paez, por tantu, que les campañes de vacunación sían mui eficacies nin influyan nel bienestar de la población… Pero les autoridaes aportunen y nós facemos-yos casu. Llévennos del ramal y aceutamos.

Yo mesmu acabo de vacuname. Por qué?.. Pos que se yo… Por si acasu, como cuando merques un décimo de llotería, allá onde Cristu dio les trés voces, por mieu a que toque y quedes con cara de fatu. 

Milio Mariño