La gripe como negociu

El mio camentario de los xueves en Noche tras Noche, RPA

El Mi lio d'esta selmana ye pola campaña de vacunación contra la gripe. Por esi empeñu de la Conseyería de Sanidá de vacunar más y llevar la campaña a los organismos públicos, entidaes ya empreses, pa sensibilizar a la población sobre la importancia de vacunase.

Petezme camentalo porque lo de vacunase contra la gripe, coriza, trancazu o como queramos llamalo, ye un enfotu que vuelve tolos años por estes feches. Tolos años, les autoridaes sanitaries aportunen coles campañes de prevención contra esi procesu viral que suel visitanos allá per Navidá.

El casu ye que con esto de la vacuna pasa como con munches coses… Hai opiniones pa tolos gustos. Hai xente que se niega a vacunase, porque diz que nun val pa nada… Y haylos qu'atienden el conseyu y vacúnense anque solo sía por si acasu.

Según les estadístiques el nivel d'aceptación anda pol 6o%, poco más de la metá. De cuenta que la cosa ta estremada ente los que tienen fe en que la vacuna sirva pa dalgo y los que piensen que la gripe ye como la llotería, que toca a quien toca. Y si te toca nun hai quien te llibre d'una selmana na cama porque contra'l gripe non val remediu nengunu. Nin vacunes, nin tratamientos caseros, nin los socorríos antibióticos. Inda nun s'inventó nada que nun sía lo de siempre: paracetamol, beber muncha agua y pasar unos díes na cama esperando qu'escampe.

Lo curiosu ye qu'anque, ellos y nosotros, sepamos que nun hai remediu nin una medicación eficaz, tenemos que soportar un bombardéu d'anuncios q’ufierten tou tipu de productos a sabiendes de que nun valen pa na y lo único qu'apurren son efeutos secundarios. Alifaces como suañu, ablayu o atontamientu en xeneral... Pero nun vos esmolezáis que tamién vienden remedios pa combatir esos efeutos secundarios…

Ta tou previstu… De mou que si nos paramos a pensalo, con un poco d’aquello, resulta que la gripe ye un gran negociu…. Primero la vacuna, que cuesta una pasta y nun ta probáu que sía eficaz…. Depués los remedios que tampoco valen de muncho pero comprámoslos… Y a la fin los pañuelos de papel y les aspirines que tamién ayuden a facer caxa.

Hai quien diz, inclusu, que ta demostráu si se cierra la seronda con poques ventes, les farmacéutiques vuelven crear una alarma inxustificada en xineru… Son bien capaces… Sía ciertu o non, el casu ye que la gripe llega tolos años coles mesmes carauterístiques, los mesmos ingresos hospitalarios, les mesmes muertes y el mesmu absentismu llaboral. Nun paez, por tantu, que les campañes de vacunación sían mui eficacies nin influyan nel bienestar de la población… Pero les autoridaes aportunen y nós facemos-yos casu. Llévennos del ramal y aceutamos.

Yo mesmu acabo de vacuname. Por qué?.. Pos que se yo… Por si acasu, como cuando merques un décimo de llotería, allá onde Cristu dio les trés voces, por mieu a que toque y quedes con cara de fatu. 

Milio Mariño