Talles y detalles

El mio camentario de los xueves nel programa Noche tras Noche de la RPA

El Mi lio d'esta selmana ye poles talles y por un detalle: una novedá que nun lo ye tantu porque dicen que llegó a Europa nel 2011, anque tarrezo que, como yo, munchos nun tendríais nin paxolera idea del asuntu. Refiérome a unos condones que son como los traxes fechos a midía, pos vendense de 60 talles distintes que son el resultáu de combinar diez tamaños de llargu y nueve tipos de circunferencia.

Yá sé que cuando se fala d'estes coses avezamos a falar en voz baxa y aguantamos un poco la risa, pero como ún quier tar al tantu de les últimes novedaes, nun pue pasar per alto esti detalle que vien a solucionar un problema qu'afeuta na menos qu’a un terciu de los homes, que son los que confiesen usar el condón como métodu anticonceutivu y protección contra les enfermedaes de tresmisión sexual.

Habrá quien diga que yera lo que nos faltaba. Pos sí señor. Claro que nos faltaben los condones fechos a midía y escoyíos por talles… Nun sé yo por qué teníemos que conformanos, y aguantar, si nos quedaben llargos, curtios, estrechos o demasiáu anchos. Ye como si nos dixeren que toles cabeces son iguales y nun esisten talles pa los sombreros. Una tiranía que sufríemos en silenciu y nun nos atrevíemos a denunciar por mieu al ridículu.

Esto que camiento, esto de qu'hai condones por talles, nun ye una ocurrencia pa faceme'l simpáticu. El domingu pasáu, na menos que’l New York Times, dedicaba una páxina entera a camentar esta novedá y nomaba a la Fundación Bill y Melinda Gates, como impulsora de delles iniciatives p'ameyorar los condones, qu'incluyíen los condones por talles y la propuesta d'un condón de hidrogel elásticu y otru con antiosidante p'ayudar a la circulación sanguínea, la relaxación muscular y una ereición más enllargada.

Con dir a la hemeroteca ta fácil de comprobar. Asina que dixi pa mi… Si lo trai el New York Times nun ye cuestión de pasalo por altu y nun camentalo en Nueche tres Nueche… Sedría un crime que dexaremos que los asturianos vivieren na ignorancia y siguieren mercando los condones a granel cuando puen mercalos a la midía y pola so talla…

Anque buenu…. Reconozo que tamién ye verdá que si antes nos daba corte pidir condones na farmacia, agora pidilos d'una determinada talla, sobre too si ye pequeña, pue cortanos un pelín más. Pero tou tien arreglo… Podemos pidir la talla L y dicir que son pa un primu nuesu… Y de siguío reclamar otros de la XXL, diciendo que son pa nós.

Cualquier cosa antes de siguir usando esos condones antiguos que son como'l xuegu de les siete y media… Esi que, o te pases o nun llegues. Dígolo porque anque haya quien piense qu'un condón ye malpenes pa diez minutos, que nun ye como un par de zapatos, que tíes qu'usar tol día, esos diez minutos mereces esfrutalos y nun tar clamiando por dalgo que ya tien solución y creyíemos que non la tenía. 

Milio Mariño