La Seronda

La mio parrafada de los xueves nel programa Noche tras Noche de la RPA

El Mi lio d'esta selmana ye que volvemos otra vegada con estes parrafaes de los xueves pola nueche. Equí tamos, de nuevu, dando fe de que s'acabó San Mateo y entramos na seronda con toles consecuencies. Asina ye que qué queréis que vos diga, en cuantu vi que llegaba la seronda, púnxime d'un murniu que casi ruempo a llorar. Son yá tantes serondes qu'a unu algama-y el vértigu cuando se pon a cuntales. Y eso que ye la estación que más me presta. Una estación preciosa que nos trai la so maxa, la so lluz y un enxame de colores. Tamién los sos frutos, porque agora ye tiempu de figos, uves y setes… Y d'ablanes y de castañes, qu'anque avecen a llegar un pelín más alantre, resulta que yá les vi nun escaparate a 7,75 euros el quilu. Un preciu qu'anima a tirase al monte y coyeles en plan furtivu….

La cosa foi qu’esti añu, la seronda llegó a principios de setiembre… Pero llueu arrepintióse, dio marcha tras y volvimos al branu. Volvió quien volviera porque na mio casa hubo zafarranchu y allá a primeros de setiembre, en cuanto enfrió un pocu, la mio muyer retiró tola ropa del branu. Dio la vuelta a los armarios ensin pidir opinión a naide… Les muyeres, dios me llibre de criticales pero tienen coses asina. Son capaces de da-y, elles soles, la vuelta a la casa y depués pídente ayuda p'abrir un bote de mermelada o matar una araña.

Metanes esti traxín que dixi, resulta que me llamó Marcos Vega pa camentame qu'empezaba la nueva temporada de Noche tras Noche y tenía que preparar dalgo pa esti xueves. Nun ye que me coyera de sospresa pero entames a da-y vueltes y nun pares d’entrugate de qué pues empezar falando… ¿Falo de la seronda como aveza a falar tol mundu?... Aportuno con eso de les fueyes marielles, el pesimismu y la murria… Sigo con que los díes fáense más curtios, el pelo empieza a cayete a puñaos y tenemos que despeyar la incónita de si nos vacunamos o non contra la gripe…?

Podía facer recuento de too eso o apuntar lo positivo de la seronda, que tamién lo tien. Desapaecen les mosques y los mosquitos, empieza la lliga de fútbol y tolos demás deportes, les muyeres tienen que depilase menos, los guah.es pasen tol día na escuela, acábense les fiestes de les vírxenes y los santos y pues quedar en casa, tranquilu, ensin que naide te lo reproche… Buenu y, tamién, si dalgún día suañasti con ser poeta pues escribir un poema porque hasta l'escritor más llamentable saca la so vena poética ante un paisaxe de seronda o viendo cayer les fueyes de los árboles.

Asina qu’hai qu'animase. Hai qu'esfrutar de la seronda porque, amás de tolo bonu que dixi, resulta que, col cambéu d'horariu, ganamos una hora de suañu. Y tal como ta la cosa, a lo menos, ye ganar dalgo.

Milio Mariño