El mi lio d'esta selmana nun vien dau por eses quemes que lo arrasen tou, y tan quemándonos l'alma, nin polos premios Princesa que s'apurren mañana. De too eso yá se fala abondo y nun creo que puea apurrir nada nuevu. Asina que’l mio comentariu vien a cuentu d'un inventu qu'acaben de patentar cuatro asturianos. Un inventu que me paez novedosu y mui orixinal. Distintu a esos inventos y soluciones que llamen imaxinatives y avecen a quedar en nada. Yo siempre pongo como exemplu la rueda de repuestu que traen agora los coches, que según los inventores aforra pesu y espaciu pero depués resulta que ye como si salieres a la cai calzáu con un zapatu y una zapatiella.
L'inventu d'estos cuatro asturianos ye un refrescu… Un refrescu que llamen Moonwater y va ser el primeru que s'embotella, solo, los díes de lluna llena. Un refrescu, ensin azucres nin caloríes, que ta compuestu per agua mineral carbonatada, con un poco de xenxibre y un poco de llima. Una entemez de sabores que da como resultáu un sabor frescu y daqué picante. Eso dicen los autores, que destaquen como lo más novedoso que'l refrescu namás s'envasa les nueches de lluna llena. La preba ye que la primer remesa embotellóse na madrugada del 5 d'ochobre y la siguiente ta previstu que s’embotelle el 4 de payares.
De sabor nun sé cómo andará porque básicamente ye agua, pero eso de que s’embotelle les nueches de lluna llena añedi-y un puntu que nun conozo que tenga nenguna otra bebía embotellada. Sí, porque supongo que toos taréis al tantu de que dende fai miles d'años, rellacionamos la lluna llena cola plenitú espiritual. Les nueches de lluna llena considérase que son símbolu de bona suerte, amás d’unes nueches estraordinaries pa realizar conxuros. La enerxía qu'apurre la lluna eses nueches dicen que nos dexa más concentraos y permítenos ser nós mesmos.
Los escépticos, y los qu'acostumen a pone-y pegues a tou van dicir qu'eso de meter la lluna llena nuna llata d'agua con burbuyes y vendela a 1,20 euros la pieza, qu'a esi preciu sal al mercáu, ye un inventu condergáu al fracasu porque nun va haber xente que crea que la lluna llena pues envasala y vendela pa da-y chispa a la vida, quitando-y protagonismu a esi otru refrescu que toos conocemos.
Nun digo nada. Namás apunto que'l consumu d'agua envasada n'España creció hasta superar los mil millones d'euros de facturación anual. L'agua convertióse nun gran negociu. Ye la bebía que más se consume. Hai restoranes que tienen la so carta d'agües con milenta clases distintes. Carta a la que van tener qu'añidir l'inventu d'estos asturianos.
Asina que yá lo sabéis. Nun vos estrañe si cuando pidís agua nun chigre… Amás d'aquello de con gas o ensin gas… Agora vos pregunten si la queréis de lluna llena o normal.
Milio Mariño
No hay comentarios:
Publicar un comentario
Milio Mariño