Les Térmiques y el Carbón

La mio parrafada de los xueves en Noche tras Noche

El mi lio d'esta selmana ye poles térmiques y el carbón. Por esi alcuerdo al que llegaron nel Congresu los Diputaos d'adelantar trenta años el zarro de les centrales térmiques que consumen carbón. Un zarro que taba previstu pal añu 2050 y acaben d'adelantalo, naide sabe mui bien por qué. Digo que naide lo sabe porque los mesmos partíos que lo refuguen n'Asturies fueron los que lo aprobaron en Madrid. Hai quien diz qu'ellí, nel Congresu, lo que pasó foi que s’equivocaron al votar. Daqué que nun tien qu'estrañanos porque los diputaos deciden les votaciones pulsiando dos botones, unu del sí y otru del non… Y eso ye complicáu… Ye fácil enquivocase porque namás tienen dos manes y una cabeza con tanto morgazu dientro que cualquier día españa y alluma la bóveda del Congresu como si fueren fueos artificiales. Asina que bonu, hai qu'aceutar que daveces s’equivoquen… Lo raro ye que nunca s’equivoquen a favor. Siempre lo faen en contra.

El casu qu’ente que los diputaos s’equivoquen, o non, y qu'Iberdrola acaba d'anunciar el zarro de la central térmica de Llada, yá tenemos otru problema pa celebrar agora per Navidá. Si porque nun son, solo, los 90 puestos de trabayu, que la central promete recolocar, ye que'l Musel va perder hasta un 20% del tráficu marítimu. Pol Musel entren cada añu alredor de cuatro millones de tonelaes de carbón con destín a les térmiques d'Asturies, Llión y Palencia, de cuenta que la conclusión ye cenciella: si nun hai térmiques nun hai tráficu y l'actividá amenórgase abondo.

La disculpa p'acabar coles térmiques y el carbón, el poco que yá queda equí y el que vien de sabe Dios, ye qu'apuesten poles enerxíes llimpies y renovables. Y que nos faen un gran favor con eso de dir quitando les emisiones de CO2, qu'allá, nel añu 2030 tienen que ser un 50% menos comparaes colos niveles de 2007. Y claro, cuando falen d'amenorgar la contaminación, a ver quién ye'l guapu que s'opón, por muncho que digamos que n’Asturies provoca un problema social y que'l control del preciu de la enerxía nun se sostién namás coles renovables.

Nun se discute que les centrales térmiques habrá que zarrales y que'l carbón pasará a la hestoria. Lo que choca ye que nun sé a qué vien que si había unos plazos y unes feches, que la Unión Europea afitaba nel añu 2050, agora decidan adelantales non un añu nin dos sinón na menos que trenta. Nun sé por qué tanta priesa….Un cierre aceleráu, y ensin alternatives, como se ta plantegando en Llada, va tener consecuencies bien graves pa l'actividá económica d'Asturies. Y nun valen esculpes. Nun val qu'equí digan non los que dixeron si en Madrid porque s’enquivocaron en pulsiar un botón. Tien qu’haber otra esplicación… Mui llistos yá sabemos que nun son pero fatos hasta esi puntu tampoco. Asina que lo menos que podemos pidir ye que nos digan la verdá…

Milio Mariño