El llobu

La mio parrada de los xueves nel progrma Noche tras Noche

El mi lio d'esta selmana ye pola situación del llobu n'Asturies. Por eso de que los ganaderos nun paren de quexase y digan que'l problema llegó a un puntu que ye insoportable, -apuntando qu'hai que matar más llobos pa que l’equilibriu vuelva a so sitiu - y la postura de les asociaciones d'ecoloxistes, que dicen que nun hai que matar a dengunu.

Asina tan les coses. Les dos postures tienen sos razones y hai que considerales ensin idees preconcibíes. Nun pue ser que'l llobu y los ganaderos sían incompatibles. El problema nun son los llobos, ye'l dañu que causen. Por eso, anque les estadístiques apunten que l'añu pasáu, lloñe d'aumentar, los ataques del llobu fueron a menos, calculen que, ente'l ganáu equino, bovín y caprinu, sufrieron esos ataques unos 3.500 animales.

Ye verdá qu'hai compensaciones, pero son escases, páguense con retrasu y reciben un tratu distintu según la dómina del añu. Al paecer ye más fácil cobrar por un ataque del llobu en xineru, col presupuestu recién estrenáu, que por otru qu'asoceda agora en payares.

El problema ta ehí y la solución nun pue ser cruciase de brazos y esperar qu’escample. Asina nun s’arreglen les coses. Tien qu'haber una solución que nun sía dexar que los llobos crezan ensin tasa nin que s'entamen batíes pa matalos a mansalva. Nun pue ser que'l llobu siga con aquella chulería del cuentu, nel qu’entrugaba… ¿a ónde vas Caperucina?... Que güei de xuru respondería… Voi a onde me sal d’ehí, de lo políticamente incorreuto… Nin que los ganaderos merquen, toos, una escopeta y anden pel monte a tiros.

Llevo un cachu falando de llobos y a lo meyor echáis en falta que, inda, nun dixera cuantos llobos pue haber, agora, n'Asturies. Voi intentar ponevos al tantu. Los llobos nun los cunten unu a unu, cuantifíquense por manaes… Y anque unos cifren la manada en 7 o 8 y otros en 6 o 7, les manaes que tienen censaes anden poles 40. Asina que taríamos falando de casi 300 llobos perhí al debalo. Que nun sé a vosotros pero a mi paécenme munchos pa lo que somos de territoriu. Munchos pa que puean percanciase la ración diaria de carne ensin echar mano de les oveyes, les cabres, les vaques o los caballos.

La cosa ta clara, hai qu’atopar una solución. Yá sé que falando equí pela radio soluciónense tolos problemes. De mou que nun voi dicir que sía fácil pero, nesti casu, la solución que veo ye nun da-yos la razón a los que planteguen les dos midíes estremes. Quiero dicir que nin matar llobos a punta pala nin nun matar a dengunu. Hai que permediar la cosa… Toi d’alcuerdo en que consideremos al llobu como especie protexida… Pero ¿ qué pasa col ganaderu?. El ganaderu tamién ta en víes d'estinción. Cada vez queden menos. Asina qu’habrá que mirar un pocu por ellos…. Digo yo….

Milio Mariño