Dalgunos estudiosos avecen a
dicir qu’hai muncho de lleenda en tolo que se refier a que Rimsky Korsacov tuvo
n'Asturies. Igual ye verdá porque referencies hai poques y, dalgunes,
contradictories, pero’l sofitu d’esti rellatu afonda en trés fechos que nun
almiten discusión: Que yera amigu de José María Bernaldo de Quirós, marqués de
Camposagrado, que sirvióse del cancioneru asturianu pa componer una de les sos
principales obres, “Capricho español”, y que tuvo na Felguera convidáu pol so
amigu, visitando la fundición de fierru, en tiempos de Pedro Duro.
La hestoria de cómo'l músicu rusu
vieno a parar al paraísu asturianu ye un cúmulu de concidencies; ye mui curiosa.
Nikolai Rimsky Korsakov foi unu de los meyores orquestadores de la hestoria de
la música. Un personaxe que ñació cerca de San Petersburgo, en 1844, nel sen
d'una familia de l'alta aristocracia. Bien nuevu enrolóse na Marina Rusa y
realizó un viaxe de casi tres años, como guardiamarina, nun clíper llamáu
Almaz. A la fin d'aquel viaxe graduóse como oficial pero la so intención namás
yera llograr un títulu que-y diera prestíxiu. Yera lo que buscaba porque nunca
formó parte de la tripulación d'un barcu, nin tuvo al mandu, nin volvió salear más
como nun fora en viaxes de recréu. Recién graduáu, consiguió un empléu nel
Almirantazgo de San Petersburgo, primeru nun puestu burocráticu y dempués como
Inspeutor de Bandes Navales de Música, un cargu que crearen, espresamente pa
él, por encargu y encamientu de la so influyente familia. Depués, cuando
acabaron aboliendo’l puestu, arrenunció a la marina y, a partir d’ehí, dedicóse
por enteru a la música.
Anque paeza chocante, Korsacov
tenía una gran amistá col asturianu José María Bernaldo de Quirós, marqués de
Camposagrado, qu'entós yera Embaxador d'España en Rusia y tamién vivía en San
Petersburgo. Conociérense nes frecuentes recepciones qu'ufiertaba la corte al
cuerpu diplomáticu y más alantre aportaríen a ser grandes amigos, con ocasión
de los actos de coronación del Zar Alejandro III, que duraron casi un mes y
cuntaron cola asistencia d'un grupu importante d'aristócrates españoles
qu’acompañaben al embaxador asturianu.
Cuando acabaron aquellos festexos
de la coronación del Zar, Bernaldo de Quirós acompañó a la numberosa llegación
española, que viaxare a costa fecha, y tornó a España con cuenta esfrutar d’unes
vacaciones. Korsakov, pela so parte, empecipió un viaxe de recréu, convidáu por
unos amigos, a bordu del yate rusu Livadia, col que teníen la intención de dar
la vuelta al mundu, pero tuvo la mala suerte de que'l yate zarapicó con una
galerna, cuando saleaba frente a la mariña de la Bretaña francesa, pocu dempués
de salir de Brest, y sufrió la perforación d'un compartimientu de proa, que
s'anubrió, obligando al capitán a buscar abellugu y recalar nel puertu d'El
Ferrol, onde'l yate diba permanecer amarráu, más de tres meses, hasta que
l'avería pudo ser reparada.
El Marqués de Camposagrado,
tornare a Madrid y dempués d'espachar los asuntos oficiales propios de la
embaxada, coló camín d’Asturies pa pasar unos díes nel pueblu natal de so
madre, en Castropol. Tando ellí, en Castropol, enteróse de qu'el so amigu,
Korsakov, atopábase n'El Ferrol y que la so estancia diba pa llargu, pos el
yate nel que viaxaba taba estropiáu y precisaba unes pieces que teníen
qu'unviar dende Rusia. De mou que Quirós foi a buscalo y convidolo a visitar
Asturies.
Korsakov y Bernaldo de Quirós
tuvieron dellos díes en Castropol. El marqués enseño-y el pueblu y dieron
dellos paseos en barca pola ría del Eo, pero como la cosa diba pa llargu,
Quirós propunxo que se treslladaren a Uviéu, pos taba mui interesáu en que'l
músicu rusu conociera a un compositor asturianu llamáu Anselmo González del
Valle.
Yá n'Uviéu, Korsakov agospióse primero na
finca del doutor Roel y depués en casa del propiu González del Valle, que lu
recibió con muncha almiración y respetu. Una almiración que llueu convertiriase’n
plasmu, pos quedó tan impresionáu de qu’al músicu rusu gustára-y tantu, ya
interesára-y, la música asturiana que nun escaecería, nunca, aquel alcuentru
nin los díes que Korsakov pasó na so casa. Años más tarde entá caltenía un
vieyu sillón nel que nun dexaba que naide se sentara, dicía qu'ellí había
sentáse Rimsky cuando volviera, quería caltenelo intauto pa una nueva visita,
como-y prometiera.
Bernaldo de Quirón, amás
d'embaxador d'España en Rusia, yera unu de los principales accionistes de Duru
y Compañía, una fundición de fierru que llevaba funcionando con ésitu dende
facía yá dellos años. Arguyosu de la so tierra, Bernaldo de Quirós llevó a
Korsakov a La Felguera, pa que visitara la fábrica y, de pasu, pudiere decatase
de que la so fama ya influencia nun yera, solu, pol cargu diplomáticu sinón que
tamién tenía un gran poder social y económicu nun sitiu como Asturies, una
rexón moderna na que xorrecia’l progresu.
Alló, na Felguera, Korsakov agospióse
nuna casa conocía como’l Palaciu de Villa, en Riañu, al pie del Picu Villa, un
sitiu preciosu qu’entovia güei dalgunos siguen nomando como “La casa de
Rimsky”. Y, asina foi que, n'agradecimientu poles munches atenciones que
recibiere elli, quixo componer unes notes que depués convertiríense nel himnu
de La Felguera. Una aportación que nun ta probada, pero tampoco ta probáu qu'una
de les principales obres del compositor rusu, Capricho Español, te basada en
temes asturianos que-y fueren facilitaos por Anselmo del Valle, y nun hai más
qu’oyila pa tener la certidume dafechu. Capricho español bien podía llamase
Caprichu Asturianu, pos empieza con Alborada pa gaita y tambor, un cantar
asturianu dedicáu a la salida del sol, y depués emplega la Danza prima, tamién
asturiana, ¡Válgame Señor San Pedro! El casu que p’acabar conclúi con Fandangu
Asturianu, otru tema que vien d’una antigua pieza pa gaita y tambor.
El compositor rusu estrenó Capricho Español,
el 31 d'ochobre de 1887, y asocedió, según él mesmu alcordaba años dempués, que
dende'l primer ensayu, y malpenes concluyó la primer seición, tola orquesta
púnxose de pies y aplaudió per espaciu de dellos minutos.
A pesar de la so escasa formación
musical, casi toa autodidauta, Nikolai Rimski Korsakov, foi profesor de música
nel Conservatoriu de San Petesburgo y un estraordinariu compositor que tuvo
ente los sos discípulos más destacaos a Stravinsky ya Prokofiev.
Sospriende, mui gratamente, qu'una de les
principales obres d'esti orquestador ya compositor universal tea inspirada en
dances y melodíes del folclor asturianu. Hai críticos que, inclusive van más
alló. Dicen qu'el so “Vuelo del moscardón”, de la ópera El Zar Saltán, fábula
de Pushkin, tomólo de los moscones qu'oyó runfar aquel branu que tuvo
n'Asturies. Korsacov también foi autor de “Principios de Orquestación”, una
obra que tá considerada como unu de los mayores trataos na materia y que foi
mundialmente usada polos estudiantes de composición a lo llargo del sieglu XX.
El casu que dende malpenes dos
años dempués d'estrenar Capricho Español, Kórsakov venía padeciendo una anxina
de pechu que lu diba foliando. Esu y l’estrés que-y causaren los sucesos de la
Revolución Rusa, en 1905, y les sos remortines, aceleraron el procesu, de
cuenta que no sos últimos años yá nun pudo componer nin trabayar en más nada.
Finó el 21 de xuno de 1908 na so finca de Liúbensk cerca de Luga, güei nomada
Pliúski, y foi enterráu nel Campusantu del monasteriu Alexánder Nevski, en San
Petersburgo.
Muy bueno señor Emilio.siguenos informando .gracias
ResponderEliminarGracias
Eliminar