José Ortega y Gasset, el gran filósofu ya ensayista español,
autor de la prestosa y mui celebrada espresión: “Yo soi yo y la mio
circunstancia, y si non la salvo a ella tampoco me salvo a min”, quedó plasmáu
pola la guapura de Cuideiru, pueblu que conoció, de la mano del pintor Evaristo
Valle, cuando en 1914 tuvo per primer vegada n'Asturies.
Aquel primer viaxe foi tan atanante qu'amenó, inclusive, un
ensayu d'Ortega, sobre Asturies, que publicóse, primeru na “Revista España” y
dempués, nel Tomu III de “El Espectador”, amás de nel llibru que tituló “Notas”.
“Llámase Cuideiru y ye un nial fincáu nuna peña, aptu namás
pa que d'él se lláncen a la mar los sos homes, como recies mabees; el pescuezu
tendíu, la esñala xiblando”… Escribió Ortega, quien, de mano, nun tenía l’envís
de visitar Asturies col aquello de pasar unos díes de folgueta o contemplar el
paisaxe, el viaxe retrucaba a una campaña de proselitismu cola que buscaba
sumar partidarios de la Liga pa la Educación Política. Ortega venía con esi
enfotu, pero conoció a dos persones, al pintor Evaristo Valle y al periodista
Fernando Vela, que sedríen bien influyentes en cuantu al desenllaz d'aquella
visita, pos Vela aportaría a ser el primer secretariu de la empresa cultural
más importante del filósofu, La Revista d'Occidente, y Valle exercería de guía
y conseyeru en tou lo rellacionáu con Asturies.
Ortega llegó a Xixón al empecipio del branu de 1914 y
agospióse, per espaciu de delles selmanes, en 'La Redonda' una finca de recréu,
asitiada na elegante zona de Somió, que José María Rodríguez González y María Rodríguez
del Valle, sobrina d'Evaristo, mercaren a William Penlington, vicecónsul
británicu na ciudá.
Por encamientu de la sobrina, Evaristo yera quien s'encargaba
d'enseña-y a Ortega los pueblos más guapos d'Asturies. Avezaben a facer
escursiones d'un día. Colaben de Xixón pola mañanina tempranu y tornaben a l’atapecer.
Foi n'unu d'aquellos viaxes cuando Ortega conoció Cuideiru. Quedó tan
impresionáu que nun daba creitu. Aportunó en volver y, a la fin, pidió-y, a
Valle, que-y pintara un cuadru pa llevalo a Madrid y tenelo siempres a la so vera
como alcuerdu.
El cuadru, “Escena marinera”, resultó una de les obres más
evocadores del nomáu pintor xixonés y goció d'un llugar d'esceición nel
despachu del filósofu madrilanu. Munchos años dempués, yá fináu Ortega, el so
fíu nun dexó que lo restauraren, quiso conservalo tal como taba, recubiertu por
una pátina de suciedá.
La negativa tenía so esplicación. El fíu d'Ortega, José
Ortega Spottorno, fundador del diariu El País, sabía qu'aquel cuadru yera una
ayalga pal padre, de mou que quería siguir teniéndolo como él lo dexare, pos
Ortega fumaba enforma y avezaba a xuntase, nel so despachu, con tertulianos
como Pío Baroja y Unamuno, que tamién fumaben lo suyu.
Ortega consideraba
que Cuideiru yera un pueblu únicu y la so alcordanza diba pareya cola idea de
qu'unu de los mayores embruxos qu'ufierta la vida ye la mar. Aseguraba que na
so corada tenía d'haber daqué paecíu a una nave coles veles rotes porque nun
atinaba a esplicase la so fascinación polos puertos pesqueros. Prestaba-y
sentase nos norays de fierro onde s’amarren los barcos.
“Encántame pasar les hores contemplando les balandres
qu'aguarden equí y alló, movíes selemente pol aliendu de la mar que contráise ya
dilátase, nun ritmu enxamás rotu, como un pechu infinitu”.
Cuideiru foi pa Ortega un afayo inesperáu, un regalu fantásticu
qu'esplicaba la so pasión pola mar.
Mientres tuvo en Xixón pasiaba enforma pol vieyu puertu; nun-y gustaba El Musel.
Dicía que los inxenieros argayaren un cuetu pa convertilo, a encomalu, nun
puertu artificial. Prefería'l puertu antiguu; consideraba que yera'l puertu de
los vencíos, l'humildáu, de cuenta que cuando nun podía dir, con Valle, a
Cuideiru, daba un llargu paséu y sentábase a contemplar los barcos. Sintía un
aquello especial pola Goleta Luisa, que
llegaba de Santander, esgayando la fina piel de la mar, y con quien, dicía,
tenía una amistá contrayía. Una amistá como toles amistaes que s’empobinen pol
azar del alcuentru.
Mientres aquella estancia n'Asturies, Ortega escribió “Notas
de andar y de ver”, que publicó na Revista España.
“Lo primeru que
mirando escontra Asturies vemos los castellanos ye que nun vemos nada. La
primer mirada, que dende Payares diriximos al otru llau, ye siempres un fracasu
visual”.
Ortega, que ñaciera en Madrid el 9 de mayu de 1883, pertenecía
a una familia de l'alta burguesía lliberal. La so madre yera propietaria del
periódicu El Imparcial y el so padre exercía de direutor. Estudiare filosofía
en Madrid, onde se doutoró con una tesis titulada: “Los terrores del año mil,
critica de una leyenda”. En 1905 coló a Alemania pa prosiguir los estudios en Leipzig
y Berlín y acabálos en Marburgo. De regresu a España, en 1910 ganó en concursu
la cátedra de Metafísica, pero'l so enfrentamientu cola dictadura de Primo de
Rivera llevólo a dimitir, anque nun dexó de dar clases, siguió dándoles nun
teatru, con gran asistencia de públicu.
L'ascensu al poder d'Hitler n'Alemania, en 1933, mozcaría la
vida d'Ortega, pos en 1934, desilusionáu,
dexó la política, siendo diputáu per Llión, y dedicóse a la cátedra que
recuperare col gobiernu de la República. Poco dempués, cuando Franco dió'l
Golpe d'Estáu, Ortega exilióse n'Holanda y llueu en París.
Barruntando la cayida de Francia, por una posible invasión
alemana, Ortega decidió viaxar a Arxentina, onde aportó n'ochobre de 1939. Nun
tuvo ellí muncho tiempu, volvió a Europa y afitó la so residencia en Lisboa
hasta'l fin de la Segunda Guerra Mundial. Rematada ésta, tornó a España,
perembargu, el réxime de Franco nun-y dexó recuperar la so cátedra universitaria,
asina qu'optó por fundar un Institutu d'Humanidaes, onde impartía les sos
llecciones. En 1946 entamó a publicar “Obras Completas”. Yá publicara “La
España invertebrada”, “El Espectador” y “La rebelión de las masas”. Realizó'l
so primer viaxe a los Estaos Xuníos en 1949 y en 1950 viaxó a Alemania onde
caltuvo un alderique filosóficu con Heidegger. En 1955 tornó de nuevu a España
y viaxó a Asturies, per última vegada, col envís de volver a visitar Cuideiru poco
enantes de la so muerte.
Ortega y Gasset tuvo n'Asturies a mediaos d'agostu de 1955 y
el 18 d'ochobre finó en Madrid d'un cáncer gástricu. La so intención siempres
fuere facer pedagoxía política pero dexónos toa una poética sobre Asturies, y
los asturianos, interesándose pola nuesa forma de ser y la nuesa cultura
hasta'l puntu de que conocía'l significáu de munches pallabres n'asturianu. En
dos de les sos obres, “El hombre y la gente” y nel so llibru inconclusu “La
idea de principio en Leibniz”, inclúi'l términu atopadizo. En dambos abre una
nota a pie de páxina na que diz: “Esti vocablu asturianu ye l'únicu que traduz exactamente'l
heimilich, el gemülich alemán y el cosy inglés”. El paraisu d’Ortega yera
Cuideiru, ónde volvió pocu enantes de morrer, ye pa suponer que pa llevalo, pa
siempres, con él.
Milio Mariño / Del llibru, entá inéditu, Tuvieron nel Paraísu
No hay comentarios:
Publicar un comentario
Milio Mariño