A los vecinos de Santiago’l
Monte, un pueblin del conceyu de Castrillón, facia-yos muncha gracia qu'una neña que vivía
en Uviéu pidiere que la xubieren enriba d’un pollín y la llevaren con ellos
cuando diben a los cantiles de Bayas ya la playa de Santa Maria del Mar. La
neña, que-y llamaben Lolita, yera fía de Teresa Estrada Pastor y Ramón
Medio-Uya y Rivero, un indianu veníu a menos, qu'entovía tenía perres bastantes
pa que la so fía s'educare nun bon colexu de la capital, estudiare dibuxu y
música y pasare los branos nuna casa d'aldega averada a la mar. En casa de
Caridá.
Corría l’añu 1918 y Lolita
sedría, pocu dempués, Dolores Mediu, una escritora qu'alcordaría aquellos
llugares de xuegos y paseos, qu'esfrutaba mientres el branu, hasta convertilos llueu
nel escenariu real, ya ficticiu, de munchos de los sos rellatos y de los
personaxes de les sos noveles.
Dolores Medio llevaría tola vida
con ella aquellos paisaxes de la neñez y lo que-y cuntaben los vecinos de
Santiago’l Monte: les hestories de la isla La Lladrona y lo que socedía na mar
al oscurecerín, que ye cuando les foles dexen de turniar y vuélvense mansulines
hasta apigazar.
La neñez de Dolores yera la d'una
neña feliz qu’esfrutaba en forma, pero aquella felicidá foi tayada, a los doce
años, cuando morrió'l padre. Una muerte que supunxo, práuticamente, la ruina de
la familia. Con too, Lolita siguió braniando en Santiago’l Monte, en casa de
Caridá, y ellí, nun cuartu que llamaben La Salona, asomada a una redolada
preciosa y propia pa suañar, escribió munchos de los sos caberos rellatos.
Los paisaxes d'aquellos branos,
nel conceyu de Castrillón, y les hestories que los mayores cuntaben de La
Lladrona, un puexu averáu a la mar, sirvieron pa que fuere creciendo la
fantasía del so mundu infantil. Naquellos paraxes asitiaría Dolores Medio unu
de los personaxes de la so novela “Juan sin tierra”. Na Volgona, como apaez na novela,
un peñascu con traces de isla que llámate y vuelve a llamáte cola so voz de sal
y d'algues, col cantar saláu d'una muyer que tien pechos de ronchel y cola de
serena… Una muyer que promete y promete
lo que nun pué dar.
Dolores Medio, que ñaciera
n'Uviéu'l 16 d'avientu de 1911, yá tien escrito cuentos cuando malpenes yera
una neña. Unos cuentos qu'ella mesma illustraba con unos dibuxos que diba
improvisando a la par qu’escribía. A los doce años escribió la so primer novela
“Egoísmo”. Coincidió, entós, que morrió'l padre, propietariu d'un negociu de
vinos, La Bodega d'España, que taba frente a la universidá y yera bien conocíu
pola xente d'Uviéu. La muerte de Ramón fixo que tola familia: Dolores, la so
madre, la tía Lola, la hermana Teresa y la so mediu hermana Finy, que'l padre
traxera de Cuba, tuvieren que camudar de casa por qué nun yos algamaben les
perres.
Pero, Dolores aporfiaba en siguir
estudiando y, pa costiar los estudios,
púnxose a trabayar. Entamó a dar
clases particulares na so casa y, al paecer, facialo bien, pos atrocaba munchos
alumnos. Acabada la carrera, desiguida foi maestra en Nava y lluéu pasó por
munchos y bien distintos pueblos. Tuvo en Intrialgo, Cazanes, Pravia, Ayones,
Peñera, Tinéu, Grandas de Salime, L.luarca ya Castropol.
Enantes de ser maestra, cuando
entovía yera estudiante, Dolores echare un mozu que nun-y gustaba nada a la so
familia. En casa yeren toos mui de dreches pero, a pesar de la oposición
familiar, siguió con él, inclusu cuando foi deteníu y encarceláu pola so
militancia d'esquierdes.
Al mozu de Dolores Medio, un tal
Nicanor, detuviéronlo y lleváronlo presu a la cárcel de Castropol. Y, entós,
ella pidió la escuela de L.luarca pa tar cerca y poder ayudalo. Vivía pendiente
de la so escarcelación y cuando, a la fin, foi lliberáu atopóse cola sospresa
de que la tuviera engañando. Y, non solo esu sinón que, amás, tuvo la crueldá
de dici-ylo. Díxo-y que la dexaba porque-y gustaba otra moza y diba casase con
ella.
La perda d'aquel mozu, pol que tanto lluchare,
marcaría definitivamente la vida de Dolores. Humildada nel so fueru internu y
ensin fuercies pa facer frente a los aventones y les males cares de la familia,
en 1945, dempués de llograr el Premiu Concha Espina, pol so cuentu “Nina”,
treslladóse a vivir a Madrid, onde entamó a exercer d'escritora ya ingresó na
Escuela Oficial de Periodismu pa completar los estudios.
Dolores nun s'achantaba, creciera
col aquello de ser escritora y escritora quería ser. Demostrólo escribiendo “Nosotros
los Rivero”, una novela autobiográfica na que cunta la hestoria de la so
familia y cola que, en 1952, llogró'l Premiu Nadal. La importancia, y el
méritu, de ganar el Nadal hai qu'asitialo naquellos años, cuando representaba,
con diferencia, el premiu más importante pa un escritor español y trescendía
mui percima de lo puramente lliterario.
Yá consagrada, Dolores dedicóse a escribir
noveles, cuentos, memories, biografíes ya inclusive una guía d'Asturies. Xuntu
col so llabor lliterariu, empezara a desempeñar una entemecía xera periodística
qu'incluyía un consultoriu sentimental de gran ésitu, qu'atendía roblando col
alcuñu d’Amaranta, y cróniques de too tipu, que la llevaben a cubrir,
práuticamente, ella sola, el suplementu selmanal del diariu Madrid.
En 1963 entamó a escribir la so
triloxía, “Los que vamos a cuerpo con Bibiana”, una obra na que rellata los
fechos autobiográficos relativos a les sos actividaes y manifestaciones en
favor de los mineros d’Asturies y les fuelgues de 1962, que defendía
públicamente y acabaron por llevala a prisión. La so esperiencia na cárcel
sirvió-y pa escribir “Celda común”, llogrando, pocu dempués, el Premiu Sésamu
con un llibru de cuentos tituláu “Andrés”.
El pieslle del diariu Madrid, en
1971, supunxo pa Dolores otru palu mui fuerte y un sapiazu económicu que la llevó
a montar una pensión nel pisu onde
vivía, nel popular y castizu barriu de Chamberí. Con too, mentes facía de
patrona y rexentaba la pensión, entovía
siguió escribiendo. Escribió “El Urogallo”, “La última xana” y tres llibros de
memories: “Atrapados en la ratonera”, “Memorias de una novelista” y “En el
viejo desván”.
En 1988, vendió’l pisu de Madrid
pa volver a los sos raigaños: vuelvo a Uviéu a morrer, dixo en cuantu llegó. Dolores,
que yera vital por escelencia, dicíalo más como un dicir que como un deséu
cabal. Lo que deseaba, daveres, yera pasiar por Uviéu y pol paraísu de la so
neñez. Nagüaba por volver a pisar aquellos caminos que diben de Santiago’l
Monte a los cantiles de Bayas, Santa María del Mar y la isla La Lladrona, onde
asitiara les aventures de los personaxes de la so novela “Juan sin tierra”.
El so últimu llibru, que foi una escoyeta de
poemes y rellatos titulólo: “Moriré sola”. Y sola morrió. Morrió'l 16 d'avientu
de 1996, el día del so cumpleaños, nel Sanatorio Blanco d'Uviéu. Facía malpenes
un mes que taba ellí por culpa d’un derrame celebral que la dexare ciega y mui
escasa de llucidez. Un año después publicóse la so novela, censurada hasta
entós, “Celda Común”.
Del mio llibru, entá inéditu, Tuvieron nel Paraísu
No hay comentarios:
Publicar un comentario
Milio Mariño