Leopoldo García-Alas y Ureña, yera un escritor que tol mundo
conocía como Clarin. Un escritor que ñació en Zamora porque coincidió que’l padre
taba destináu ellí como Gobernador Civil, pero cuando tenía siete años yá lo
traxeron pa Uviéu y n'Uviéu morrió el 13 de xunu de 1.901, 42 años dempués, víctima
d'una enfermedá qu'entós yera incurable: tuberculosis intestinal.
Clarín siempres tuvo mui al tantu de que tenía una salú delicada.
Pasó la vida esmolecíu polos achaques que lo aforfugaben y esa esmolición vióse
reflexada en dalgunos de los sos cuentos como “La droguería” o “La médica”, nel
que llegó a dicir: L'únicu médicu bonu qu’hai nel mundu nun ye médicu, ye
médica, llamase casualidá.
Perembargu, a pesar d'aquella reflexión tristaya na que
paecía que tolo fiaba al petite d'un aldu, Clarín facía-yos casu a los médicos.
Siguía'l so conseyu y aprovechaba'l branu pa reponese y coyer fuerces. Tolos
años, en cuanto acababa'l cursu académicu, allegábase a la so finca de Guimarán, en Carreño,
y ellí pasaba casi tres meses. Avezaba a tar hasta'l 21 d'agostu. Dempués, y
hasta que volvía a empecipiar el cursu, diba tomar los, entós, afamaos baños de mar na
playa de Salines, en Castrillón.
Clarín, que nun se distinguía por gastar bon humor, camentaba,
en chancia, que vivía'l branu esfrutando d'una vida estúpidu-recreativa que-y
sentaba perbién. En Guimarán, dormía abondo, pasiaba pel prau y pel monte,
comía con mambís y víase con Palacio Valdés. En Salines tomaba los baños de mar
y participaba n'improvisaes tertulies con dellos miembros de la Colonia
artística de Muros del Nalón y dellos braniantes d'Uviéu y de Madrid.
Procuraba esparcese y pasálo bien pero, ónde más a gustu se sintía
Clarín yera en Guimarán, nuna casa solariega que-y llamaben “La Rebollada”. Ellí
avezaba a enllargar les sos convalecencies, anque los médicos lu dieren por restablecíu.
Gustába-y l'aldega y el llugar ónde taba
asitiada la casa, un valle tarmudu, llindáu
per llombes ñidies, de llinies gracioses cubiertes por árboles; facialo esfrutar como si daveres
tuviere nel paraísu. Na meyor que la so maestría pa describir aquellos paseos braniegos,
qu'inspiraron bona parte de la so obra lliteraria.
“Yera nel campu, a media fastera d'una verde llomba. Dende
la so escamplada, coronada d'encines y pinares, víase'l Cantábricu cercanu. El
templu ocupaba un pericuetu, como una talaya, tapecíu ente grandes castaños; el
campanariu vetusto, de trés güecos, pa siendes campanes escures, venerables
cola pátina del óxidu místicu de la so vieyura… D’ellí, d’aquel templu rústicu,
noble na so patriarcal cenciellez, paecía salir como un arume, una santidá nel ambiente,
que convertía les cercaníes en monte sagráu. Reinaba un silenciu de naturaleza
relixosa, consagrada. Paecía como que p’elli viviere Dios”.
Si aquel barrunto qu’escribiere Clarín fuere verdá, sí, naquella
dómina, Dios viviere ellí, ye bien posible que l'espíritu del escritor entá
siga pasiando polos valles de Carreño, acompañáu
pola solombra de Doña Berta de Rendaliego y por Narciso Arroyo; sordos, toos, al ruxerruxe del mundu y el pasu del
tiempu.
La presencia d'aquellos llugares na narrativa de Clarín,
apurre hasta un total de catorce obres distintes nes qu'atopamos referencies
del paisaxe y la xente qu'habitaba na redolada de la so casa solariega. Una
novela, “La Regenta”; dos noveles inconcluses, “Palomares” y “Cuesta abajo”;
una obra crítica desendolcada con talante narrativu, “Notas en prosa clara”;
tres noveles curties; “Doña Berta”, “Cuervo” y “El cura de Pericueto”, y siete cuentos:
“¡Adiós Cordera!”, “Boroña”, “El Quin”, “Viaje redondo”, “La trampa”, “Snob” y “El
sombrero del señor cura”.
Clarín conoció Guimarán mui ceo, de neñu yá braniaba ellí
colos sos padres y volvió a remembrar aquellos branos cuando foi caderalgu y s'estableció
dafechu n'Uviéu, dempués del so periplu madrilanu.
Al añu siguiente de llograr cátedra en Zaragoza, en 1883, Leopoldo
Alas pidió'l treslláu y entamó a exercer como caderalgu de Drechu Romanu na
Universidá uvieina. Muncho primero, cuando malpenes tenía 22 años, entrara na
redacción d'un periódicu de Madrid, El Solféu, nel que'l so direutor, Antonio
Sánchez, quería que los redautores adoptaren toos, como seudónimu, el nome d'un
instrumentu musical. D'ehí vieno que Leopoldo Alas roblara como Clarín, un bon
escritor qu'escribía mui mal. Tenía una lletra horrible. Cuéntalo Galdós, con
muncha sorna, nuna carta na que-y diz: “Qué guapu ye recibir un papel llen de
garabatos y preparase pal gocie de l'aldovinación. Dir conquistando, silaba a silaba,
el reinu misteriosu de la to escritura caldea”.
Anque Clarín ñació y pasó los sos primeros años en Zamora, la
madre, Leocadia, falába-y d'Asturies con señardá y cuntába-y rellatos d'una
tierra que tenía presente como si mialma vivieren nella y non en Castiella.
Aquel ambiente influyó muncho nel espíritu del neñu Leopoldo que, dende siempres,
sintióse mui asturianu. A los siete años entró a estudiar nel colexu de los
xesuites de Llión, ciudá na que’l padre exercía, entós, de Gobernador Civil. Malpenes
un añu dempués la familia volvió p'Asturies y Lopoldo, conoció, por fin, la
xeografía asturiana de la que tantu oyere falar a so madre. Mientres los años siguientes,
Clarín non solu atopó la llibertá na casona de Guimarán, tamién atopó la vieya
biblioteca familiar, onde dio rinda suelta a la so pasión por lleer.
El 4 d'ochobre de 1863, a la edá d'once años, Clarín ingresó
na Universidá d'Uviéu, no que llamaben estudios preparatorios, matriculándose
nes asignatures de Llatín, Aritmética y Doctrina Cristiana. Aquel cursu
terminólo con nota sobresaliente, pero tamién col afayo de trés bonos amigos:
Tuero, Palacio Valdés y Rubín. Sobre tou Palacio Valdés, otro autor de gran relevancia
y con una vida tan paecía que, bien, podíen considerase ximielgos.
De presencia, Clarín, yera un homín. Un paisanu pequeñu,
nerviosu, miope, bien vistíu y delicáu de salú, que daba clases na Universidá,
escribía, facía critica lliteraria y pasaba les tardes nel Casinu d’Uviéu. Tenía
fama d’esixente, los alumnos acusábenlo de ser un güesu, de suspender muncho. Amás de suspender yera un críticu feroz que
nun se casaba con naide. Exerció, durante 25 años, la crítica lliteraria y les
sos crítiques yeren tarrecíes y respetaes en Madrid, hasta’l puntu de que cuando
morrió, l'escritor Bonafoux, mediocre según tenía dicho Clarín bien de veces,
escribió un artículu necrolóxicu nel que dicía: “Yo foi'l primeru n'allegrame
de morriera Clarín… Nel so entierru escuchóse'l silenciu que s'escucha nos
entierros de los tiranos”.
Eso escribió Bonafoux, pero nun yera verdá. El féretro,
colos restos mortales de Clarín, foi veláu, nel claustru de la universidá
d’Uviéu, por munchos profesores, amigos, alumnos y ex alumnos. Nun tuvo, nin
mucho menos, un mal entierru.
La verdá hai que dicila. Per embargu, tampoco ye pa callar
que la mayor parte de los biógrafos, d’aquel paisanín que pasaba los branos nel
so paraísu de Guimarán, conciden en señalar que, a la par q’un esceicional
escritor, Clarín yera un cascarrabies reconocíu que presumía de les feroces
crítiques que facía y tenía a gala ser un cacique lliterariu temíu por tol
mundu.
No hay comentarios:
Publicar un comentario
Milio Mariño