Concepción Arenal foi una muyer de muncho remangu que dedicó tola so vida a la xera de lluchar polos presos, los más desfavorecíos y la reivindicación femenina. Periodista, escritora, ideóloga de la drecha lliberal católica y activista social, Concha yera ñatural de Ferrol. Ñaciere, ellí, en 1820, pero tuvo muncha rellación con Asturies, onde vivió 20 años que correspuén- dense colos meyores de la so vida y los que más-y suplieron no tocante al so trabayu y al quefer lliterariu.
Fía de militar,
Concepción Arenal quedó güérfana de padre mui ceo, a los 8 años, y coló cola madre
y la so hermana pa un pueblín de Cantabria, Armaño, ónde recibió una terria formación
relixosa. Pasáu un tiempu, cuando cuntaba 14 años, la familia treslladóse de
nuevu a Madrid y Concha siguió los estudios nun colexu de señorites. Termináu'l
bachilleratu impúxose a la voluntá de so madre, que finó pocu dempués, y entró
como oyente, vistía con ropa d'home, na Facultá de Drechu. Nun podía entrar
d’otra manera pos naquella dómina, la educación universitaria entovía nun taba permitía
a les muyeres.
Vistía, tamién, d'home avezaba a participar nes tertulies
polítiques y lliteraries de Madrid, onde
faciase oyer y espresaba la so opinión contra lo establecíu, entós, pa la
condición femenina.
N’aquellos caberos años, los años de mocedá, Concepción
Arenal yá demostraba una voluntá y un cuayu percima de lo corriente, de cuenta
que cualisquier reflexón que, güei, pudiéremos facer sobre'l feminismu n'España
tendría que cuntar con una referencia obligada a la so figura. El modelu de feminidá
que propunxo foi un pasu alantre, una novedá enforma, nel panorama español del
sieglu diecinueve, que significó’l frayu de los estrenchos márxenes que la estriuta división ente la esfera de lo
priváu y lo públicu deparaba a les muyeres.
Pa entender y valorar, n’esficies, lo que, daveres, sinificó
la vida y la obra de Concha, convién
alvertir que tendríemos qu'asitianos naquellos años, pos sedría una enquivocación
mui grande qu'identificáremos, namás, como feministes los postulaos qu'anguaño
alquirieron la condición de talos.
Concepción Arenal conoció a Fernando García Carrasco, l'home
que depués sería'l so maríu, mientres estudiaba na universidá. Fernando yera,
entós, un abogáu y escritor d'idees bien lliberales y un pelín maduru. Tenía 40
años, yera 12 años mayor que Concha, pero compartía con ella la so pasión poles
lleis, los drechos de les persones y, n’especial de les muyeres. Amás aceutaba la so actitú combativa ante les
inxusticies d’aquella dómina. Casáronse'l 10 d'abril de 1848 y fixéronlo por
amor cuando, l'amor, naquellos años, tenía pocu que ver col matrimoniu.
Asocedió entós que, coincidiendo cola boda, españó la revolución en Madrid y los
recién casaos, fuxendo de Narváez, treslladáronse a vivir a Uviéu, onde Concha
escribió, esi mesmu añu, la zarzuela “Los hijos de Pelayo” y la novela “Historia
de un corazón”. N'Uviéu ñació la so primer fía, que llamaron María y diba finar
mui prontu, malpenes venti ocho meses dempués.
Cuando fracasó la revuelta, y Narváez dimitió del cargu,
Concepción Arenal volvió a Madrid y tuvo dos fíos más, Fernando y Ramón, de los
cuálos namás Fernando sobreviviría a so madre.
Mientres aquellos años, el matrimoniu defendíase y salía
alantre, a dures penes, colo que sacaben de les collaboraciones nos periódicos.
Pero Concha volvió a sufrir un nuevu y duru revés el 10 de xineru de 1857, fecha
na que finó'l so home, que diba tiempu padecía de tuberculosis. Vilba, con dos
fíos pequeños y pocos recursos, nun pudo siguir viviendo en Madrid y tuvo
qu'abellugase en casa los suegros, que vivíen cerca d’Uviéu, en Cualloto. Un
añu dempués, en 1858, acabó n'Uviéu, el so llibru inéditu “Dios y la Libertad”.
Meses más tarde, en 1859, des que pudo vender les propiedaes que-y quedaben
n’Armaño, treslladóse a Potes, a una casa que-y arrendó la so amiga Isabel de
Agüero.
En 1861, Concepción Arenal presentóse al concursu de la Real
Academia de Ciencies Morales y Polítiques, cola memoria “La beneficencia, la
filantropía y la caridá”. Y llogró'l premiu. Yera la primer vegada qu'una muyer
recibía un premiu de la nomada institución que, oficialmente, nun la premiaba a
ella sinón al so fíu, un neñu de diez años, que yera'l nome col que Concha se
presentare al concursu. Pa completar la xugada y facer efeutivu l'engañu allegóse
a recibir el premiu vistía d'home.
Concepción Arenal volvería, de nuevu, a Asturies en 1875,
esta vegada pa vivir dafechu en Xixón. Vieno acompañando al so fíu Fernando,
que foi nomáu direutor del Musel, y
estableció la so casa na cai Cuadonga, nel númberu 36, onde vivió 14 años que
fueron los más fecundos y completaron una obra plena de maduror ya idees
innovadores. En Xixón escribió la so obra xurídica más importante: “Ensayo
sobre el derecho de gentes”.
Naquella dómina, Concha dedicábase, por enteru, a escribir
sobre temes xurídicos ya preparar novedoses ponencies pa los congresos
penitenciarios internacionales. Malpenes facía vida social. Pa esparcese un
pocu, del so ablúcante trabayu, avezaba a dar un paséu, casi a diariu, dende’l
so domiciliu na cai Cuadonga hasta Contrueces. Los branos aprovechábalos meyor,
pasábalos en Cabueñes, nuna finca que pertenecía a Anselmo Cifuentes, un ricu
empresariu que punxo a Concha en contautu con Gumersindo Azcárate, un caderalgu
d'economía política, espulsáu de la Universidá de Madrid pol marqués d'Orovio,
que participare na creación de la Institución Llibre d'Enseñanza.
Siguiendo con aquel enfotu, que non abandonó nunca, de reinsertar
a los presos, Concepción Arenal unviaba, dende Xixón, memories y ponencies a
los Congresos penitenciarios d'Estocolmo, Roma, San Petersburgo y Llondres. Perdayuri recibía munches emponderaciones
pero, asina y too, nun consiguía que l'aceutaren como muyer. La preba más cruel
recibióla de l'Asociación Howard de Llondres, dedicada a la reforma de les
prisiones, que dirixóse a Concha creyéndola un home y nomóla sociu d’honor. Cuando
s’enteraron de quien yera, la reutificación foi acordies colo que pensaben los
homes entós, pos retrucaron dixendo que les sos obres nun paecíen escrites pol
celebru d'una muyer.
Concha sentíase bien a gustu y mui quería en Xixón. Reservada,
lluchadora y esmolecía pola dignidá del ser humanu, aquella dama enllutada, que
travesaba pola cai Cuadonga, en direición a Contrueces, malpenes tenía tiempu
pa frivolidaes sociales pero, asina y too, prestaba-y participar en delles
iniciatives del Casinu Obreru de Xixón y de la Sociedá Ilustración Gallego-Asturiana,
enantes de que la so salú se viere agravada, en 1884, pola muerte del so fíu
Ramón: un taranvana y vividor que tuviere de militar en Cuba y protagonizare
milenta aventures.
Concepción Arenal coló de Xixón obligada. En Xixón alcontrábase
mui a gustu y perbien. Sintió muncho marchar pero, en 1890, nun tuvo otru
aquello qu’acompañar al so fíu Fernando, que foi destináu al puertu de Vigo. El
treslláu y el nuevu destín, acabaríen por frayar la so delicada salú. Concha yá nun
volvió alitar. Tres años dempués, el 4 de febreru de 1893, morrió en Vigo
alcordándose de Xixón.
No hay comentarios:
Publicar un comentario
Milio Mariño