Uviéu y los caballos

La mio collaboración de los xueves nel programa Noche tras Noche de la RPA

El mio lio d'esta selmana ye pola qu’hai lliada col Centru Ecuestre d'Uviéu, daqué que yo vía nos periódicos, y pasábalo por altu. Sabía que'l Conceyu d'Uviéu fixera, na dómina de Gabino, una especie de Residencia Municipal pa los caballos, pero pocu más. Llamóme l'atención cuando esi asuntu entamó a salir casi a diariu y, sobremanera, va unos díes, cuando s'anunció que'l Conceyu diba pesllar esi Centru y el Conceyal d'Economía y Empléu dixo que los servicios que tien que dar un Conceyu son munchos pero qu’ente ellos nun ta curiar de los caballos, postura que, esclarió, nun había qu’entendela como revanchismu políticu sinón como aplicar sensatez y xaciu a la xestión municipal.

Lo que dixo'l Conceyal paecióme tan de sentíu que nun entendía que precisara esta última aclaración. Anque bonu, si lo esclariaba sería pa que nun s’entendiera per otru llau. Y ehí foi cuando m’interesé por saber qué pasaba col Conceyu d'Uviéu y los caballos… Anda tan revuelta la cosa que pensé… A ver si va resultar que tou esi lio colos caballos ye polo qu'antes llamábemos facer de Caballu Blancu, y agora llamen testaferru…

Pero non, la cosa nun va perhí… Va de que cuando Gabino de Lorenzo yera Alcalde, a la fin de los años noventa, fixo un centru Ecuestre cerca del ríu Nora, nuna finca municipal y n'otres que mercó depués, hasta llegar a los 300.000 metros cuadraos y a una inversión que, d’entamu, presupuestaron en 2,4 millones d’euros y acabó costando más de trenta… Una millonada. El resultáu foi que'l Conceyu d'Uviéu fixo'l centru ecuestre más caru d'España. Un centru que, según los entendíos, ye inclusu mayor que'lde Nueva York…. Dos pistes de calentamientu, pista de galopie, pista de sable, picadoriu cubiertu, clínica vetrinaria, Boxes, cuadres… Centru social… Aforu pa 2500 persones….

L’acabóse…Una ruina municipal…. Un disparate…. Que non solo hai que siguir pagando, sinón qu'amás cuesta lo suyu siguir manteniéndolo… D'ehí que'l conceyal dixera, con más razón q’un santu, qu'ente les competencies municipales nun pue tar la de curiar caballos. Anque, con tou, hasta qu'atopen una solución pa un tema que'l Consistoriu ya peslló y nun va siguir xestionando, el Conceyu d'Uviéu va tratar meyor a los caballos de lo que, na pasada llexislatura, trató'l de Madrid a les persones que vivíen neses viviendes sociales que vendieron, a escondíes, a los fondos buitre.

Asina que los defensores de los animales puen tar tranquilos. El Conceyu d'Uviéu nun va facer colos caballos lo qu'otros faen y fixeron coles persones. Nun va ponelos na cai y que s’arreglen como puean. Equí van intentar un final feliz pa otra de les munches películes de Gabino de Lorenzo: Un home llamáu caballu que foi mui pollín gastando dineru. 

Milio Mariño