El Mi lio d'esta selmana va de la toma de posesión del nuevu
Rector de la Universidá d'Uviéu, que tanto este como los anteriores siempre
dicen que nun ye namás d'Uviéu, que tamién ye de Xixón, de Mieres d’Avilés…
Colo fácil y económicu que sería dicir d'Asturies…. Y, al paecer, inda nun se-y
ocurrió a naide.
Estu que camentamos… Esi actu na Universidá, foi una
sospresa pa munchos porque, al paecer, choco-yos que’l nuevu Rector entamara’l discursu n'asturianu… Qué queréis que vos
diga… Si la Universidá ye d'Asturies y el Rector ñació en Verdiciu, xuntu a la
mar… Pienso que lo normal ye que fale n'asturianu… Y, asina foi como entamó
falando Santiago Garcia Granda, que pol aquello del protocolu yá diz tol mundu
que ye Magníficu, pero nos, de momentu, vamos dexalo en coyonudu,… Llueu,
depende como trate al nuesu, idioma yá veremos.
Granda, empecipió citando a Einstein y diciendo que ye llocura
facer lo mesmo una y otra vegada y esperar resultaos distintos. Depués dio les
gracies a la so familia y a tolos que fixeron posible que fuera escoyíu Rector…
y siguió en castellán… Nun ta mal, tampoco vamos pidir que fale asturianu
namás.
A mi prestóme qu'un paisanu vistíu con birrete y muceta
negros, les puñetes color rosa, y una medaya y un cayáu rectorales, falara
n'asturianu. Piensu que foi un detalle de color… Un pocoñín d’allegría pa esi
cuadru medieval de togues y birretes que faen de la toma de posesión un espectáculu
que naide debería perder…. Hai quien diz, con irónica malicia, qu'una toma de
posesión, na universidá, vien ser como l'antroxu de los sabios. Tol mundu
amarutáu con esos fatos clericales... Con toga y birrete en tecnicolor…
Los de derechu coloráu, los de medicina mariellu, los
veterinarios verde y los periodistes gris chombu… Qué, quiciás, seya de los más
apropiaos… Dixi toga y birrete y escaecí les puñetes… Que toes son blanques
menos les del Rector que les lleva rosa…. Un detalle d'encaxe, pa la bocamanga,
que se facía nos conventos y llevaba'l so tiempu… D'ehí la espresión de facer
la puñeta o mandate a faceles, que yá sabemos lo que significa, anque, pola
nuestra parte, nun tea por demás esclariar que en Portugal, facer la puñeta
quier dicir masturbase… Lo cuál cuadra meyor con esa espresión asturiana de….
vete a casacála.
Pienso que foi un detalle que'l nuevu Rector de la
Universidá s’alcordare del asturianu na toma de posesión… Nun se trata
d'imponer a naide como tien que falar… Pero a los pernomaos catedráticos
tampoco yos vien mal baxase, dacuando en vez, de la cátedra y falar como se
fala na cai… Si lo fixeren d’avezo nun pasaríen por situaciones embarazoses
como la que me cuntó una catedrática recién llegada de Madrid… Que, va tiempu,
confesóme que quedare de piedra cuando oyó qu'una muyer dicía-y al pescaderu…
Quiero que me llimpies el potarru… La probe, dixo que les pasare d’a kilo hasta
que s'enteró qu’equí llamamos potarru a una especie de calamar… Ye lo que tien
negase a falar como ta mandau.
Milio Mariño
No hay comentarios:
Publicar un comentario
Milio Mariño