El mi lio d'esta selmana son les
fiestes de prau…. Son eses fiestes qu’entamen agora, por estes feches, y cada
vez van quedando menos. Esti añu yá veréis como van dexar de celebrase unes
cuantes… Una pena porque les Comisiones
de Festexos, les probes, faen lo que puen… Pero, claro, lo que nun puen facer son
milagros… Lleven, que se yo’l tiempu
pidiendo que'l Principáu estableza una normativa específica que les salve d'un
afuegu económicu que les lleva dafechu. Güei, cualesquier fiestina cuesta una
fortuna. Cuesta lo que nun tienen, esos cuatro que les organicen siempre y
pasen tol añu faciendo rifes y tou lo que se-yos ocurra pa sacar cuatro
perruques.
Los conceyos, nun ye que dieren muncho pero tamién cerraron
el grifu. Agora dan menos… Y los chigres y les barraques tamién tán afogaos.
Total que nun queda tetu del que tirar…. Asina ta la cosa… La reconversión y la
crisis nun afeuta, solo, a la minería y la industria…. Afeuta a tou.. A coses
tan nueses como les romeríes y les fiestes de prau.
Anque tamién voi dicivos… Achacalo tou a la crisis sería
inxusto… Hai que ver como l'Alministración
trata a estes fiestes… Como dio en considerales poco menos que si fueren
conciertos de les estrelles del rock…. Empezando pola Sociedá Xeneral
d'Autores… Que non desperdicia la ocasión pa esmesayos el presupuestu… Depués
ta'l seguru obligatoriu, que tienen que facer,… les orquestes, los voladores,
la gaita… el tambor y la rémora del botellón….
Si, si… el botellón… Anque vos paeza raru, ente les principales
quexes de les Sociedaes de Festexos ta que la xente allegase al prau con bebíes
adquiríes nos supermercaos. Va poco, el Presidente d'una Comisión de Festexos,
declaró que l'añu pasáu, al otru día de
la romería, recoyeren na menos que 535 caxes de sidra que nun fueren mercaes
nel chigre. Asina nun hai manera. Toi d’alcuerdo que los mozos y les moces busquen
l’aquello de beber más baratu… Pero si nun hai fiesta nun hai nada…. Y el
chigre ye una fonte d'ingresos… Ye imprescindible pa nun muerran estos festexos. Dalgo cada vez más difícil porque aumenten
los gastos y mengüen los ingresos.
Si siguimos asina vamos acabar por perdeles… Y sedría una
pena porque les fiestes de prau, les romeríes de tola vida, amás de pa beber,
baillar y pásalo bien, faen que nos atopemos colos antiguos collacios, los
amigos y la xente conocío anque namás sía, una vez a l’añu.
Por eso que nun puen desapaecer… Entre toos, tenemos que
salvales. Nun pue perdese, eso de dir de fiesta y sentir la yerba embaxo los pies.
Los urbanites, igual non lu aprecien, pero tenemos que faceyoslo ver. Tenemos
que salvar les fiestes…. Les fiestes y los praos… Cantábalo, va tiempu, el
nuestru indíxena Jerónimu… Nun sé si vos alcordáis… Cantaba aquello de:…“Nun
queden praos,.. nun queden grillos,.. solu cementu,.. solu lladriyos….
No hay comentarios:
Publicar un comentario
Milio Mariño