Otra encuesta fata.

Milio Mariño

Nun ganamos pa encuestes. Güei, esti domingo buxu d’avientu, almorcé con una que diz qu'el 11% de los españoles nun llega a fin de mes, el 40,2% llega colo xustu y nun podría facer frente a dengún imprevistu, un 30% llega pero ensin capacidá d'aforru y el restu, supónse que pue vivir como ta mandáu. Unos cuantos ensin aforfugos y los que queden, hasta completar el 100, dándose la vida padre y diciendo que tien razón el PP, que la crisis apierta pero nun afuega y qu’hai que ser optimistes.

Pa esti viaxe, mialma que nun facía falta una encuesta. Bastaría con preguntar al amigu o al vecín y confirmaríamos el nuesu barrunto. Vivimos peor qu'antes y si daquién s’atreve a dicir lo contrario que llevante la mano, que quiero ve-y la cara, p'apuntalo como esceición de la regla.