Agradezse que queden xueces que manda carallo

Milio Mariño

El Tribunal Constitucional acaba d’amparar, nuna sentencia, la inclusión de la espresión "manda carallo", destacando que denguna llei impide a naide permitise eses llicencies.

El casu esamináu, pol tribunal, foi'l del arquiteutu Gómez Muguruza, que demandó a la so empresa y la demanda foi anulada pola Sala Primera del Tribunal Central, en dos autos, nos que se dicía que nun podíen almitise espresiones como "manda carallo" y entá menos que'l demandante, a pesar de ser riqueríu pa quitales, negárase a facelo.

Gómez Muguruza retrucó que l'estilu y la redacción del so escritu taben dientro del exerciciu llexítimu de los drechos fundamentales a la llibertá d'espresión, opinión y defensa, y que desconocía cuáles yeren "les espresiones coloquiales, superflues ya impropies" a les que s'aludía.

El Constitucional sentencia, agora, que nesti asuntu la llei procesal aplicable nun configura como motivu d'inadmisión de la demanda l'usu d'espresiones inxurioses o pocu respetuoses. Cosa qu’agradeció l'arquiteutu esclariando que nun quixo ofender, sinón que permitióse un toque d'humor, na reclamación a la so empresa, pa evitar colgase d'un árbol.

Toi d’alcuerdo con too, cuando a unu lo echen del trabayu, lo menos que pue facer la xusticia ye dexalo que se desafogue soltando cualquier bocayada.

La policía pesca nes redes sociales

Milio Mariño

La Fiscalía de l'Audiencia Nacional llamó a declarar nel últimu mes a dos persones pol conteníu de les sos opiniones nes redes sociales. Tratase de dos muyeres que roblen los comentarios como Almu en Lucha y Loba Roja.

Nun casu, según la fueya de citación de la Fiscalía de l'Audiencia Nacional que la mesma acusada facilitó escaniada y entornada na rede social, tán investigándola por ser presunta autora d'un supuestu delitu d'enaltecimientu del terrorismu, al citar en dellos mensaxes a los GRAPO.

Nel otru casu, a quien robla como Loba Roja, la cita ye por facer munches referencies a Gramsci y por escribir la siguiente frase: “Hai tres clases de xente: la que se mata trabayando, la que tendría que trabayar y la que tendría que matase'". Una frase que ye de Mario Benedetti.

Los policíes que vixilen les redes sociales nun sé yo sí tarán bien al tantu de los filósofos y los pensadores pero, a riesgu de que me llamen a declarar o m'enchironen, voi probar citando la frase más famosa de Gramsci: “El vieyu mundu muérrese. El nuevu tarda n'apaecer. Y nesi clarescuru surden les bisarmes”.

Barrunto que yá surdieron, que yá tán equí, ente nos.

Cuatro nun vagón qu'apesta

Milio Mariño

Naide sabe qué facien estos cuatro, caún con más cara qu'espalda, viaxando nun vagón del Ave. Naide sabe que pintaba, ellí, un Príncipe pamestu que fexo’l discursu en catalán, anque nunca lo faiga n’asturiano, y viaxaba enfrente de Mas, el mesmu que va dos díes salió na tele cola foto del Rei voltiada, nun biecu claru de despreciu. Naide sabe que pintaba’l Presidente del Gobiernu aguantando que’l nada honorable, cabezaleru d’un partíu qu’acaba de declarase corruptu, fixera un discursu nel que llama lladrones al restu los españoles. Naide sabe de que se ríi la ministra, anque seya cola sorrisa fata del que traga sapos y culiebres.

Naide sabe nada… Xúntense, unos con otros, y ponen cara d’estreñios cuando, mialma, da cagalera velos facer la comedia de que toos se lleven divinamente.

Nel momentu de la foto, paez como si dalguién tirare un fumiacu y tastiaren el golor a podre. El vagón fiede qu'apesta pero denguno de los cuatro toma cuenta de la mierda propia. La propia nun güel y l'ayena sopórtenla con cinismu y una pinza nes ñarres.

Tolos díes apaecen nuevos casos de corrupción, la xente suicidase, quemase a lo bonzo y protesta na cai pero como si cantaren. Los cuatro del vagón tan convencíos de que faigan lo que faigan tenemos la obligación d'aguántalos y baxar la mollera.

Pero sigo siendo'l Rei, dixo Xuan Carlos

Milio Mariño

La entrevista que Jesús Hermida fixo al Rei, que nun aguanté na so totalidá, alcordóme aquel cantar mexicanu… Una piedra nel camín, enseñóme qu'el mio destín… Yera rodar y rodar… Nun tengo tronu nin reina… Nin naide que me comprienda… Pero sigo siendo'l Rei…

La sensación foi como de publicidá pagada, de publirreportaxe navidiegu que fala d'un productu cuyes virtúes y defeutos yá conocíamos de sobra. Foi falar pa nun dicir nada y dexar al descubiertu les tresnochaes idees y les llimitaciones d'un home de 75 años que nunca foi brillante y que les sos torpeces, siempre, quixeron vendeles como feches arrede por dalguién mui campechanu y simpáticu.

Más qu'un asuntu seriu paecía una escena infantil. El tratamientu de señor, col que testeronamente Hermida dirixíase al Rei, recordaba'l señor si señor de los subordinaos escontra los oficiales que vemos nes películes americanes.

La conclusión final ye que'l Rei caltién los sos privilexos, va siguir siendo rei hasta que muerra y nun va apurrir nada nin va contribuyir a gobernabilidá d'España. Lo único positivu foi que, nesta ocasión, nun soltó denguna patochada, aconseyáu, de xuru, de que los súbditos y el país nun tán pa chancies nin graciosaes.

Sangre, estupor y llárimes

Milio Mariño

Nun soi quien a imaxinar la cara, nin el cuerpu, nin les coraes, nin nada, de la persona, funcionariu o funcionaria, del Ministeriu italianu de Seguridá y Medioambiente, qu'escribió la carta na que-y piden, a Alessandra Mezetti, que pague 725 euros pola llimpieza de la sangre qu'el so fíu, de 15 años, dexó nel asfaltu por culpa d’un accidente de moto, na vía del Fontanile Anagnino, de Roma, que lo llevó a cutir la cabeza contra una farola y finar nel actu.

Yá sé qu'hai xente pa tou pero cuéstame almitir qu'un ser humanu pudo redactar esa carta na qu'espliquen a la madre que pa llimpiar la sangre esparcía pol so fíu nun tramu de carretera "tuvieron qu'utilizar una máquina especial".

Na carta tienen el detalle, amás, d'esplicar que la llimpiaron "por cuestiones de seguridá" porque la carretera podría ser peligrosa al convertise "en resbaliza".

Anque pa lo que tamos falando ye lo de menos, dase la paradoxa que nel accidente tán imputaos, por homicidiu culposu, trés policíes urbanos y un funcionariu municipal.

La señora Mezetti, la madre, que califica la carta d'insúltante y vergonzosa, manifestó al diariu La Reppublica que cuando acabó de lleela creía que nun taba despierta, que yera víctima d'una pesadilla.

La clase rica ye la que fai esta guerra, y ta ganándola

Milio Mariño

Dándo-y vueltes a lo qu'asocede, lleendo equí y alló, atopéme con unes declaraciones que'l norteamericanu Warren Buffet fixo al New York Times ehí p’atrás.

Warren, que ye una de les persones más influyentes ya riques del mundu, dixo daqué que quiciabes paeza cínicu, pero yo estimulo polo que tien de sinceru. Dixo estu: "Dende llueu qu'hai una guerra de clases, pero ye la mio clase, la clase rica, quien la ta faciendo y a fe que la tamos ganando".

Otros nun s’atreven a dicilo pero lo ciertu ye que los ricos tán faciendo la so revolución y tan ganándola. De mou que cuanto más tardemos en reconocelo peor nos dirá.

Que la tean ganando nun quier dicir que la vaigan a ganar, eso dependerá de nós. Dependerá de que los ciudadanos aceutemos vivir nuna sociedá más inxusta y bona, namás, pa unos pocos.

Soi de los que piensen que lo difícil foi llegar a onde llegamos y que’l progresu social nun tien marcha tras. Ciertu qu’agora reculamos unu pocu pero esto tien que sirvinos pa coyer impulsu y avanzar más apriesa. Lo único que precisamos ye organización, lideralgu y llucha. Y cuantu primero meyor.

Del abismu al sucu fiscal

Milio Mariño

Estos díes pasaos falóse abondo de qu'Estaos Xuníos podía cayer nun abismu fiscal y unu que coyere, col vuestru permisu, vacaciones navidiegues lleía les noticies pendiente d’enterase de que diba esa milonga qu'amenaciaba con una hecatombe mundial más estrozona que la boutade de los Mayas.

L'abismu fiscal resultó ser que'l tipu máximu d'impuestos, en EE.UU, pasaba del 35% al 39,6%, a partir de los 250.000 dólares d'ingresos añales, que yera lo que proponía Obama, y la cosa solucionóse alzando'l suelu hasta los 450.000, de cuenta que'l precipiciu quedó nun sucu qu'afeuta namás al 2% de los americanos. A los ricos, ricos, que ganen un pastón.

Obama sacó alantre la so propuesta cediendo, pa dalgunos, de forma escesiva y los Republicanos cedieron dando sofitu a unos impuestos que van en contra de los sos principios.

L'episodiu da pa milenta comentarios y anque prometo volver sobre’l tema apunto dos detalles p'abrir boca. N'España sedría impensable que'l PP sofitara una propuesta d'impuestos del PSOE. Y sería, tamién, inauditu que diputaos d'unu y otru partíu votaren lo creyíen que teníen que votar en conciencia y non lo que-yos mandaben votar nel so partíu.