El grandor y la guapura de los paisaxes de Castropol, les
sableres de Penalba, los Cobos y Salíes,
los requexos afayadizos, namás a marea baxa, que finsen la mariña hasta llegar
a Figueres, el castru de Turullón y los díes buxos d'un branu embruscáu y lluvioso,
tuvieron a puntu de gorar de murnia al poeta Luís Cernuda.
Cernuda llegó a Castropol, a primeros del mes d'agostu de 1935,
como integrante del Patronatu de les Misiones Pedagóxiques, una institución que
fuere creada pola Segunda República pa llevar la cultura hasta les zones
rurales. Tres años enantes, camín de Ribadeu, pasare pellí García Lorca, quién
depués treslladaría al poeta la manudez d'aquellos paisaxes. Tamién lo fixeren
dos grandes amigues suyes, Blanca Chacel, hermana pequeña de Rosa, y Concha Albornoz,
pos la so familia tenía una casona cerca de L.luarca y avezaba a pasar elli los
branos. De mou que Cernuda llegó a Castropol mui bien informáu y predispuestu a
pasar dos selmanes como quien va de visita a un requexu del paraísu.
La primer impresión que llevó nun pudo ser meyor. Cernuda
agospióse nel Hotel Guerra y, según cuntaba entusiasmáu, espertó a les nueve la mañana oyendo, non mui
lloñe, la Sonata a Kreutzer de Beethoven, lo cuál, amás de causa-y una prestosa
ya increíble sospresa, daba cuenta del ambiente cultural que se vivía entós
naquel pueblu del occidente asturianu.
L'impautu qu'al poeta tuvo de causa-y el paisaxe y la xente
de Castropol quedó reflexáu no qu'escribió valtáu sobre'l sable de la playa Los
Cobos, onde dalguién-y fexo una foto que sirve de muestra pa certificar ellí la
so presencia.
“Cuando a la cayía
d'una d'eses llargues tardes de branu baxes la sienda que dende lo altu la
llomba lleva escontra'l malecón, el trupu arume de la mar, el misteriosu glayíu
de les gaviluetes sobre la brillosa superficie de les agües, namás encrespaes
allá, ente les aveses peñes que guarden la embocadura la ría, entós yo asegúrovos
que poco accesible va ser a la naturaleza quien nun sienta les neñines de los
güeyos enturbiaes poles llárimes”.
Cernuda taba entusiasmáu col paisaxe, pero tuvo la mala
suerte de que les dos selmanes que pasó en Castropol concidieron con un períodu de mal tiempu. Con
unos díes de borrina, cielu buxu y testerón orbayu qu’atristayaron, entovía
más, al poeta andaluz, que taba pasando una mala racha, por un amor frayáu, y
naguaba por que la lluz del sol allumara aquellos llugares que-y causaren una
fonda impresión. Dos años más tarde, en 1937, espublizó’l rellatu "En las
costas de Santiniebla", un magníficu testu, ente descriptivu y señardosu,
nel qu'imaxina los crímenes, los paseos ya les saques nocherniegues que taríen
asocediendo naquel preciosu llugar que tanto-y gustara. La información que-y
llegaba, de lo qu'asocedía na zona nacional, en plena Guerra Civil, nun se
refería a Castropol pero asitióla ellí, onde, efeutivamente, como barruntaba
Cernuda, la muerte fixo actu de presencia dende'l primer momentu de la
ocupación militar.
El poeta escribía lo que-y dictaba'l maxín, entá plasmáu
pola alcordanza de Castropol, pero lo cierto, la verdadera paradoxa, yera qu'a
plena lluz, y nel centru mesmu del pueblu, taben executando a los derrotaos, en
presencia del cura párrocu, cola escusa de que mataren a un suboficial que
morriera, poco enantes, en San Xuan de Moldes. Cernuda nun conocía nin tenía
noticia d’aquellos socesos pero la ficción que recueye'l testu val p'afitar lo
que Vargas Llosa, y otros escritores, llamaríen, tiempu dempués, la verdá de la
mentira lliteraria.
Los momentos d’axitación que vivía España nos años trenta,
la crisis social y l'ambiente bélicu nun tornaron a Luís Cernuda, nin a Julien Gracq,
el más reputáu escritor francés de la dómina, d’atestiguar la guapura de
Castropol y los pueblos asitiaos na redolada del Eo. Cosa que fixeron al empar
que s'ocupaben de les actividaes qu'entamaron, de manera conxunta, cola Biblioteca
Popular Circúlante, una entidá que compartía la mesma filosofía d'ufiertar
cultura a los que vivíen alloñaos de les grandes ciudaes.
Diez años enantes, en Castropol yá se punxera en marcha un
proyeuto cultural ya educativo que tomó como base la biblioteca. Un proyeuto
que se consolidó al entamu de los años trenta y llamó l'atención de Bartolomé
Cossío, María Moliner, José Vasconcelos y Juan Vicens, que se desficieron
n'aponderamientos escontra d’aquel enfotu que duró hasta 1936 y supunxo pa los
sos más direutos collaboradores munches penalidaes ya, incluso, la muerte.
Luís Cernuda ñaciera en Sevilla, el 21 de setiembre de 1902,
ya estudiare Drechu y Lliteratura teniendo como maestru a Pedro Salinas, que
foi quien lo ayudó nes sos primeres publicaciones. Pertenecía a una familia
acomodada na que'l so padre, que yera militar, impunxera una atmósfera d'estriuta
disciplina ya desafeuto que reflexaríase,
dempués, nel calter del poeta: mui represu, introvertíu y amigu de la soledá.
Alló per 1931, García Lorca presentó-y a un xoven y guapu actor
gallegu, Serafín Fernández Ferro, y Cernuda namoróse d'él; pero l'actor nun-y
correspondía, dexabase llevar y namás aceutaba la so compañía cuando precisaba
perres. Aquel amor, tayáu ya insatisfechu, acabaría inspirando dos llibros: “Dónde
habite el olvido” y “Los placeres prohibidos”.
Desengañáu, y seique
pa escaecer aquella rellación fallía, Cernuda decidió arreyase nel proyeuto de
les Misiones Pedagóxiques col que, n'agostu de 1935, llegó a Castropol. El so
cometíu yera dar conferencies nes que falaba sobre los oxetivos del Patronatu.
Pero, les conferencies nun se ciñeron a l’ámbitu de Castropol, repartiéronse
poles distintes sucursales de la Biblioteca Popular Circúlante, de cuenta que'l poeta percorrió'l conceyu, y
otros conceyos vecinos, visitando Serantes, A Roda y A Caridá.
Cumplida aquella misión, n'abril de 1937, Cernuda
treslládose a Valencia, onde publicó “Elegía a Lorca”, participó nel II
Congresu d'Intelectuales Antifascistes y conoció a Octavio Paz, a quien
volvería a ver, años dempués, cuando tuvo exiliáu en México.
En 1938, Cernuda coló pal Reinu Uníu, a dar un ciclu de
conferencies. Y ellí foi quedando, ente Cambridge y Oxford, hasta que, en 1947,
empecipió'l so exiliu norteamericanu como profesor de lliteratura nel colexu de
Mount Holyoke, en Massachusetts, xera na que s’ocupó hasta 1952, cuando decidió
establecese, definitivamente, en México capital, siguiendo los pasos d’otru
amor que lu encandilaba; el d'un culturista, llamáu Salvador Alighieri, que
conociera nes vacaciones de 1951.
Cernuda yá nun se
movió más. Vivió en México, en casa de la pintora Paloma Altolaguirre, hasta'l
final de sos díes. Ellí vivió alcordando les sos vivencies y, n’especial,
aquelles tardes de branu que pasare no que llamó la costa de Santiniebla, nel paraísu
de Castropol. Cuenten que, na mañana del 5 de payares de 1963, la sirvienta
avisó a Paloma de que Cernuda yera raru qu’entá nun baxare a almorzar. Cuando
xubieron atoparónlo tendíu, a la llarga, en suelu. Tenía puestes la bata y les
zapatielles. Na mano drecha caltenía la so pipa, recién cargada, y na esquierda
una caxa cerilles. Acababa de sufrir un
paru cardiacu que-y causó la muerte.
No hay comentarios:
Publicar un comentario
Milio Mariño