A mediaos del sieglu XIX la reina d'España Isabel II, y el
so maríu Francisco, baxaron a la mina d'Arnau, en Castrillón, y grabaron col
fumu d’una vela les sos iniciales sobre una veta de carbón que yera la
principal. Poco dempués, los direutivos de la Real Compañía Asturiana
alcordaron poner, elli mesmu, una placa que dicía: “En 24 de Agosto de 1858
llegaron con ánimo jovial y resuelto hasta este lugar profundo y sub-marino, no
visitado antes por mujer alguna, la excelsa Reina de las Españas Doña Isabel II
y el Rey D. Francisco de Asís, su augusto marido”.
Los direutivos de la empresa sintíense mui honraos pola
visita de so Maxestá la Reina a una mina que yera la única de la so clase nel mundu
qu'algamaba tal distinción. Presumíen tolo que podíen y más, pero curiábense d'alvertir
que fuere una casualidá pos nun taba previstu nin naide propuxera a la Reina
baxar a la mina. Nun yos pasare pola mollera. El plan yera que dempués de
visitar la fábrica, la reina Isabel tomara un aperitivu y un vinu español na campa
d'Arnau, frente a la playa del mesmu nome, en compañía de los direutivos, el séquitu
y les autoridaes. Esi yera'l programa de los actos qu’anunciaren pero, cuando entamaben
colos canapés, Isabel garró al so home de la mano, salió corriendo, empobinó
frente al castillete del pozu, que taba nel cantil de la playa, práuticamente a
dos pasos, y dixo que quería baxar.
El revuelu que se formó foi tremendu. Dellos invitaos
siguieron a la Reina y otros quedaron a mediu camín, duldando ente siguila o volver
a les meses del convite cola bebida y los canapés. Tomó la iniciativa'l xeneral
O´Donell quien xuxurió a la Reina que volviere colos invitaos mientres el direutor
de la mina, el Sr. Hauzeur, y él mesmu, realizaben una visita al interior del
pozu pa comprobar si había peligru. Pero Isabel, que paecía divertise col enriedu,
nun quixo esperar, volvió a garrar al so home de la mano y llevólo, con ella, a
la xaula, qu'asina ye como se llama l'ascensor de los pozos mineros.
Cuando, a la fin,
baxaron y tuvieron dientro de les galeríes que calletraben per baxu la mar, a 80
metros de fondura, Isabel arremangóse la falda y foi caminando hasta que
s'atopó colos mineros que picaben carbón. Cuenten les cróniques qu'un inxenieru
belga, apellidáu Schmit, saltóse'l protocolu, abrió los brazos y glayó
entusiasmáu: ¡Usté merez dalgo mui grande, un gran homenaxe de too corazón!
Isabel II, tuvo charrando media hora colos mineros, enantes
de dexar grabades les sos iniciales, col fumu d’una vela y salir de la mina
como un auténticu carboneru; col vistíu puercu y la cara tisnada de negru, pero
lloñe d'importa-y pasiaba, arguyosa, presumiendo de lo que fixera. Tisnada y
cola ropa puerco, participó, con humor, nel refrixerio y faló colos invitaos camentándo-yos
los pormenores de la singular esperiencia que viviere na mina.
Mientres esto asocedía, la noticia, de que la Reina baxare a
la mina d’Arnau y tuviere charrando colos mineros, corrióse como la pólvora. En
Avilés nun se falaba d’otra cosa y eso fixo que, nel muelle, fuere arrexuntándose
un xentíu enorme qu'españó en vítores y palmiaes cuando Isabel desembarcó de la
falúa que la trayía dende San Xuan de Nieva.
Ente aquella montonera de xente, lleváu de la manu pol so
tíu Llinu, taba'l neñu Armandín. Armando Palacio Valdés, l'escritor qu'años
dempués narraría los socesos d'aquel día na so obra autobiográfica 'La novela
de un novelista'.
La reina Isabel II acababa de pasar n’Arnau ún de los díes
más felices de so vida. Baxare a una mina de carbón, que calletraba perbaxo la
mar, charrara colos mineros y sintiérase nel paraísu. Tal foi asina que los vítores
ya los aplausos que recibió n'Avilés emocionáronla tantu que la xente viola
llorando al tiempu que nun paraba tirándo-yos besos.
Isabel de Borbón, a
la que llamaben de los Tristes Destinos,
yera desendolcada y mui candial cola
xente; traces que, n'ocasiones, entemecía cola chabacanería y l'ordinariez. Taba
marcada, dende’l so ñacimientu, por una estelante precocidá que-y vieno
impuesta pola so condición de primoxénita de Fernando VII, un monarca qu'empezó
como El Deseado y acabó como'l rei Felón.
Cuando Isabel entá nun cumpliere tres años foi nomada Reina
d'España. Forzaron la so mayoría d'edá a los 13 y, tres años dempués, casóse,
per aciu d’un matrimoniu obligáu que nin siquier se peracabó, pos la nueche de
bodes, según cuntaba la mesma Isabel, el noviu llevaba más encaxes ya puntielles
qu'ella mesma.
El 14 d'ochobre de 1830, Fernando VII, per mediu d'un Real
Decretu, nomó a la recién ñacía, Isabel, Princesa d'Asturies: Por ser la heredera
y llexítima socesora a la mio corona mientres Dios non me conceda un fíu varón.
El nomamientu foi ratificáu poles Cortes el 20 de xunu de 1833. Pocos meses
dempués morría Fernando, dexando a la so fía nel tronu y a María Cristina como
rexente. La oposición de Carlos, que nun quixo aceutar a la so sobrina como
reina, desamarró llueu la primer guerra carlista.
Isabel II, namás tenía 28 años cuando baxó a la mina d'Arnau.
Obligada a asumir responsabilidaes dende mui neña, el so matrimoniu fracasó,
nos primeros meses, y arrequexóla nuna tristura qu'intentó compensar con una
intensa y mui criticada vida amorosa y con llocaes, que rompíen el protocolu, como
aquella de baxar a la mina. Avezaba a xustificase diciendo que'l so home yera
un amaneráu, que mexaba en cliques, como les muyeres, y tenía, inclusive, más
amigos masculinos qu'ella mesma. Detalle qu'avezaba a xalear el pueblu con una
canción que dicía: “Isabelona tan frescachona y don Paquito tan mariquito."
Tolos fíos que tuvo Isabel, que fueron dolce, túvolos colos
sos amantes, pero toos fueron reconocíos pol so home que los presentaba na corte
como fíos propios, a cambéu d'una importante cantidá de dineru. Namás cuatro llegaron a la edá adulta:
Isabel, Alfonso, que sedría Alfonso XII, Pilar y Eulalia.
Isabel II foi destronada pola Revolución de 1868, llamada la
Gloriosa. Acompañada pol so maríu, y los sos fíos, fuxó a Francia siendo
acoyida pol emperador Napoleón III, que l'agospió nel castiellu d'Enrique IV,
en Pau, y dempués nel palaciu de Basilewsky.
Alló, en París, Isabel vivió dixebrada del so maríu y
retirada de la política activa, ensin gociar yá de nengún tipu de protagonismu
públicu y abdicando en 1870 de los sos drechos al tronu en favor del so fíu Alfonso.
Finó na mañana del 9 d'abril de 1904, na so residencia parisina, por unos entueyos
broncu-pulmonares producíos por una gripe. Y lo que son les coses, alló poles
mesmes feches en que morrió la Reina, munchos mineros d’aquella mina d'Arnau
que tantu alcordaba, foron despidíos por organizar una fuelga que duró más d’un
mes. Una fuelga que fexo que bona parte d’aquellos mineros emigraren a los Estaos
Xuníos d’América.
No hay comentarios:
Publicar un comentario
Milio Mariño