Cuando’l Papa Juan Pablo II baxó del avión, a media mañana, el
20 d’agostu de 1989, nel aeropuertu d’Asturies yá facía calor. En Santiago’l
Monte facía un día espléndido. Yera domingu y los responsables d’organizar la
visita, la xerarquía de la ilesia asturiana, que tuvieren mui preocupaos nun
fuera ser que’l mal tiempu arruinare los actos previstos, sorrieron satisfechos.
Taben contentos de que los asturianos pudieren esfrutar de la visita del Papa
ensin esmolecese por si acasu llovía. Pero nun llovió, y los asturianos
aplaudieron, enforma, a Juan Pablo al so pasu poles cais d'Uviéu y depués, yá
pola tarde, a la fin de la misa multitudinaria que’l Pontífice celebró en
Llanera, na esplanada de La Morgal, baxo un sol de xusticia.
La primer xornada, del Papa n’Asturies, fuera un ésitu, pero
Juan Pablo II entá tenía que viaxar, n'helicópteru, a Cangues d'Onís y, depués,
xubir, en coche, hasta Cuadonga. Entá-y quedaben un par d'hores de viaxe pa
rematar un día que mayaría a cualesquiera y más a una persona, de 69 años, que
la nueche anterior, fría y embruscada, tuviere nel monte Gozo, en Santiago de Compostela,
participando d'un alcuentru festivu colos mozos católicos hasta bien tarde.
Yera normal, entós, que Juan Pablo II diera muestres de tar visiblemente
cansáu.
La xente que pudiere asitiase na primer fila camentaba que
Juan Pablo II nun tenía bon aspeutu. Achacaríenlo,
de xuru, al duru traxín al que se vía sometíu un home yá mayor pero, les fondes
goyeres y la dificultá cola que facía cualisquier movimientu, afalaben el barrunto
de qu’igual se trataba de dalgo más grave que'l lóxicu cansanciu a la fin d'una
dura xornada. El casu que, namás, los más allegaos, y l'Arzobispu d'Uviéu,
sabíen que’l Papa taba aquexáu de gripe. Asina foi qu'en cuantu llegó a Cuadonga,
a la Casa d'Alcuentros onde pasaría la nueche, examinólo'l médicu, que-y tomó
la temperatura y alvirtió que tenía fiebre. El termómetru marcába 38 graos.
Alcordaren callar la matuxa pero, naquel momentu,
encendiéronse les alarmes. La fiebre yera alta y, toos, taben esmolecíos. La
esmolición foi mayor cuando, Juan Pablo, dixo que nun quería cenar. Encargó-y
al so secretariu, Stanislaw Dziwisz, que-y preparare un ferviatu, tomólo y, desiguida,
coló pala cama.
Juan Pablo II durmió, en Cuadonga, más de diez hores
siguíes, dende les nueve la nueche a les ocho de la mañana, y aquel suañu non
solo foi reparador, foi milagrosu pos llevantóse con bon aspeutu, ensin fiebre
y de mui bon humor. Pa despeyar cualisquier dulda, mientres almorzaba, dixo-yos,
a los allegaos, que s'atopaba perfechamente y que, d’acordies colo previstu,
daría un paséu polos Llagos. Falaba con tal determín que'l séquitu del
pontífice, convencíu de que nun consiguiríen disuadilo, pensó que lo meyor sedría
que tuviere un calzáu afayadizo. Nun repararen nesi detalle, asina
qu'encargaron al xerente de la diócesis d'Uviéu, José Gabriel García, que fuere
a merca-y unes zapatielles deportives.
José Gabriel garró’l coche y foi, escapáu, a facer l'encargu
pero cuando llegó a Cangues d'Onís diose cuenta de que naide-y dixera qué
númberu calzaba El Papa. Calculó que sedría un 43 o 44, un númberu grande.
Mentanto, los actos d'aquella mañana foron cumpliéndose
ensin dengún sobresaltu. Toos menos la visita del Papa a la cova de la Santina,
onde tuvo de rodíes, cola cabeza abangada y nun perfondu recoximientu, 14
infinitos minutos que punxeron nun apiertu a los sos acompañantes. Paecía-yos
qu'allongábase por demás pero naide tenía’l valor d’atayar aquel silenciu. Nunca enantes, nin
siquier na so visita a Auschwitz, el tarrecible campu de concentración nazi de
Polonia, el Papa Wojtyla permaneciere tantu tiempu de rodíes.
Superáu aquel xustu, a Juan Pablo II lleváronlo a la finca
Les Llanes, que facía d'helipuertu, y dende ellí, n'helicópteru, a la esplanada
frente a los Llagos onde, a pesar de los conseyos, negábase a camudar de
calzáu. Tuvo qu'esnidiar y cayer de costazu pa que dixera: Venga daime les les
zapatielles. Unes zapatielles que, al ponéles, resultó que yeren un par de
númberos más grandes de lo que precisaba. Con too, atrevióse a dar el paséu con elles. Tuvo pasiando, solu, más
d'una hora pola redolada de los llagos, col so carauterísticu ropaxe blancu, un
cayáu d'ablanu y aquelles zapatielles blanques y roxes que-y mercaren en Cangues
d’Onis a última hora.
Dempués del llargu paséu, el Papa arrequexó embaxo d’una
peña, p'abellugase del sol, y camentó que fuere'l segundu paséu más guapu que
diere na so vida. Dixo que se sintiere reconfortáu y dafechu feliz. Tenía,
inclusu, mambís, de cuenta qu'ellí sentáu, al pie de la piniella, comió un tentempié
que-y preparara Maria Luisa García, una de les más reputaes cocineres
asturianes.
Amás de les zapatielles, desaxeradamente grandes, al Papa
regaláren-y, el día enantes n'Uviéu, una reproducción de les sandalies de San
Pedro y una reliquia de la Catedral. Nun llegaron a regala-y, como taba
previstu, un esbardu. El Vaticanu punxera reparos. Nun quería aceutar el regalu,
pos tarrecía que pudiere acabar como'l pollín que-y regalaren a Wojtyla en Brasil,
que nun supieron qué facer con él y convertióse nun problema. Nesti casu'l
problema nun llegó a plantegase porque l'esbardu morrió pocu enantes de la
visita del Papa. Hai quien diz que morrió de pena, por nun ser aceptáu.
Perembargu, otros piensen qu'escoyó morrer primeru de perder la so llibertá nos
montes asturianos.
Percima de les
anécdotes d’aquellos dos díes, lo que dexó a toos plasmaos foi que Juan Pablo
II dixera, dempués d'oyer l’Asturies patria quería, que-yos agradecía que-y
dedicaren un cantar qu'alcordaba con muncho ciñu polo muncho que lo tenía oyíu
cuando yera malpenes un neñu.
Aquel camentariu fexo biltar l'interés de dellos
historiadores y postreros estudios revelaron que la melodía del himnu
d'Asturies yera, nel so orixe, polaca. Venía d'un cantar popular d'esi país,
que yá se cantaba a mediaos del sieglu XIX, y llegó a Asturies a principios del
sieglu XX, de la mano de los emigrantes de Silesia que vinieren pa trabayar nes
mines de carbón.
Juan Pablo II, non solu esfrutare pasiando pola campera de
los Llagos de Cuadonga, unu de les paraxes más guapos que viera na so vida,
como él mesmu dixo, conmovíu ya emocináu, sinón que remató la xornada
escuchando un queríu y señardosu cantar de la so infancia que pensaba que-y lo
cantaben como homenaxe y resultó ser l'himnu d'Asturies.
La imaxe del Papa
Juan Pablo II pasiando polos Llagos de Cuadonga, como quien da una vuelta pol
Paraísu, apaeció na primer páxina de los periódicos de tol mundo y entá resulta
conmovedora. Como tamién lo ye que, na so agonía, tuviere l’arte de dictar una
carta al so secretariu Stanislaw Dziwisz, na que
dicía: Soi mui feliz, síanlo tamién ustedes. Nun quiero llárimes, quiero
allegría.
No hay comentarios:
Publicar un comentario
Milio Mariño