.jpeg)
Jean Marie Auel, ye una escritora estadounidense, autora de
la popular ya famosa obra “Los hijos de la Tierra”, una serie de noveles que
trescurren na Europa prehistórica, foron lleíes por más de 50 millones de
persones, traducíes a 35 idiomes y llevaes al cine. Una gran escritora que
visitó Asturies, en delles ocasiones, atrayía pola so hestoria, el so paisaxe y
les sos cueves prehistóriques, que conoz al detalle.
Auel vive mui lloñe, en Portlan, Estaos Xuníos, pero nun tien
reparu en viaxar y plantase n’Asturies pa tomar notes y facer cientos de fotografíes,
que depués esparce y pon al alredor de la mesa, pa echayos una güeyada mientres
escribe, a la fin de que-y devuelvan l'alcordanza d'un paisaxe que, siempres la
emociona ya tien presente nes sos descreiciones.
Buscando volver alcontrase con esi paisaxe, coles cueves
prehistóriques y cola xente qu'entá sigui viviendo nos pueblos d'Asturies, nel
branu de 2002, Auel pasó casi un mes en Cabrales y, como ella mesma reconocía
pocu enantes de marchar, esfrutó tantu que colaba cola idea de que La Covaciella,
y tolo qu'atropa l'escobiu de Les Estazaes, y la so redolada, sirviríen-y
d'inspiración pa empobinar la séptima y última novela de la so afamada saga.
Na visita que Jean
Marie fexo a Cabrales, nel añu 2002, tuvo acompañada por Lawrence Guy Straus,
caderalgu de prehistoria de la Universidá de Nuevo México, Claudine Fisher, cónsul
honorífica de Francia en Pórtland, y pol maríu de la escritora, Ray Auel, un
paisanu bonable que fala nun correuto español, fexo de traductor y ayudó tolo
que pudo pa que la so muyer pudiere charrar colos cabraliegos, interesándose
pol so quefer cotidianu y la so forma de vida.
Coincidió qu'aquellos
díes, dende mediaos de xunetu hasta casi mediaos d'agostu, fexo un tiempu
preciosu alló en Cabrales. Nin un asomu de ñubes; el sol rellumó en tou lo alto,
la temperatura superó los 30 graos, y
Jean Marie, qu'entós tenía 66 años, dellos alifaces y un seriu problema
d'artrosis nes rodíes, nun pudo movese como quixera pola contorna del pueblu
nin baxar al interior de la cueva, pero amosóse satisfecha de que'l Principáu
curiara'l so patrimoniu y estimó, emocionada, que José Vicente del Carmen, alcalde
de Cabrales, apurriéra-y un retruque de les pintures de La Covaciella y
solicitare la so firma nel llibru d'honor del Conceyu.
Nun yera la primer vegada que Jean Marie Auel, autora de “Los
Refugios de Piedra”, “Las Llanuras del Tránsito”, “Los Cazadores de Mamuts” y “El
Valle de los Caballos”, xuntu con “La Tierra de las Cuevas Pintadas”,
qu'acababa de publicar aquel mesmu añu, visitaba Asturies. Nuna visita anterior
tuviera nes cueves d'El Pindal, Tito Bustillo y El Buxu, documentándose, a
fondu, pa les sos noveles y faciendo cientos de semeyes pa lluéu alcordase del
paisaxe.
Jean Marie Auel yera una muyer mui observadora, intelixente
ya mui cenciella, que nun perdía detalle, que tolo fisgaba mirando atropar
hasta la última cosiquina pa depués treslládala na forma como describe les
traces y les andances de los personaxes de la so saga prehistórica.
Na sesta entrega, la
que corresponde con “Los hijos de la Tierra” y “La Tierra de las Cuevas
Pintadas”, Ayla, la protagonista, preparase pa ser curandera y llíder
espiritual de la tribu y esi períodu d'aprendizaxe llévala hasta les cueves que
contienen pintures rupestres, quedando plasmada polos dibuxos y sintiéndose,
entovía, más xunía a la tierra. L'aición d'esta novela trescurre no que güei ye
la Dordoña de Périgord, el sur de Francia, pero Auel almite que, anque non les
nome, munches de les sos descripciones tán inspiraes nes cueves, los montes y
los paisaxes d'Asturies y de Cabrales.
La escritora estadounidense yá ye, de por sí, un personaxe
de novela. Ñacía en Chicago, en febreru de 1936, casóse a los 18 años y a los
25 yá tenía na menos que cinco fíos. Diez años dempués de que se casare, en
1964 entró na organización Mensa, una organización qu'atroca a persones, de
diferentes edaes, con un eleváu coeficiente intelectual. Animada por aquella
xente, apuntóse a les clases nocherniegues d'álxebra, física y electrónica y púnxose a trabayar pa poder siguir
estudiando. El so padre, Neil Solomon, que yera pintor de brocha gorda, nun
pudiera paga-y estudiu denguno, asina qu'Auel entró na Universidá yá casada y
dempués de criar cinco fíos. Acabó llicenciándose en xestión y alministración
d'empreses, en 1976, cuando tenía 40 años.
Al añu siguiente, en 1977, púnxose a investigar sobre la Edá
de Xelu, asistió a clases de supervivencia, ya intentó consiguir facer fueu
colos métodos primitivos, curtir pelleyes d’animales y tallar piedres ensin
ferramienta denguna.
La idea de cuntar ya escribir qué ye lo que-y asocede a una
muyer nueva que, na prehistoria, vive con xente que yera distinta a ella, túvola,
Auel, una nueche fría d'iviernu, en xineru de 1977, pero diz qu’entá nun sabe
d'ónde-y pudo venir. A min nunca me
diere por escribir ficción, tuviera lleendo tola mio vida, pero nunca pensare que
podía escribir una novela. La cosa foi que cuando, un día, me senté y probé a
facelo prestóme tantu que quedé plasmada. Perembargu nun yera consciente de lo
que taba escribiendo, nun estudiare arqueoloxía o antropoloxía pero sabía cómo
y ónde podía documentame. Mialma m’emocioné con aquella hestoria que me vieno a
la mollera, de moldu que tola determinación y el propósitu que, tiempo atrás,
dedicare al trabayu, la casa, la escuela, y el cuidáu de los neños, centrélo na
escritura y, nun periodu de cuatro meses, tuvi escribiendo de 12 a 16 hores
diaries. El mio home yera'l que s'ocupaba de too, pa que yo pudiera escribir.
Depués del ésitu del so primer llibru, Auel yá tuvo perres
pa poder viaxar a Europa y contemplar, por si mesma, les reliquies
prehistóriques. En Cabrales tomó notes pal últimu llibru de la saga, pero dixo
que tamién entamare a interesase por cómo foi que, al cabu de millones d'años como
cazadores, decidimos trabayar la tierra, semar plantes y domar animales pa que
nos ayudaren.
Tou apunta a que Cabrales foi, pa l'autora, el puntu final
d'una fabulosa hestoria y l'entamu d'otra non menos apasionante. Jean Marie Auel,
asina lo dexaba entever cuando foi despidise, al concluyir la visita. Dixo que
viere, pel mundu alantre, milenta cueves y munchos pueblos de montaña pero que
la so estancia en Cabrales fuere ún de los momentos máxicos de so vida. Que
fueren díes que xamás escaecería.
Equí, mientres tuvi en Cabrales, sentíme, daveres, como nel paraísu.
Sentí como si los homes y les muyeres que vivieron na Covaciella, na dómina prehistórica,
entovía siguieren ehí asestándome, tapecíos tres la vexetación y los árboles,
mientres tomaba les fotografíes y les notes que llevo pa casa. Mialma que llevo
un tesoru conmigo, llevo’l tesoru d’Asturies, una tierra y una xente que voi tener
siempres presente y nun voi escaecer nunca na vida.
Valla
ResponderEliminarQue histories más interesantes cuentes.Mariño.
ResponderEliminar