Son munchos los críticos d’arte que conciden n’afitar que la
obra d'Álvaro Delgado nun podría entendese ensin reparar no que, pa él, supunxo'l
so pasu per Navia y l'ocidente asturianu. Un paisaxe ya una xente que, como’l
propiu artista aportunaba en reconocer, acabó
por determinar el so estilu y la so obra como pintor.
Álvaro Delgado foi un artista que nunca se conformó con
asomase al mundu, adicar de la redolada y representar, nos sos cuadros, namás
que la perceición visual. Siempres quixo dir más alló. Siempres pintó movíu por
un impulsu que lo llevaba a entrugase quien yera y por qué taba equí.
Buscando argumentos que retrucaren a eses entrugues tien
boriáu de lo concretu a lo buldrón llegando, inclusu, a lo astrauto, ensin que
por ello dexare de ser reconocible la tema qu'encetaba nel llenzu. La so calidá
como retratista bastaría pa empericotialo como un estraordinariu pintor que nun
pintaba cares, facíales úniques convertiendo les traces físiques nuna alegoría
de lo que llevaben dientro. Pero, por si nun fuere bastante, amás de pintar
retratos, tien tres de si una obra, de gran complexidá, que constitúi una
páxina bien relevante del arte contemporaneu español.
Toa esa obra, mialma, tien un por qué. Esplicase, y asina ye,
que lo mesmo que nun pue concebise a El Greco fora de Toledo, tampoco ye pa
imaxinar la pintura, y la obra, d'Álvaro Delgado, al marxe de lo que, pa él,
supunxo atopase con Navia.
Quiciás nun té por demás alvertir que la rellación d’Álvaro
con Navia nun foi, como quién diz, buscada. Foi un petite del destín. Álvaro
llegó a Miñagón, un pueblu de Bual, en 1954, convidáu por Luís Álvarez, un
marchante arxentín, fíu d’asturianos, empeñáu en que conociere la tierra de los
sos antepasaos. Naquella primer visita namás tuvo diez díes, pero trabó amistá
con José María González, un maestru rural de los d’entós, y escubrió un clima y
un paisaxe que diben ser determinantes na so evolución como artista, pos la rellación
qu'Álvaro estableció con Navia llevólo al puntu de caltener que ser naviegu nun
ye cuestión d'empadronamientu sinón productu d'una sustanza previo y constante.
Encetáu polos
alcuerdos d'aquella primer visita, pol paisaxe y pola xente d’aquellos pueblos,
Álvaro decidió que tenía que volver. Volvió, en 1955, xustu al añu siguiente. Esi
añu escribió-y una carta a José Maria pa que-y buscare onde agospiase y poder
pintar con cierta comodidá. José María atendió los sos deseos y buscó-y
abellugu en Navia, nel barriu San Roque, na cai Campoamor. Ellí tuvo, Álvaro,
el so primer estudiu y ellí empecipió una rellación con Navia, y colos pueblos
vecinos, que convertiríase, llueu, nuna obsesión permanente.
Dende aquel añu, les estancies foron enllargándose de cuenta
que Navia nun yera pa Álvaro, nin lo foi nunca, el típicu pueblu de veranéu
onde folgar, esparcese y reponer fuerces
pal iviernu. Navia yera un llugar d'alcuentru consigo mesmu y col raigañu del
so arte. Yera'l paisaxe, pero tamién la xente. Una xente que-y dio la
oportunidá d'empecipiar una nueva peripecia vital basada en munchos y mui bonos
amigos colos que compartió vivencies ya momentos inolvidables.
La rellación qu'Álvaro Delgado caltuvo con Navia, onde tien
dicho que sintíase como nel paraísu, nun
podría entendese ensin Justín el Neno, bon médicu y tou un personaxe, que punxo
la so motocicleta, y él mesmu, al serviciu del pintor, llevándolo per tolos
pueblos y tolos chigres de la rodiada, dende Cadaveu a la raya con Galicia.
Tampoco podría entendese ensin les tertulies del Café Martínez,
onde se falaba de lo humanu y lo divinu. Y les del Quioscu, El Sotanillo y onde fuere que coincidiere con
Alejandro Sela, xuez de Navia, Manolin de Pelegrina, José Fernández, Quincos,
Tomás el Ferreiro, Gildo d'Ortiguera, Jesús Cartategui, Chele, Paco d’Anleo, Pepe Rego y tantos otros que fixeron
qu'Álvaro se sintiere mui a gustu y queríu nuna tierra que, n’esficies,
consideraba propia.
Álvaro Delgado conoció a Justo Álvarez, Justin el Neno, na
barra del café Martínez. ¿Tu yes
pintor?, entrugó-y Justin; y como Álvaro contestara-y qué sí, amosó
interés por conocer la so obra, por ver
qué yera lo que pintaba. Quedaron de vese, al día siguiente, nel estudiu
d'Álvaro. Y ellí se vieron, de mou qu’Álvaro foi enseñándo-y los cuadros recién
fechos, que yeren, na so mayoría, acuareles.
Justo reparó nel papel: tocólo, mirólo con detenimientu y, a
la fin, atrevióse a entrugar: ¿Qué clase de papel ye ésti? Ye un papel alemán que
llamen “papel caballu”, el meyor qu’hai pa pintar, retrucó Álvaro. Siendo’l
meyor, y alemán, imaxino que sedrá bien caru. ¿Cuántu pue costar una fueya
d’estes?, entrugó Justo de nuevu. Álvaro díxo-y el preciu y, dempués de pensalo
abondo, Justín sentenció mui seriu: Escucha una cosa mio neno… ¡Vaya empléu
que-y das a un papel tan caru!
Álvaro Delgado Ramos, que ñació en Madrid en xunu de 1922, forma
parte de la hestoria de la renovación de la pintura española y, mialma, ta
consideráu ún de los principales representantes del Espresionismu Español.
Firme siguidor de Benjamín Palencia, ya integrante de la Escuela de Vallecas,
foi académicu de númberu de la Real Academia de Belles Artes de San Fernando,
miembru titular de l'Academia Europea de les Ciencies y les Artes y tien cellebráu
esposiciones nes ciudaes más importantes del mundu, nes que colgó cuadros que
reproducen cares ya paisaxes de tol occidente asturianu.
No so obra figuren los probes que pidíen llimosna polos
pueblos, los romeros de les fiestes, los marineros, los cures d'aldega, los
ácrates singulares, les vieyes con paragües… Tou un mundu que llamó: La Crónica
del Navia. Una crónica pintada qu'inclúi persones de carne y güesu como “El
novio de la Cary”, el retratu d'un llabrador naviegu, un rapaz que foi ver a
Álvaro y pidió-y conseyu, de cómo convencer a una aldeana pa que se casare con
él, pos algamaba l’enfotu de que yera lo meyor pa los dos: ella tenía munches
tierres y él muncho ganáu.
Álvaro participaba na vida de cutiu, yera candial, asequible
y mui cercanu. Lo mesmo trababa amistá con un llabrador que-y pidía conseyu que
con un paisanu qu’atopaba trabayando d'albañil. Un paisanu como aquel del
albergue d'Andés, que resultó ser un flaire dominicu col que, dempués de beber
y beber, comprometióse a decora-y la capiya. Y cumpliólo; a la fin pinto-y un
Cristu que, llueu, sedría mui recurrente, pos, a semeya d’aquel d’Andés, hai un
Cristu d'Álvaro Delgado na menos que nel Palaciu del Vaticanu.
Tan integráu taba Álvaro nel pueblu que, alló por 1975, el
Plenu del Ayuntamientu alcordó, por unanimidá, nomalo fíu adoptivu de Navia. Y,
él estimólo en forma. Agradeciólo, con sentimientu, nun solemne discursu, pero dixo
que nun facía falta que lo fixeren fiu adoptivu porque diba yá muncho tiempu que
se consideraba naviegu y en Navia toos creíen que lo yera, sinón de ñacimientu
si de plenu drechu. Álvaro morrió en Madrid al entamu de 2016, tenía 92 años.
No hay comentarios:
Publicar un comentario
Milio Mariño