Antonio Rodríguez García, Antón como tol mundu lo conocía, yera un rapaz de Candás al que yá de neñu se-y daba mui bien el dibuxu, la pintura y facer escultures. Yera un artista, la pena foi que morrió mui ceo, a los 26 años d'edá.
Morrió fusiláu, pol Frente Popular, en plena xuventud y actividá
creadora, dexando la incóunita d'hasta ónde podía llegar la so prometedora
carrera como artista y como escultor.
Antón ñaciera en Candás, el 16 de febreru de 1911, nel sen
d'una familia mui probe. Yera'l quintu de siete hermanos y yá de neñu amosaba
una almirable disposición pa tolo rellacionáu col dibuxu, la pintura y les
artes plástiques. Quien primeru afayó que tenía traces d’artista foi Andrés Benito
Martín, maestru na escuela primaria, que reclamó que fuere pensionáu pola
Diputación Provincial d'Uviéu pos les estrechures económiques en casa d'Antón
yeren munches y con solu dolce años yá tuvo que ponese a trabayar. Entamó, como
mozu de los recaos, nel Casinu de Candás. Dos años dempués, cuando acabó los
estudios primarios, pasó a trabayar de peón d'arbañil col so padre. Pero, nin
la curtia edá nin aquellos trabayos fixeron qu'Antón arrenunciara al so enfotu
por facese escultor. Nun artículu publicáu en
La Voz de Asturias, el 12 de setiembre de 1927, el que fuera'l so maestru,
Andrés Benito Martín, rellataba con gran pesar que'l so antiguu alumnu caminara
escalzu hasta la teyera d’Antromero a buscar magre pa modelar una copia en
barru de la Venus de Milo.
Con malpenes 17 años, en 1928, Antón presentóse per primera
vegada al IV Certame Provincial de Trabayu que se cellebraba na Felguera, con
dos cuadros al oleu y un bustu talláu en piedra, colos que llogró un diploma de
méritu y un premiu en metálicu de cien pesetes. Volvió presentase al certame
siguiente, en 1.930, con una escayola, “Arrapiezo dormído”, na que yá daba
muestres del so personal estilu. Un estilu que llamó l'atención d'un miembru
del xuráu, el pintor Evaristo Valle.
Gracies al pintor xixonés, Antón entró en contautu col
empresariu Alfonso Albo, dueñu de conserves Albo, que lo acoyó como’l so
protexíu y llevólo a Madrid pa qu'ingresara, como alumnu llibre, na Escuela
Superior de Bellas Artes de San Fernando,
arriendes d'asistir, tamién, a les clases de dibuxu que s'impartíen nel
Círculo de Bellas Artes. En Madrid, Antón, conoció a José Francés ya
Sánchez-Heredero, académicu de la Real de San Fernando, prestixosu críticu y
estudiosu del arte asturianu. José Francés y Sánchez-Heredero punxéronlo en manes
de José Capuz y d'otru escultor que, finalmente, sería'l so maestru. Juan
Cristóbal, un artista mui comprometíu cola renovación formal de les artes
plástiques.
Cuenten d'Antón que yá de mui xoven yera de calter bonable, allegre y mui propensu a les chancies.
Gustába-y lo popular. Participaba en toles fiestes del pueblu. Lo mesmo diba
cola banda música que facía amarutes y carroces pa l'antroxu, o ayudaba na
proyeición de películes nel teatru Santarúa. Con venti años colare pa Madrid, a
estudiar, pero tornaba tolos branos a onde ñaciera y pasara la so infancia y
onde sintíase más a gustu qu'en dengún otru sitiu. Y a Candás tornó aquel aciar
branu, de 1936, que sería determinante na so vida. Malpenes facía un mes que
volviere de Madrid cuando españó la Guerra Civil. Candás quedó entós baxo’l
control del Frente Popular y el 2 d'agostu de 1936, ensin motivu aparente, porque
Antón nun se significara con dengún de los dos bandos, nin facía ostentación de pertenecer a
una u otra ideoloxía, foi deteníu ya encarceláu na ilesia parroquial de San
Felix, que facía les veces de cárcel. Nel acta de detención figuraba en blancu
l'apartáu de la so filiación política.
Antón tuvo presu na ilesia San Felix por espaciu de
cincuenta díes y tando ellí llegó a pintar en serviyetes de papel hasta
diecinueve semeyes a llápiz de dalgunos de los sos compañeros de cárcel. Pero
lo más destacau foi que llogró salvar de la destruición el pervalible retablu churrigueresco
que presidía l'altar de la ilesia.
El 21 de setiembre de 1936, Antón foi puestu en llibertá
condicional. Quedó a disposición del Frente Popular, que volvió a reclutalo pa
trabayar nuna serrería. Trabayaba no que-y mandaben pero, nos ratos llibres,
aprovechó para llabrar una imaxe, en madera, de “La Milagrosa”. Foi la so
perdición porque los milicianos enoxáronse enforma, mandaron-y quemala y treslladáronlo
a un campu de trabayu en Muries de Candamo. Unos meses más tarde, el 5 de mayu
de 1937, sería fusiláu en desconocíes circunstancies.
Antón mialma nun se significara con nengún de los dos bandos,
pero debió influyir bastante la so condición d’artista y maruxu y, tamién, que
yera mui relixosu. Eses foron, seguramente, les causes, nun se conocen otres,
de la so inxustificable ya bederre condena a muerte. Fusilaronlo por ser
artista, homosexual y creyente.
Al morrer con namás 26 años, la so obra nun podía ser muncha.
Pero con too, na so curtia trayeutoria artística puen señalase dos períodos. El
primeru arrinca en 1928, cuando Antón constrúi'l so particular estudiu, nun
chabolu de madera na güerta de la so casa, que correspuéndese con una etapa de
formación autodidauta, na que trabaya testerando nel so innegable instintu
escultóricu y la so innata sensibilidá artística. Y un segundu periodu, que
conclúi cola so muerte y ye una fase bien abierta a les influencies esternes direutes,
como correspuende a la formación ya l'información que taba recibiendo.
Dende'l puntu vista de la téunica pue afitase qu'Antón yera
un escultor d'oficiu, qu'apoderaba a la perfeición otros rexistros como la
pintura y el dibuxo, esmolecíu por reflexar la realidá social, la idiosincrasia
y los vezos del so pueblu asturianu.
L'amuesa permanente, nel Muséu Antón, axunta una seleición
de pieces escultóriques realizaes ente 1928 y 1936 y abarca práuticamente la
totalidá de los temes ya les téuniques. Al pie de pieces emblemátiques y
fuertemente espresionistes como “La mio Güela” o “La Señá Isabel”, o iróniques
y escrutadores de la peculiaridá asturiana como “Rapacina”, “Fin de la romería”
o “Antroxu”, el visitante pue atopar obres llenes de gracia, delicadeza ya intimidá,
como les semeyes de “Oscarín” y “Maruxa”, al pie d’otres tan firmes y tan bien
resueltes téunicamente como “Alfonso Albo” y “Evaristo Valle”.
Ye bien triste, pero hai dómines de la hestoria nes que los
artistes avecen a ser escorríos y condergaos pola sinrazón y l'horror d'un
poder irracional que los tarrez porque nun pue controlalos. Y eso foi lo que
pasó con Antón que, a los 26 años, morrió a manes d'unos irracionales verdugos
de los munchos que, desgraciadamente, hubo nos dos bandos de la Guerra Civil.
Naide nunca sabrá
hasta ónde podría llegar la creación artística d'aquel escultor incipiente,
pero la poca obra que tien ehí tá pa ver. Tá nel so pueblu, nel so paraísu
particular, al que tornó aquel aciar branu que sería'l postreru de la so vida.
Milio Mariño: / Del llibru, entá inéditu, Tuvieron nel Paraisu
No hay comentarios:
Publicar un comentario
Milio Mariño