Les sobres de los restoranes

La mio parrafada de los xueves nel programa Noche tras Noche de la RPA.

El mi lio d'esta selmana ye por dalgo que conocí l’otru día y llamóme l’atención. Resulta que per Alemaña y los Países Nórdicos ta trunfando que los Restoranes faigan rebaxes cola comida que-yos sobra. La cosa ye que si llega una hora y nun vendieron tolo que cocinaron, anuncien que lo rebaxen y pónenlo a la venta. Por exemplu, si lleguen les cinco la tarde y a un restorán sobraron-y 30 raciones de pote de berces, pónenles a metá de preciu pa que les merque quien quiera y puea cenar o comeles al otru día.

La idea funciona y ta teniendo muncho ésitu, por eso que los promotores yá tán pensando traela a España. Los chigres y restoranes llanzaríen les sos ufiertes al traviés d'una aplicación que se llama ResQ Club, la xente consultaría les sobres del menú qu'hai disponibles y diría a tiru fixu a pola que más-y pete.

En principiu, hai que tomalo como vien. Los restoranes son mui llibres de facer lo que quieran coles sobres y la xente verá si merez la pena mercar los saldos del platu del día pa comelos pela nueche o al día siguiente. Lo que m’apulmona y me pon de mal humor ye como presenten esti nuevu inventu, que tien pinta de ser otru negociu a cuenta de los que menos pueden y, por supuestu, nun pueden comer, a so hora, lo qu'ufierten los restoranes.

Dicen los promotores que l'oxetivu ye crear comunidaes onde nun se desperdicie la comida. Que, n'Alemaña, hasta 3,5 millones de tonelaes de comida de los restoranes y les cafeteríes acaben cada añu na basoria y qu’eso nun pue ser. Que ye un problema medioambiental qu'hai que solucionar.

Va resultar que ye por eso, pol problema medio ambiental, y non por facer negociu. Seguro que los que llanzaron l'aplicación d'internet y los dueños de los restoranes tán tan esmolecíos polos problemes del medio ambiente y da-yos tanta pena que se tiren tonelaes de comida a la basoria que la ponen de rebaxa y nun la regalen porque eso sería un desperdiciu mayor. Y, enriba, l’eslogan col que lo presenten, ye pa nota: Diz: Menos basoria y más respetu pola bona comida.

Equí'l que nun cuerre vuela. Faen negociu de too, hasta coles sobres de los restoranes. Y, pa más aquello, preséntenlo como dalgo modernu y mui ecolóxicu.

Inda m'alcuerdo de que fai un par de branos llegó un rapaz d'EE.UU a pasar un mes en casa d'un amigu mio y preguntámos-y: Qué tal, como nos ves… Tamos bien o mui atrasaos en comparación col to país. Y el rapaz, un poco cortáu dixo: Faltavos un pocu… Equí, en munchos sitios, inda vos sirven la comida y vos ponen la gasolina nel coche. Yá veis que coses, Pa esti rapaz que te sirvas to la comida y eches la gasolina al coche ye un síntoma de progresu. Como lo de les sobres de los restoranes. Igual.

Milio Mariño