Hominos y Muyerones

La mio parrafada de los xueves nel programa Noche tras Noche de la Radio del Principado, RPA

El mi lio d'esta selmana ye pola fuelga de les muyeres nesti xueves, día de la muyer, que ta a puntu de terminar. Fuelga y día que yo llamo d’hominos y muyerones… Pero esclario, por si acasu, non vaya ser que la cosa s’entienda por onde nun ye. Lo de Muyerones ye pola talla de les muyeres en comparanza cola de los homes. Polo muncho que faen y valen en comparanza con nós. Qu'a la vera d’elles quedamos neso, nunos hominos que malpenes podemos valinos por nós mesmos.

El termino muyerones, referíu a lo que digo, nun soi'l primeru n'usalo. Cunta Angelica Huston, nes sos memories, qu'asina foi como reaccionó Jack Nicholson cuando lu informaron de qu'asesinaren a Indira Gandhi. Dixo Muyerón porque nun se-y ocurrió otra cosa pa definir la talla d'aquella muyer esceicional. D'aquella muyer y otres muyeres menos famoses que nun ye ciertu que quieran ser iguales que los homes, quieren siguir siendo muyeres coles sos debilidaes y tou lo qu'ello conlleva. Quieren ser como son y que se-yos reconoza'l papel que realmente desempeñen. El so papel na sociedá y esi doble trabayu, profesional y domésticu, que de cutiu supón el doble de responsabilidaes de les qu'asumimos nós.

Cuando digo muyerones, nun toi falando de la super muyer nin de la muyer sabelotoo, sinón de la muyer corriente, que trabaya no que puede y amás ye madre y asume la mayoría de les xeres doméstiques como si nada.

Seguru qu’alcordáis esa frase, que güei paez risible pero inda se lleva, que diz que detrás de too gran home siempres hai una gran muyer. Una muyer na solombra, faciendo lo que faiga falta pa que l'home trunfe y sientáse bien. La realidá, más o menos maquillada, sigue siendo asina. Munchos, como yo, dicimos que queremos a les muyeres llibres, feministes, combatives y rebeldes. Y ye ciertu que lo queremos pero llueu acutronamos y dexámosnos llevar. Facemos poco porque camude la vida de les muyeres. Ayudamos en cuatro cosines y presumimos d'ello, pero lo gordo siguen faciéndolo elles.

Güei, nun quiero engañavos, lo lóxico yera que la mio muyer tuviera de fuelga y a mi tocárame llimpiar la casa, dir a la compra y facer la comida. Qué menos que respetar y reconocer el derechu de fuelga. Pero…. ¿Sabéis lo que fixi ? Lo que fixi foi que, pola mañanina, cuando tábemos almorzando dixi mui seriu: Sé que tas de fuelga y respétolo… Respétolo tanto que nun pienso facer d'esquirol. Nun pienso facer lo que, de xuru, fadríes tu. Asina que venga, convídote a comer nun restorán pa que festexes el día de la muyer y llueu, si quies, vamos a la manifestación.

A lo meyor, igual pensáis que soi un cínicu, por dicir estes coses… pero nun sé… Qué sé yo. Lo que, mialma, creo que soi ye un Homín… Unu más como la mayoría de los de la mio xeneración…. Dicimos qu’apoyamos a les muyeres y que tamos d'alcuerdu nes sos reivindicaciones pero, a la hora de la verdá, nun-y echamos güevos. Asina qu’aportuno no que dixi al entamu: Hominos y Muyerones.

Milio Mariño