El Chacachá del Feve

La mio collaboración de los xueves nel Programa de la Radio del Principau, RPA, Noche tras Noche.

El mi lio d'esta selmana ye por esi ferrocarril tan simpáticu qu'unos llamen FEVE, otros Estratéxicu y dalgunos el Chacachá. Nome que seguramente vendrá, pienso yo, de cuando en 1955 les hermanes Fleta popularizaron como canciu del branu, El Chacachá del Tren y otru ésitu, Pénjamo, que tamién sirvió pa bautizar más d'un barriu asturianu.

El Feve pocu tenía que ver col cantar, que como dalgunos alcordarán dicía: Al compás del chacachá / el chacachá del tren /¡que gustu da viaxar / cuando se va en exprés!... Tamién falaba d'un galante portugués…. Pero vamos dexanos de cancios y tar a lo que tamos… Que ye que, al paecer, dientro de pocu va caducar qu’al Feve lu consideren serviciu públicu. Y, eso, significa que munches rutes de cercaníes d'Asturies van cerrales y solu van quedar les más rentables… Que pasarán a ser privatizaes.

Si lu lleven a efeutu supondrá que munchos pueblinos quedarán, práuticamente, aisllaos. Anque la verdá…. Nun sé si esos pueblinos yá tarán aisllaos o mediu desiertos porque si lleemos l’informe que se fixo apocayá plasmamos cola poca cantidá de viaxeros.

No que llamen el 8 asturianu, hai 111, ente estaciones y apeaderos, y la media de xente que xube al tren vais ver… En 24 estaciones nun xuben más de 5 persones al día y n'otres 50 nun pasen de 10. Por eso tán plantegando suprimir los apeaderos de menor usu, reordenar les frecuencies y potenciar los servicios semidireutos. Cuenten que los ingresos son 40 millones d'Euros y que les pérdides anden ente 140 y 150 millones añales.

L'argumentu a favor ye qu'empresta un serviciu y tien que siguir emprestándolo porque ye l’únicu transporte públicu. Pero claru, cuando vemos les cifres entrennos escalfrios -¿Cuántu diréis que cuesta un pasaxeru?.... Pos, veréis: agora mesmu, ca persona que xube a un tren del FEVE paga’l so billete, que sedrá según el viaxe, pero caún d'esos billetes cuésta 16 euros al restu los españoles.

Naide espera qu’esi trenin de dineru…. Pero sí que'l so costu sía razonable.

El Feve, como tal, ye hestoria dende Xineru de 2013, que foi cuando a los ferrocarriles de via estrecha los integraron en Renfe, col aquello de que les perdides yeren munches y la delda de casi 21.000 millones.

De diez años a esta parte, el Feve perdió más de 2,2 millones de viaxeros. Empresta serviciu a conceyos que sumen más de 800.000 habitantes y tien muncho raigañu social pero la sangría de veceros que ta sufriendo precisa un remediu yá.

Nun sé cómo se pue arreglar… Nun sé si con una política comercial qu'atraiga nuevos veceros, una meyor atención al públicu, reestructuración de los servicios y los horarios o que los asturianos nos apuntemos a dalguna escursión en tren dacuando en vez… Pero, daqué habrá que facer pa que nun desapaeza… Pa que sigamos oyendo El Chacachá del tren.

Milio Mariño