Milio Mariño
La mio collaboración de los xueves en Noche tras Noche RPA.
El mi lio d’esta selmana ye pola fiesta que les muyeres tarán celebrando a estes hores en munchos sitios d’Asturies; sobre manera, en Xixón y na Pola de Siero. Ye pol xueves de Comadres, una tradición fondamente asturiana que ta perfechamente inxertada dientro del ciclu festivu qu’antecede a la Cuaresma. Un ciclu qu’entama precisamente esti xueves y sigue col Antroxu y l’entierru la sardina.
El xueves de comadres ye una tradición que tien de protagonistes a les madres, madrines, fíes, afiades y, alredor d’elles, a toles muyeres. Una fiesta que consiste en que les muyeres xúntense pa divertise, ensin la presencia los homes, celebrando asina la so lliberación. Tiense por una fiesta mui antigua, tan antigua que según Constantino Cabal, tendría’l so orixen nes llamaes Compitales romanes o fiestes de les cómpitas, nes que, per unos díes, permitíase lo que llamaben el mundu al revés. Que venía a ser dai la vuelta a lo qu’entós se tenía pol urden natural de les coses. De mou que mientres duraben estes fiestes los esclavos recuperaben la llibertá y organizaben banquetes nos que, amás de comer y beber a mamplén, gastábense munches bromes.
Equí n’Asturies hai dos sitios onde celebren el xueves de Comadres d’una manera especial: En Xixón y na Pola de Siero. En Xixón caltuvieren munchos años esta costume les famoses Cigarreres de Cimavilla, les muyeres que trabayaben na fábrica tabacu, que xuntábense coles sos afiaes y otres muyeres coles que xubíen caminando hasta la Providencia, nes afueres de Xixón, pa pasar ellí la tarde charrando y gastando bromes amás de preparar una bona merienda a base de casadielles y teresites con xocolate o café con lleche.
Na Pola Siero les muyeres xubíen al llamáu Prau Malatu o Prau Picón a merendar bollos preñaos, sidra, y casadielles, ente otres coses.
Esta fiesta, como otres munches, práuticamente desapaeció dúrante la ditadura franquista, yá qu’entós nun había convocatoria de bailes nin festexos públicos y celebrábase na intimidá de les cases. Foi en 1986, cuando la recién nacía Tertulia Feminista Les Comadres, de Xixón, planteóse recuperar la fiesta de les muyeres xixoneses, amestando-y un calter reivindicativu por mediu de la convocatoria de dos premios, Comadre d’Oru y Felpeyu, que son un reconocimientu a quenes lluchen pola igualdá y la dignidá de la muyer, y un despreciu pa los que propaguen y fomenten la necedá machista.
Esti año nomaron Comadre d’Oru a Pilar Aguilar Carrasco investigadora, ensayista, crítica de cine y autora d’un último llibru que titula No quise bailar lo que tocaban.
Asina resumimos güei la fiesta que se celebra esta nueche, el xueves de Comadres… La fiesta de les muyeres. Si vos entrugáis si los homes, los paisanos, nun celebraben denguna fiesta, sábese que sí, que tamién esistió un Xueves de Compadres, dedicáu a los homes, qu'en dalgunos llugares treslladóse al domingu siguiente, que llamaben "Domingu'l Gordu", pero foi una fiesta que duró pocos años y acabó por desapaecer.
La mio collaboración de los xueves en Noche tras Noche RPA.
El xueves de comadres ye una tradición que tien de protagonistes a les madres, madrines, fíes, afiades y, alredor d’elles, a toles muyeres. Una fiesta que consiste en que les muyeres xúntense pa divertise, ensin la presencia los homes, celebrando asina la so lliberación. Tiense por una fiesta mui antigua, tan antigua que según Constantino Cabal, tendría’l so orixen nes llamaes Compitales romanes o fiestes de les cómpitas, nes que, per unos díes, permitíase lo que llamaben el mundu al revés. Que venía a ser dai la vuelta a lo qu’entós se tenía pol urden natural de les coses. De mou que mientres duraben estes fiestes los esclavos recuperaben la llibertá y organizaben banquetes nos que, amás de comer y beber a mamplén, gastábense munches bromes.
Equí n’Asturies hai dos sitios onde celebren el xueves de Comadres d’una manera especial: En Xixón y na Pola de Siero. En Xixón caltuvieren munchos años esta costume les famoses Cigarreres de Cimavilla, les muyeres que trabayaben na fábrica tabacu, que xuntábense coles sos afiaes y otres muyeres coles que xubíen caminando hasta la Providencia, nes afueres de Xixón, pa pasar ellí la tarde charrando y gastando bromes amás de preparar una bona merienda a base de casadielles y teresites con xocolate o café con lleche.
Na Pola Siero les muyeres xubíen al llamáu Prau Malatu o Prau Picón a merendar bollos preñaos, sidra, y casadielles, ente otres coses.
Esta fiesta, como otres munches, práuticamente desapaeció dúrante la ditadura franquista, yá qu’entós nun había convocatoria de bailes nin festexos públicos y celebrábase na intimidá de les cases. Foi en 1986, cuando la recién nacía Tertulia Feminista Les Comadres, de Xixón, planteóse recuperar la fiesta de les muyeres xixoneses, amestando-y un calter reivindicativu por mediu de la convocatoria de dos premios, Comadre d’Oru y Felpeyu, que son un reconocimientu a quenes lluchen pola igualdá y la dignidá de la muyer, y un despreciu pa los que propaguen y fomenten la necedá machista.
Esti año nomaron Comadre d’Oru a Pilar Aguilar Carrasco investigadora, ensayista, crítica de cine y autora d’un último llibru que titula No quise bailar lo que tocaban.
Asina resumimos güei la fiesta que se celebra esta nueche, el xueves de Comadres… La fiesta de les muyeres. Si vos entrugáis si los homes, los paisanos, nun celebraben denguna fiesta, sábese que sí, que tamién esistió un Xueves de Compadres, dedicáu a los homes, qu'en dalgunos llugares treslladóse al domingu siguiente, que llamaben "Domingu'l Gordu", pero foi una fiesta que duró pocos años y acabó por desapaecer.
No hay comentarios:
Publicar un comentario
Milio Mariño