Pa los americanos matar con mandu a distancia ye llegal, intelixente y éticu.

Milio Mariño

La oficina llegal de la Casa Blanca estableció, va un añu, que nun ye contrariu a la llei matar a un ciudadanu estadounidense nel estranxeru, y a los estranxeros nin se discute, si un altu cargu del Gobiernu asegura que l'oxetivu ye una figura que supón una amenaza d'ataque contra los Estaos Xuníos y la so captura nun ye posible.

Quier dicise qu’adiós la presunción d'inocencia, los xueces, los abogaos y tola compaña. Llicencia pa matar y llistu. Basta que lo diga un altu cargu y la persona dexa de ser persona pa ser oxetivu.

Resumíolu perbién el voceru de la Casa Blanca. Dixo que los ataques con drones, aviones non tripulaos, son llegales, éticos ya intelixentes. Faltó-y dicir económicos porque anque l'avión ensin tripular, la estación de control y el satélite salen por 50 millones de dólares, igual salía más caru si sumamos lo que cuesta'l comandu, el fiscal, el xuez, la cárcel, el papeléu…

Los americanos piensen que matando asina too son ventayes pero olvídense d'una cosa: Si mata un avión de xuguete acabáronse les películes… Nun tenemos héroe… Eso nun viende. A lo meyor danse cuenta y entovía tenemos suerte.

Cursu universitariu p'aficionaos al orgasmu

Milio Mariño

Col eslogan "P’aficionaos al orgasmu y principiantes” la Universidá de Minnesota acaba d’anunciar la convocatoria del simposiu “The Female Orgasm” (L'orgasmu femenín), col que pretende que les alumnes y alumnos afayen tolos secretos de la sexualidá de la muyer. La idea ye qu'asistan los que quieran aprender cómo tener un bon orgasmu, los que quieran ameyorar les sos esperiencies, y aquellos que deseyen ayudar a les novies a sentir orgasmos múltiples ya atopar el puntu G.

El seminariu ta programáu pal próximu mes d'ochobre, nel campus de Twin Cities, y tendrá un costu, pa la universidá, d'unos 3.000 euros. Va cuntar cola participación de reconocíos educadores sexuales como’l famosu Marshall Miller y Kate Weinberg, que yá ficieron cursos paecíos n'otres universidaes estadounidenses.

A min paezme una bona idea enseñar a los homes a que dexen satisfeches a la muyeres, pero non me tien pinta de que vaigan facer otru cursu pa que les muyeres apriendan lo recíprocu. Asina qu'una de dos: o yá lo dan por sabíu o nun yos importa un piju.

Mialma yeren otros tiempos pero unu llamenta que, neso, nun tenga nin los estudios primarios, que seya, cien por cien, autodidata.

Nel pozu Maria Luisa

Milio Mariño

Ayeri pasóme lo que me tien pasáu delles veces, que dos noticies, que nun teníen nada que ver, xuntáronse na mio cabeza y entamaron a dar vueltes, una a caballu a la otra. Les dos veníen en negru: una referíase a unos sobres de dineru puercu que cobraron dellos políticos y la otra a unos mineros llimpios qu'empecipiaron una fuelga por que nun saben cuándo van quedar sin trabayu.

Los de la fuelga son mineros de Maria Luisa, una mina que fai 20 años tenía 1.600 mineros y agora tien 208, nun se sabe hasta cuando.

Según los datos que tengo, dende qu’abrieron Maria Luisa morrieron 41 mineros, pero que vaigan cerrar el Pozu nun tien que ver coles muertes nin cola crisis, tien que ver cola incapacidá de la sociedá, y los políticos, pa distribuyir el trabayu y recolocar a los trabayadores cuando dalgún sector se vuelve obsoletu.

El pozu María Luisa, que ye un símbolu na hestoria d'Asturies, sumase a la que ta cayendo. Pero los mineros nun se rinden, nun se conformen nin dicen que ye imposible torceyos la mano a los que gobiernen. Siguen lluchando y alcuérdennos esi preciosu cantar que fala d'un mineru que trai la camisa roxa de sangre d’un compañeru.

James Tracy asesor de Rajoy

Milio Mariño

Buscando d'onde pudiera sacar Rajoy la llinia argumental pa la payasada que fixo ayeri, di un repasu a les notes que guardo, por si puen sirvime pa escribir dalgún rellatu, y atopé esto que quiero cuntavos.

James Tracy ye un profesor de comunicación de l'Atlantic University de Florida que ta provocando munches critiques nos Estaos Xuníos porque diz que la masacre de la escuela Primaria de Sandy Hook pudo ser parte d'una intriga montada arrede pola alministración d’Obama.

Tracy diz que, anque paez que les persones perdieron la vida, nun ta dafechu convencíu de qu'un home armáu pudiera disparar a 20 neños y seis adultos antes de suicidase. Y amiesta que, por munchu que suene indignante que pueda facese esta entruga, él entrugase si'l tirotéu foi, daveres, real.

Como nun ta nin medio convencíu, Tracy tien una teoría. Diz qu'actores en paru pudieron ser contrataos, pola alministración del presidente Obama, pa rodar la masacre y utilizala, depués, con fines políticos.

Qué queréis que vos diga, a mi paezme que Mariano, y los sos asesores, tán plaxando a esti profesor chifláu.

Onintza, l'abertzale que salió flamenca

Milio Mariño

Los que me lleéis davezu pensaríeis, seguramente, que güei siguiría atesterando col cuentu de nunca acabar que ye la corrupción mariana. Materia hai más que de sobra pero yá resulta pesáu falar tolos díes del mesmu tema. Asina que tráigovos un casu que, a min, chocóme un montón y paecióme hasta simpáticu. El de la diputada nel Congresu, pola coalición Amaiur, Onintza Enbeita, que publicó na so cuenta de twitter unes fotos nes qu'apaez vistía de flamenca.

Onintza ye una abertzale convencía que nun s'avergoña de la so afición pol flamencu y el so gustu polos faralaes y los traxes de sevillana. Al contrariu ella mesma lo fai públicu y encárgase d'alvertir que nun se-y ocurra a naide pensar qu'intenta asonsañar o facer risión del flamencu. Tou lo contrario, quier dexar claro que-y gusta daveres, que ye la so pasión. Pasión que considera compatible cola so militancia política y el so enclín abertzale.

Periodista d'oficiu, Onintza ye bien conocía nel País Vascu poles sos dotes de 'bertsolari' (improvisación de versos cantaos en euskera) y suel ser habitual nes fiestes de los pueblos, micrófonu en mano.

La hipertrofia del miembru contable

Milio Mariño

Namás conocese les anotaciones manuscrites, con supuestos pagos a miembros del Partíu Popular, publicaes per El País, dellos medios de comunicación como Telecinco, Intereconomía o la cadena SER, solicitaron informes caligráficos pa saber si la lletra de les anotaciones correspondía al extesoreru del PP.

Según Carlos Belda García Fresca, peritu calígrafu de los tribunales, consultáu pola cadena SER, hai munches traces concidentes, entamos, finales, y formes de cerrar les lletres, que coinciden dafechu en tola so execución, enclín, tamañu, e inclusive presión, colos escritos de Bárcenas.

El peritu consultáu por Telecinco tamién coincide en que la lletra ye mui paecía a la que consta en dellos documentos del procedimientu que se sigue na Audiencia Nacional pol casu Gürtel. Pero'l profesor de macroeconomía y espertu en grafoloxía, José Villacís, consultáu por La Gaceta, atrevese a dir más alló, non solu diz que la lletra coincide sinón que l'autor, por cómo escribe, sufre acidez d'estómagu ya hipertrofia de la próstata.

Los dictames de los calígrafos tienen poca o nenguna validez xudicial pero col datu revelador del profesor Villacís apúrrese una prueba, al mio xuiciu, irrefugable que nun ye l'acidez d'estómagu, sinón l'aumentu escesivu del tamañu del miembru, quier dicise de la pirula, del autor del escritu. Esamínese la cosa del señor Bárcenas y tendrémos el casu resueltu.

Que'l Rei abdique, pero na República

Milio Mariño

Nunca escuché que se glayara, na cai, somos monárquicos. A lo meyor, pue ser, ye que namás m'interesen les manifestaciones de los roxos y la xente de mal vivir. Pero, poles noticies que tengo, tampoco nes otres, nes de la ilesia o los fachas, paez que la monarquía espierte entusiasmu. Solo nos periódicos, nes teles y nes radios escuché infinidá de vegaes que los españoles, nuna mayoría aplastante, somos monárquicos. Eso tamos cansaos d'oyelo. Y, tamién, que somos Juancarlistas, esto ye, forófos de Don Juanito.

Tou lo que dicen que somos los españoles, a esi respeutu, supónsenos porque nunca naide nos preguntó. Pero agora paez qu’esos mesmos medios, y la derecha rancia, montaron una campaña de llimpieza y restauración. Per una parte empiecen a pidir, tímidamente, que'l Rei abdique y por otra traten de convencenos de que la Casa Real nun tien nada que ver nos trapicheos corruptos. Vamos, daqué paecíu a lo que dicía la madre d'un yonqui, que pensaba que les pinchaes nel brazu, del so fíu, yeren porque lo picaren les abeyes.

Lo qu’intento dicir, dempués d'esta parrafada, ye que'l mio pidimientu nun ye que'l Rei abdique, en Felipin, L'Inocente, ye que se convoque un referéndum. Llueu, después, yá veremos si gana, o non, La República.