Cuando Tomás García Sanpedro, qu’exercía de farmacéuticu
pero tenía vocación de pintor, recibió, na so casa de La Pumariega, en Muros del
Nalón, una carta de Joaquín Sorolla, poniéndolo al tantu de que taría
n'Asturies a mediaos del mes de xunu, púnxose tan contentu qu’españó
d'allegría. Daquella, nos alborecieres
del sieglu XX y dende facía yá dellos años, artistes como José Robles, Casto
Plasencia o'l mesmu García Sanpedro dieren prestixíu a La Colonia de Muros. Una
Colonia que naciere col enfotu d’asemeyase a la escuela francesa de Barbizón.
La Colonia llograre axuntar a pintores como los yá nomaos y
como Agustín Lhardy, Cecilio Pla y Alfredo Perea, lliteratos como Manuel Cañete
y Vital Aza y músicos de la talla de Joaquín Arrieta, pero aquella rellumanza viérase
tayada pol fallecimientu d'unu de los sos principales mentores, Casto Plasencia,
y pol fin d'una dómina que se despidió estruéldosamente cola guerra ente España
y Estaos Xuníos y el desastre del 98. Asina foi que cuando, en 1902, Sorolla
llegó a Muros, La Colonia nun yera lo que fuere nun pasáu qu'entá s'alcordaba.
Pero, el pintor, nun venía buscando participar d’aquel ambiente y aquelles
tertulies cultes, lo que quería yera pintar la lluz y la gafura del Cantábricu,
un mar radicalmente distintu del lluminosu y apacible Mediterraneu. Por eso
Sorolla escoyó San Xuan de L'Arena, pa tar cerca de la mar y poder movese polos
cantiles colos llenzos y el so caballete arrecostines.
Joaquín Sorolla ñaciera nel 27 de febreru de 1863 en
Valencia y, nun principiu, cuando entovía yera un neñu, queríen que fuere
cerraxeru. Lo mesmu que’l so tíu maternu, que foi quien s'ocupó d'él, y de la
so hermana Concha, dempués que los padres finaren por una epidemia de cólera.
Pero a Sorolla, siempre-y tiraron más los pinceles, de cuenta que siendo
adolescente empezó a trabayar nel taller d'Antonio García, que depués sería'l
so suegru, coloreando fotografíes. Del taller de fotos pasó a Belles Artes,
estudió pintura y, mientres estudiaba, yá empezó a ganar premios. Dempués, col
so amigu, el tamién pintor Pedro Gil, viaxó a París y conoció de cerca la
pintura impresionista, una esperiencia que lo emburrió a camudar la so forma de
pintar, y la so temática y estilu.
Sorolla llegó a L'Arena siendo un pintor reconocíu. Yá tenía premios y medayes de Belles Artes y
viaxare por toa Europa, principalmente per Inglaterra y Francia. Alcordaba que-y
falaren enforma de la lluz del norte: de los colores del mar Cantábricu, los
cielos grises y el verde de los praos. De mou que fixo casu a los conseyos,
sobremanera los d'Agustín Lhardy y García Sanpedro, y arrendó una casa en L'Arena, cerca del so
amigu, el caderalgu de drechu, Rafael Altamira, con quien charraba, de cutiu,
de la común preferencia polo que llamaben los paisaxes pequeños.
La vida de Sorolla en
L'Arena yera cenciella. Prestaba-y dar paseos en barca, pola ría de San
Esteban, xugaba al dominó na fonda El Brillante o nel Casinu de Muros y
participaba, con gustu, de bones pitances. Pasiaba, de cutiu, por Los Viñales,
un terrén, amiestu de prau y abanu de sable, que s'enfusaba na ría y sirvía pa
que los pescadores ensugaren les redes y descargaren la pesca. Arrodiando la
mariña, el pintor llegaba hasta Bayas y Malabaxada, una playa próxima a la isla
La Deva, bien pedresa y de mal accesu, que yera ún de los llugares que más-y
gustaben. Alternaba aquellos paisaxes cola otra vera del Nalón. Cruciaba la ría
en barca y allegábase hasta l'otru llau pa pintar San Esteban y acabar la
xornada, con García Sanpedro, esfrutando de la sobremesa y xugando al dominó.
Tenía una gran vitalidá, nun llegare, entovía, a los cuarenta años, de mou que
tocáu con una gran boína y el caballete arrecostines nun se llindaba a los
paisaxes del Nalón, boriaba por tola mariña y tien llegáu, inclusu, hasta Avilés,
onde pintó'l puertu.
Sorolla pasó en L'Arena, Muros y Sotu'l Barcu, tres branos.
Tres branos abondantes porque les sos estancies nun duraben un mes, duraben dos
y tres meses, tiempu nel que pintó más de cincuenta cuadros y gran cantidá de
bocetos. N'ocasiones yeren les sos fíes, o la so muyer Clotilde, Clota, como la
llamaba, les que posaben pal pintor. N'unu de los cuadros, quiciabes el más representativu
d'esa dómina: Después del baño, Asturias, foi Clotilde, que yera menuda y
proporcionada, la que-y sirvió de modelu.
La estancia de Sorolla n'Asturies, dende 1902 a 1905, onde
atopó, como dixo, les tonalidaes que'l Mediterraneu negaba-y a la so paleta,
dio como frutu una coleición de cuadros qu'incluyen el yá citáu, que presentó
na esposición de París, y otros como Hórreo de Asturias, La Segadora, Secadero de
redes, El Nalón, Mar y Rocas… Asina hasta 55, que son los que figuren, referíos
a los branos que pasó en Asturies, y puen vese nel muséu que lleva'l so nome.
Pero, non solu'l paisaxe d'Asturies influyó en Sorolla, los
asturianos tamién fueron parte importante na vida y les rellaciones del pintor.
Tal ye asina que l'ataque d'hemiplexía que lo dexaría inválido pa los pinceles
y, tres años más tarde, causaría-y la muerte, sosprendiólo mientres pintaba a
Mabel Rick, esposa de Ramón Pérez de Ayala, nel xardín de la so casa de Madrid.
Pérez de Ayala tenía una gran amistá con Sorolla. Asina
cuenta, el gran escritor asturianu, qu'antecedió a Picasso como direutor del Museo del Prado, lo que
pasó aquel día.
Una fina y templada mañana madrilana del mes de xunetu, Sorolla
pintaba nel xardín el retratu de la mio muyer, reparando yo, al so llau. Yéramos
los trés solos, embaxo d’una pérgola enramada. Llevantóse una vegada y empobinó
pal so estudiu. Xubiendo los pasos, cayó. Allegamos na so ayuda, xulgando que
zarapicara. Punxímoslu de pies, pero nun podía sostenese. La metá esquierda de
la cara conteníase nun xestu inmóvil, un xestu aneñao y tristayu, qu'inspiraba
dolor, piedá y tenrura. Entendimos la dramática verdá; la cuerda, desaxeradamente
tirante, quebrárase.
Según Pérez de Ayala, Sorolla quixo siguir pintando.
Atesteraba, como un neñu mimáu a quien, pal so plasmu, lo contrariaren. Pero, la
paleta cayía-y de la manzorga y la drecha, col pincel más suxetu, malpenes lu
obedecía. Dio cuatro pincelaes, llargues y desesperaes, cuatro glayíos mudos, y
yá dende los estragales de la otra vida, marmulló, "Nun pueo", con
llárimes nos güeyos. Quedó recoyíu en sí, como embaíu nes borrafes de lluz de
la so intelixencia, casi apagada, y de secute, por un soplíu absurdu ya invisible,
dixo: "Qué haya un tontu más, ¿qué-y importa al mundu?"
Sorolla morrió, dos años dempués, el 10 d'agostu de 1923, en
Cercedilla, ensin que pudiera volver a pintar.
No hay comentarios:
Publicar un comentario
Milio Mariño