Un problema son les tases que-yos reclama la Sociedá Xeneral d'Autores, que nel so enfotu recaldatoriu impón unes tases que suponen un frayo económicu de les asociaciones y el mieu d’atopase con una situación que desconocíen y qu'amenacia'l futuru d'estes celebraciones.
Al preciu final de les orquestes hai que sumar un 7%, de cuenta que les comisiones más pequeñes, les que caltienen vivos los festexos de localidaes con pocos habitantes, soporten una carga bien pesada. Tamos d'alcuerdu en que'l canon d'autores ye llexítimu pero tendríen que tener en cuenta que se trata de fiestes populares y atender lo que se-yos reclama dende dellos ámbitos, que ye que roblen convenios onde se contemple un descuentu pa les romeríes entamaes por asociaciones de festexos y asociaciones vecinales.
Otru problema que denuncien los organizadores d'estes fiestes ye'l consumu d'alcohol fora de les barraques oficiales… Ye'l famosu botellón, que fai que los que puxaben polos chigres y daben unes perruques a la comisión ufierten menos dineru.
A too esto hai que sumar les cargues fiscales, les torgues alministratives, la falta de renovación xeneracional nos equipos organizadores y que la crisis amenorgó'l poder adquisitivu de los vecinos…
Y por si nun fuera abondo queda lo último… Agora resulta qu'AENA prohibe tirar voladores nun radiu de 40 kilómetros alredor del Aeropuertu d'Asturies. Yá lo que nos faltaba… Qu'a toles torgues que dicíamos amiesten que tampoco se puen tirar voladores.
Que yo sepa tola vida se tiraron voladores nes fiestes y los aviones siguieron aterrizando en Ranón ensin nengún problema. Nun sabemos a santu de qué salen agora con esta milonga…
Si hai daqué que pon en valor el branu n'Asturies ye la folixa, son les fiestes de prau… Asina que nun queda otra que defender eses celebraciones y a esos colectivos que trabayen de manera desinteresada y con munches dificultaes para sacar alantre les fiestes.
Al paecer, lo qu'apuntaron dende l'aeropuertu, cuando-yos apertaron un poco, faciéndo-yos ver lo absurdu de la midida foi que, n’últimu casu, coordinen el disparu de los voladores pa que nun coincida col vuelu de los aviones.
Menuda idea… A mi ocúrreseme otra meyor…. Que sían los aviones los que respeten la tradición de les fiestes y coordinen el vuelu cola procesión del santu o los festexos del día. Sedría más seguru y más práutico… Nun va tar el paisanu esperando, col volador na mano, a que pase l’avión y el capitán diga: fueu al trapu… Home calla
Milio Mariño
No hay comentarios:
Publicar un comentario
Milio Mariño