Xugar a la guerra en Noreña

La mio collaboración de los xueves nel Programa Noche tras Noche de la RPA

El Mi lio d'esta selmana ye por esos guah.es de cinco colexos, más de doscientos alumnos, que la selmana pasada visitaron el cuartel Cabu Noval, en Noreña, como una actividá dientro del so programa escolar. Una visita que ta dando que falar porque los mandos del Reximientu d'Infantería N 3, Príncipe, dexaron que los guah.es empuñaren armes de fueu y entamaron con ellos un simulacru de combate nel que l'enemigu a bater yeren los yihadistes… Unos cuantos soldaos amarutaos de terroristes, con pañuelos palestinos al pescuezu.

Los guah.es seguro qu'esfrutaron a maza. Nun sé a qué xugarán agora, pero prúyeme dicir qu'antes xugábemos meyor. Yá sé que falando asina falta pocu pa que me convierta nun güelu Cebolleta d'esos que repiten ensin parar… Nos mios tiempos… Cuantayá que lo vengo diciendo… De mou que debo resultar un pocu pesáu. Pero nun soi l'únicu que piensa asina. Son munchos los que comparten la idea de que, agora, los guah.es, nun saben xugar. Refiérome a xugar de verdá porque xugar con un videoxuegu nun ye xugar. Amás, si falamos de violencia, los videoxuegos son violentos que te muerres.

Nos mios tiempos, allá cuando'l diluviu, l'enemigu a bater yeren los indios… Los indios yeren los malos…. Buenu y tamién los rusos… Pero, esos pa los magüetos. Pa los guah.es yeren los indios. Los indios yeren malísimos… Los buenos yeren el Xeneral Cúster y el Séptimu de caballería, que siempre llegaba a tiempu.

El casu que la selmana pasada, quien tomó'l relevu del xeneral Cúster y el Setimu de Caballería foi'l Reximientu d'Infantería Príncipe, que por un momentu convertió Noreña en capital de la Yihad y dexó que los neños xugaren a matar, con armes de verdá, supongo que descargaes.

El primeru en protestar foi Llamazares, que calificó l'actividá d'inaceptable. Depués el grupu parlamentariu de Podemos, faló de la escandalosa imaxe de menores empuñando fusiles d'asaltu. Los siguientes fueron l'Asociación Española de los Drechos Humanos, que consideró "altamente censurable la manipulación ideolóxica a la que fueron sometíos los escolares asturianos nun campu d'entrenamientu militar". Y, p'acabar, intervieno, inclusive, la embaxada de Palestina, que protestó pol usu de la emblemática kufiyya como parte del disfraz carauterizador de los enemigos que los menores teníen qu’esaniciar na so particular representación bélica".

Quiciabes nun foi lo más adecuáu, pero tampoco ye pa ponese asina. Los neños, siempre xugaron a la guerra… Quieran los padres o non, prestayos pola vida. El problema, nesti casu, foi que nun taben solos… Habia mayorones pel mediu y eso queda feu…. Sobre tou porque yeren soldaos profesionales.

Pa min que los que protesten y ponen el glayíu nel cielu enquivocaron la pisada. A los neños nun va pasayos nada por pasar una tarde xugando a la guerra… A lo meyor lo qu'había qu’entrugase ye si paga’l tiru tener soldaos que nun faen otra cosa que xugar como los neños… Y non precisamente una tarde, sinón tolos díes del añu.

Milio Mariño