El mi lio d'esta selmana vien dau por esa propuesta que, a
mediaos d'esti mes de marzu, fixo'l Presidente del Principáu. Eso qu’ellos llamen Área Metropolitana d'Asturies
y nós vamos llamar El Conceyón. Un mega Conceyu qu'arrexuntaría a 29 Conceyos,
de la área central, y al 85 per cientu de la población asturiana.
La idea nun ye nueva, yá tien unos años. Que, agora, la
saquen del bagul y vuelvan ponela sobre la mesa, quiciabes se deba a que Javier
Fernández y los suyos nun tienen otra cosa que facer y alcordáronse d'aquella
aldega de la Galia na que centren les sos andances Asterix y Obelix. Una aldega
que, por ciertu, naide sabe cómo se llama nin onde ta asitiada, pero aguanta
l'asediu de los romanos. Vuélvese invencible, en bona midía, por cuenta d’una
pocima máxica, un bebedizu que bien podía ser la sidra.
Les semeyances son
munches. Sobremanera si tenemos en cuenta qu'unu de los principales
protagonistes ye'l bardu Asuranceturix, qu’acompañase d'una gaita y siempre va peináu mui curiosu.
Esto del Conceyón yá salió a información pública y va tar nos
tablones d'anuncios los próximos dos meses, períodu mientres el cuál van
entamase xuntes, presentaciones y actos col fin de favorecer la participación
ciudadana.
Too mui guapu si nun s'aldovinara imposible y cuntara, amás,
col deveniente de que les zones oriental y occidental d'Asturies podíen
convertise en dos reserves indíxenes que, supongo, seríen les encargaes de
caltener la nuesa cultura y l'enllaz, espiritual, col pasáu.
Yá, pero les árees metropolitanes que s'intentaron hasta
agora, Madrid y Valencia, fracasaron. La
única que, al paecer, funciona a medies, y con una llei autonómica que la
sofita, ye la de Barcelona, qu'acaben de recuperala dempués d'un intentu
anterior fallíu. Total que lleven nello 50 años, ya inda tán empezando.
¿A qué vien, entós, plantegar esa propuesta si toos sabemos que
nengún Conceyu va renunciar a denguna de les sos competencies? Si, resulta que
dalgo más cenciellu, como los Consorcios y les Mancomunidaes fracasen de toes
toes. Nun hai una que funcione. A lo meyor, igual tendríen qu’entamar perhí.
Amás, si llograren eso del Conceyón… que sería'l 85 % d'Asturies… ¿Qué falta
fai un Gobiernu Rexonal y unos parllamentarios autonómicos? Con un Alcaldón tenemos
de sobra.
Pa mi que va tener razón un paisanu, que va trenta años, cuando
entamó la Xunta del Principáu, empeñábase en dicir… Ye que la Conserxería….
D'aquella, yo mialma creía que'l paisanu confundíase y en cuenta dicir
Conseyeru, dicía Conserxe… Pero’l paisanu sabía lo que dicía.
Milio Mariño / El Mi lio selmanal
No hay comentarios:
Publicar un comentario
Milio Mariño