Estos chavales pretenden, al paecer, facer música utilizando partes y pieces sueltes de bicicletes… Instrumentos, de fabricación propia, como'l “timbrafonu” o la biela gamba”, que suenen a dalgo paecíu a lo que faen Les Luthiers'.
Nun duldo de la ilusión y les bones intenciones d'estos rapazos que nun se conformen colos instrumentos clásicos que tresformen en música les idees de Mozart y de Beetowen. Soi cosciente de que, si nun esperimentaremos coses nueves, de xuru que la botella d'anís, la zambomba, l’almirez y el culu la sartén nun seríen instrumentos popularmente aceutaos. Por eso qu’esti camentariu nun pretende, nin muncho menos, poner en custión la música que puea salir del timbre, les bieles o'l sillín d'una bicicleta sinón contribuyir a informar, modestamente, sobre l'usu d'oxetos a manera d’instrumentos, o siquier como elementos puntuales nuna composición musical… Dalgo que nun ye nuevu.
Yá, Erik Satié introduxo, en 1916, fai agora 100 años, dellos oxetos ruidosos, como bocines modificaes, na so composición titulada Parada. Y, escontra la mesma dómina, tamién Charles Ives esperimentó col usu musical de máquines d'escribir, y robló una risondera composición titulada, Machín a Ecriré. En fecha más recién, nel 2001, Claudio Prieto, fixo una composición pa voz y orquesta, na qu'utilizó, per primer vegada, como instrumentu, un grupu de teléfonos móviles. Y Stockhausen llegó, inclusive más alló. Llegó al estremu de componer y entamar un conciertu tituláu Cuartetu pa helicópteros, nel que, como ye fácil aldovinar, intervinieron cuatro helicópteros en vuelu.
Por eso que nun veo mal qu'esos tres rapazos asturianos quieran esperimentar dándonos un conciertu con instrumentos fechos con pieces de bicicletes. Espero que’l sábadu pela mañana la Llaboral centru d'Arte tenga xente a maza.
Yo nun voi dir pero non por nada… Tampoco quiero dar la esculpa fácil de que non se m’arregla. Ye, simplemente, que los mios gustos, en cuantu a música esperimental son mui particulares.
De tolo que vi perhí, barrunto que lo que más diba prestar ye la composición 4,33, de John Cage. Una composición na que l’únicu que s'escucha, a lo llargo de los cuatro minutos trenta y tres segundos que dura, ye’l silenciu. Asina foi interpretada va pocu pola Sinfónica de la BBC de Llondres. Los músicos tuvieron, 4 minutos 33 segundos, colos instrumentos n'alto dexando que'l protagonista fuera'l silenciu.
Eso igual me prestaba, pero son coses míes… Chifladures. Asina que muncho animo pa esos chavales que presenten, na Llaboral, esi conciertu con instrumentos fechos con pieces de biciletes. Avante con ello. Y que si dalguién yos diz que la música faise con instrumentos como’l violín ol pianu, non vos agurriéis… Returcar: Monta equí y da pedal.
Milio Mariño
No hay comentarios:
Publicar un comentario
Milio Mariño