En multes de tráficu… Uviéu gana a Xixón

Milio Mariño

La mio collaboración de los xueves nel Programa de la RPA, Noche tras Noche.

 El mi lio d'esta selmana ye por un informe del Ministeriu de Facienda nel que vienen dicir que l'añu pasáu, en multes de tráficu, Uviéu presupuestó 1,4 millones d'euros más que Xixón. Xixón pensaba recaudar 4,4 millones y Uviéu 5,8. Ehí ye nada, casi mil millones de les antigües pesetes.

Cuesta reconocélo pero, si nos multen ye pol nuestru bien. Siempre pol nuestru bien, anque nos estrañe que nun tramu d'autopista, con visibilidá perfeuta y ensin nada que lo xustifique, onde ponía 120, de sópitu, ponga 80 y d’ehí pa baxo… Seguru que tien esplicación…. Y nun ye la de recaudar porque, pa los Conceyos,  lo primero somos nos.

Polo que diz Facienda, mialma paez que n'Uviéu preocúpense más pola nuestra seguridá y salú que Xixón. A la fin págamoslu,  pero ye un detalle.

Yo, cuando entro n'Uviéu, pela autopista, nun ye que me fadie circular a 50… De magar que toi xubiláu tengo tiempu de sobra… Lo que me da rabia ye que miro a los que van polos otros carriles y toos lleven una cara que muerden… Asina que nun quiero imaxinar la cara que llevaré yo…. Cara de fatu porque, munches veces hasta pienso si nun sedrá más peligrosu dir pendiente del cunta kilómetros… Tenemos tantu mieu a pasanos y que nos multen que casi non miramos pa la carretera. Ente eso y que nun sabes que marcha meter… Si metes segunda vas trancáu… Y si pones tercera afuegues el motor….

Les multes, ye sabíu que non mos gusta pagales… pero dan munches facilidaes… Aumentaron el descuentu. Va tiempo, por pagar una multa antes de 20 díes descontaben el 30%.... Agora descuenten el 50… Y yá veréis…. Llegará’l día qu'en determinaes dómines del añu, los Conceyos fadrán ofertes…. Como los comercios.

Ye una idea pa los de Sahagún de Campos, en Llión, que l’añu pasau, recaudaron en multes de tráficu na menos que 110,75 euros per vecín. Son los que más recauden d'España… Anque, de xuru, munches d'eses multes págamosles los asturianos. Los que vamos a Llión a curar el reuma y algamar bona salú.

 Pa mi que los d’equí y los d’alló deben ponese d’alcuerdo… De llunes a vienres múltennos n'Uviéu o en Xixón y les fines de selmana y en vacaciones, cueyen el relevu los de Llión, que son los campeones.

Les multes que dixi son de radares fixos y móviles…. D’eses l’añu pasáu, punxeron n’Asturies 120.00o… Llueu tan les del cielu, les que pon l’helicópteru, que nun apunten cuentes fueron…. Antes, les del cielu, llevábales Dios, pero agora tamién les lleven los Conceyos… Asina qu’acabóse lo de rezar un padrenuestru…. Agora la penitencia ye n’euros… Y toos salimos perdiendo… Los que son creyentes y los que non.