Milio Mariño
La mio collaboración de los xueves nel programa Noche tras Noche de la RPA
.jpg)
El mio lio d'esta selmana, de la primer selmana entera de 2015, ye que vuelvo a creyer nos Reis Magos. Ríndome ante la evidencia. Nun vayáis pensar que me dio una tontura o que los Reis me traxeron tou lo que pidía. Nada d'eso… Son bien sensatos. Traxéronme lo que correspuende a un paisanu de la mio edá: Tres pares de calcetos, dos calzoncíos y una bufanda a cuadros.
Lo que me fixo volver a creyer nellos vien per otru llau. Vien porque mercar regalos volvióse cosa de maxa. Tas tranquilamente en to casa, teclies la direición d'una tienda online, que ye como mandar una carta a los Reis, entres de forma virtual nesa tienda, cueyes el regalu, ensin coyer nada, méteslo nuna cesta, que nun pesa nin causa nengún engorriu, escribes los datos personales ya bancarios, pulsies una tecla y llistu. A los dos o tres díes apaez un señor nuna furgoneta, que vien ser la versión moderna de venir en camellu, y apúrrete un paquete colo que pidisti. Dátelo ensin que tuvieras que sacar la cartera nin apoquinar en caxa l'importe de lo mercáu. Allá'l bancu s’entienda y pague con un dineru que, en teoría, ye tuyu. Digo en teoría porque anque figure al to nome ye'l bancu quien lu tien y lo manexa.
Yá sé lo que vais dicime, que lo de facese regalos a unu mesmu ye bien antiguu. Sí que lo ye pero non como dixi. Amás nun sé si sabéis la última. La última ye un inventu que llamen wish list, una llista de deseos qu'ellabora un programa informáticu, en base a los tos gustos y les tos aficiones. En base a eso, a los tos llibros preferíos, la to música, lo que faigas nos ratos llibres y coses asina, el programa fai una llista de lo que te prestaría que te regalaren. Vien ser como tener un amigu invisible, pura maxa. Pones los datos, teclies aceutar y yá s'encarga la máquina d'unviate un regalu.
Dicen los espertos que la wish list va marcar un antes y un dempués. Y yo créolo. Namás hai que dase d'alta nel sistema y esperar que llegue'l momentu. La máquina encargase de too, sabe inclusu cuando ye'l to cumpleaños. Y non lu escaez, como suel asoceder colos parientes y dalgunos amigos.
Viendo estes coses nun y’estrañu q’un paisanu de la mio edá vuelva a creer nos Reis Magos. Si lo piensa un pocu, vive fora de la realidá… Yo, mialma lu pensé… Y acabé de confirmalo, ayer mesmu, cuando una señora que tomaba café al mio llau, díxo-y al camareru que los Reis traxéren-y lo que'l médicu-y recetara como lo meyor pa la depresión.
Col envís d’enséñalo, la señora metió la mano nuna bolsa que tenía a los pies… ¿Y qué creéis que sacó?... Eso pensaba yo… Pero nun sacó un frascu pástielles… sacó un perru.
La mio collaboración de los xueves nel programa Noche tras Noche de la RPA
El mio lio d'esta selmana, de la primer selmana entera de 2015, ye que vuelvo a creyer nos Reis Magos. Ríndome ante la evidencia. Nun vayáis pensar que me dio una tontura o que los Reis me traxeron tou lo que pidía. Nada d'eso… Son bien sensatos. Traxéronme lo que correspuende a un paisanu de la mio edá: Tres pares de calcetos, dos calzoncíos y una bufanda a cuadros.
Lo que me fixo volver a creyer nellos vien per otru llau. Vien porque mercar regalos volvióse cosa de maxa. Tas tranquilamente en to casa, teclies la direición d'una tienda online, que ye como mandar una carta a los Reis, entres de forma virtual nesa tienda, cueyes el regalu, ensin coyer nada, méteslo nuna cesta, que nun pesa nin causa nengún engorriu, escribes los datos personales ya bancarios, pulsies una tecla y llistu. A los dos o tres díes apaez un señor nuna furgoneta, que vien ser la versión moderna de venir en camellu, y apúrrete un paquete colo que pidisti. Dátelo ensin que tuvieras que sacar la cartera nin apoquinar en caxa l'importe de lo mercáu. Allá'l bancu s’entienda y pague con un dineru que, en teoría, ye tuyu. Digo en teoría porque anque figure al to nome ye'l bancu quien lu tien y lo manexa.
Yá sé lo que vais dicime, que lo de facese regalos a unu mesmu ye bien antiguu. Sí que lo ye pero non como dixi. Amás nun sé si sabéis la última. La última ye un inventu que llamen wish list, una llista de deseos qu'ellabora un programa informáticu, en base a los tos gustos y les tos aficiones. En base a eso, a los tos llibros preferíos, la to música, lo que faigas nos ratos llibres y coses asina, el programa fai una llista de lo que te prestaría que te regalaren. Vien ser como tener un amigu invisible, pura maxa. Pones los datos, teclies aceutar y yá s'encarga la máquina d'unviate un regalu.
Dicen los espertos que la wish list va marcar un antes y un dempués. Y yo créolo. Namás hai que dase d'alta nel sistema y esperar que llegue'l momentu. La máquina encargase de too, sabe inclusu cuando ye'l to cumpleaños. Y non lu escaez, como suel asoceder colos parientes y dalgunos amigos.
Viendo estes coses nun y’estrañu q’un paisanu de la mio edá vuelva a creer nos Reis Magos. Si lo piensa un pocu, vive fora de la realidá… Yo, mialma lu pensé… Y acabé de confirmalo, ayer mesmu, cuando una señora que tomaba café al mio llau, díxo-y al camareru que los Reis traxéren-y lo que'l médicu-y recetara como lo meyor pa la depresión.
Col envís d’enséñalo, la señora metió la mano nuna bolsa que tenía a los pies… ¿Y qué creéis que sacó?... Eso pensaba yo… Pero nun sacó un frascu pástielles… sacó un perru.
No hay comentarios:
Publicar un comentario
Milio Mariño