Un grafiteru de 72 años fai lo que un faen les autoridades y manda la llei qu’hai que facer.

Milio Mariño

José Gallego, un mecánicu xubiláu, de 72 años, que vive en Aspe, Alícante, foi pilláu con un esprái na mano y xubíu a una escalera tachando los símbolos franquistes de la ilesia del so pueblu.

Al policía que lu detuvo intentó esplica-y que nun yera un gamberru, que taba, namás, aplicando la llei qu'obliga a retirar tolos símbolos franquistes. Una llei que, na so opinión, primero l'alcaldesa del PP y agora l'alcalde del PSOE, decidieron nun aplicar porque tienen mieu a la ilesia.

José Gallego ta agora imputáu por un delitu contra'l patrimoniu histórico y cultural y enfréntase a una pena que puede dir d'unu a tres años de cárcel y a una multa gorda por daños. Nel so descargu diz que n'Alemaña va tiempu que yá nun hai nengún símbolu de Hitler y pregúntase por qué España ta llena. Por qué esa resistencia.

Nun puedo tar más d'alcuerdu contigo José, paezme perbién que tachares la referencia al franquismu y respetares la cruz como símbolu de los cristianos. Yo tamién me siento traicionáu por toos esos cobardes y vividores, d’esquierdes y de dereches, que tienen mieu d'aplicar la llei.