Llamen Halloween a la fiesta celta del Samain

Milio Mariño

La mio collaboración de los xueves nel programa de la RPA, Noche tras Noche.

El mi lio d'esta selmana ye qué nun pueo evitalo, ca vez qu’oigo dicir Halloween ruco los dientes de rabia. Nun hai cosa que más m'ofienda qu’esa pallabra y tolo que tan montando a costa d’una fiesta que forma parte de l’ancestral tradición asturiana, heredada de los celtes.

Lo que los americanos llamen Halloween, equí primero llamóse Samain y llueu los difuntos. Yera una de les fiestes más importantes, pos con ella celebraben el fin del branu y facíenlo con un gran amagüestu, y sidra duce, cerca d'una foguera, alredor de la cuál xuntábense los vecinos, a comer castañes y beber sidra, teniendo curiáu de dexar dalgo de sobra pa que tamién pudieren comer y beber los difuntos.

La protagonista d’esa nueche, de la nueche de difuntos, yera La Güestia, que salía de procesión coles almes en pena y llevaba un güesu humanu encendíu a mou d'antorcha.

Polos difuntos, lo qu’agora llamen Halloween, amás de comer castañes, beber sidra y xuntase alredor d’una foguera, pa cuntar hestories, había la costume d’asitiar calabaces, allumaes con una vela, nos cruces de los caminos y nes fasteres de los montes cercanos a les aldegues.

Tou eso foi perdiéndose porque taba prohibíu y persiguíu pola ilesia. Una ilesia qu’agora, al paecer, diz pocu, o nun diz nada, de la patochada yanqui y de toa esa parafernalia que ta invadiendo los chigres, les discoteques y los hoteles. Pero, lo más grave… Lo grave d’averes ye que nes guarderíes y nes escueles, tan faciendo creer a los neños que ye una fiesta que nació nos Estaos Xuníos, en cuenta dici-yos que vien de los sos güelos ya bisagüelos.

Esmolezme la capacidá de contaxo que tienen eses bobaes y la facilidá con que prinden y son aceptaes. Y esmolezme, más entovía, que la nuesa realidá colos muertos fuere banalizándose hasta'l puntu de que l'enclín actual ye a separtanos d'ellos, lo más posible, y estremalos de la nuesa vida social, anque caún lleve a los suyos por dientro.

A los muertos yá naide yos guarda llutu, nin se-yos tien demasiáu respetu, nin se procura nun falar mal d'ellos. Neso, mialma paez que toos camudamos bastante… Y hai qu’acéutalo… Lo que nun aceuto ye que les discoteques, los hoteles y los Centros Comerciales utilicen a los muertos como pretestu pa facer negociu organizando unes fiestes que maldita la gracia y el sentíu que tienen.

Ta claro que caún pue facer lo que-y pete. De toles maneres nun quedaría tranquilu si non vos dixera dalgo que forma parte de la vieya tradición asturiana y que, de xuru, nun saben los promotores del Halloween. Estos díes, agora polos difuntos, que non se-y ocurra a naide barrer pa escontra fora de casa, pos dicíen los celtes que quien barría asina, barría la felicidá y atrayía la desgracia.

Tais avisaos. Si dalguién lo toma por una bobada allá él… Más bobada sedría perder la felicidá por nun facer casu a lo nueso y enfotase nesi antroxu de payares qu’inventaron los yanquis.

Ente lo Real y lo auténticu

Milio Mariño

La mi collaboración de los xueves nel Programa Noche tras Noche de la RPA.

El mi lio d'esta selmana ye d'axenda, téngola petada. Toi que nun doi abasto. Anque buenu, la verdá ye que naide me convidó a nengún de los actos Reales que se celebren n’Uviéu… Casi meyor porque, yo, va tiempu que tenía pensáu dir a los otros, a esos actos que nun son Reales pero si mui auténticos. A los que tienen la emoción y el ciñu de lo que bilta de la corada y la gran ventaya de que nun esixen vistise de gala.

Agora, va pocu, acabo volver del Corredoria Arena, que bien ser el Madison Square Garden de los probes y lo contrariu que’l Campoamor.

Nel Corredoria Arena entréguense los premios de la Fundición Príncipe d'Astucies. Que son los Premios de verdá, los más merecíos, los que la xente da a los que son morralla, yá que por si non lu sabéis, esta selmana conviven n'Uviéu, dos mundos bien distintos: el de palaciu y el de pueblu.

Ensin despreciar a los del premiu Real, que seguru que la mayoría merécenlo de sobra, yo apuntéme a los premios auténticos, a esa gala alternativa que tien nominada a Ana Mato, como candidata al premiu de la Concordia porque en pidir la so dimisión toos concordamos; a José Ángel Fernández Villa, como candidatu al premiu de les Artes, pol arte que punxo pa esconder una fortuna; y a Javier Rodríguez, Conseyeru de Sanidá de la Comunidá de Madrid, como candidatu a los premios d'Investigación, porque merez ser oxetu d'investigación que, nun país con un 25% de paru, dalguién tan faltosu y babayu diga que tien la vida resuelta.

Pero la mio axenda nun creáis que s’acaba equí. Tamién toi apuntáu a les marches pola dignidá, la mesa reonda cola presencia de los principales ideólogos de Podemos, que güei mesmu yá tuvieron nel Corredoria Arena…. Y al ensame de xuntes temátiques sobre asuntos como'l tratáu de llibre comerciu, la defensa de los servicios públicos, el neolliberalismu y la educación, la política migratoria o'l drechu a decidir.

Y, enriba, por si nun fuere bastante, mañana vienres, día de la ceremonia de los Premios Príncipe, tocame madrugar. Tocame porque los participantes nel foru social van van salir a primer hora, en cinco columnes, dende Xixón, Avilés, La Pola Siero, Llangréu y Mieres, en dirección a Uviéu, pa xuntase a les dos y media la tarde, nel Campu San Francisco, comer cualquier cosuca y dempués, a eso de les cinco, sumase a la protesta na plaza La Escandalera.

Si entovía me queden fuercies pienso rematar la xugada, después, pela nueche, asistiendo al conciertu pola dignidá que va celebrase na Llosa la Renfe.

Nun sé si podré con tou, pero tolo que dixi tien la ventaya de que nun precises que naide te convide nin que gastes un ris. Pues dir por to cuenta y, si te peta, cola ropa de tolos díes.

Pola xeta o con tarxeta

Milio Mariño

La mio collaboración de los xueves en Noche tras Noche RPA

El mi lio d'esta selmana vien de comparar dos estafes: una de 6000 euros y otra de 15 millones. Yá sé que la diferencia, en dineru, abulta mui grande, como 20 viaxes d'ida y vuelta a la lluna, pero lo que más me llamó l’atención ye qu'hai otra diferencia entovía mayor pos la estafadora de los 6000 euros yá ta na cárcel mientres que los qu'estafaron 15 millones siguen perhí de comedia, chungándose de toos nosotros.

La hestoria de como ye qu’a unos estafadores nun yos pasa nada ya otros métenlos na cárcel esplicase dependiendo colo qu’estafes. Si estafes con tarxeta nun pasa nada, pero si lo faes cola xeta, anque seya más arriesgáu y menos gananciosu, tien un castigu mayor.

Cola xeta estafaben dos muyeres de Xixón, una de 80 años y la so fía, de 42, que fueron deteníes por atropar una delda por importe de 6.000 euros en cuatro establecimientos hosteleros onde tuvieron comiendo y cenando a diariu mientres casi cinco meses, ensin pagar un ris.

A esos 6000 euros hai qu'amestar 1000 euros más qu'estafaron a un confiteru de Llugones que-yos tuvo suministrando pasteles, bollos y empanaes lo menos un mes.

Habrá quien se ría y piense qu'estafar pola xeta nun tien méritu, que pue facelo cualquiera, pero ye más complicáu que facelo cola tarxeta.

Estafar pola xeta supón tener qu'apurrir garantíes y credenciales, cosa que les dos muyeres facíen por partía doble. Facíenlo de palabra diciendo que taben reformando’l so chalé y preparando la boda de la más nueva, que se diba a casar con un señor que primeru camentaron que yera abogáu, dempués que trabayaba n'Arcelor y a la fin atribuyéron-y l’oficiu de Conceyal en Xixón. Que, pa m’idea debió ser lo que les perdió.

Amás de dar garantíes de pallabra tamién les daben de vista y de tratu pos según los estafaos, yeren educaes, simpátiques, diben bien vistíes, peñaes de peluquería y portando bolses de firma nes que, supuestamente, guardaben compres percares. Y pa dai más aquello al asuntu, al paecer non se privaben de nada, comíen a la carta y acababen les comies con un café y un chupitu.

Como ta mandáu. Hai que tener inxeniu y bon gustu anque seya pa estafar una comida o un trocín d'empanada. Non como esi ex Ministru y ex Gobernador del Bancu Mundial que salía tocando una campanuca, a lo fatu, y nun día fundía en discoteques lo qu'estes probes muyeres estafaron dúrante cinco meses, pa poder esfrutar d’un platu comida.

Yá se que nun tienen esculpa, nin entá sabiendo que vivíen nun pisu nel que-yos cortaren la lluz y el teléfonu porque nun teníen con qué pagalo. Esculpa nun tienen, pero que me perdonen los estafaos porque tampoco m’atrevo a condenales, y menos, a meteles na cárcel. Primero qu’elles tan toos esos manguanes de Bankia qu’estafaron cola tarxeta y siguen estafándonos cola xeta, pa mayor escarniu.

La hierbabuena y la mala hierba

Milio Mariño

Por lo que vamos viendo, aquí y allá, parece que nuestros fiscales saben mucho de agricultura y de ganadería muy poco. En asuntos de ganado, y ganadería de engorde, andan bastante flojos. Pero, como agricultura y ganadería suelen ir juntas, ellos creen que compensan la carencia con un conocimiento de la botánica que les lleva a distinguir, al primer vistazo, si alguien cultiva lo prohibido, por más que intente camuflarlo entre las lechugas, los tomates y los ajos puerros.

Para eso están los fiscales. Para generar confianza y perseguir el delito, en bien del interés público. Ese es el objetivo. Y, para demostrar que no se arredran y lo mismo inspeccionan un huerto doméstico que el huerto de un partido político o el jardín Real de palacio, ahí tenemos a la Fiscalía del Principado, que pide dos años de cárcel, y el pago de una multa de 2.075 euros, para un avilesino al que acusa de cultivar, en su huerto, quince plantas de marihuana. Un éxito del fiscal y la policía, que apuntan como agravante que, además de dedicarse al cultivo que la policía intervino el 20 de noviembre de 2011, el acusado también se dedicaba a la conserva hortofrutícola, pues tenía cinco frascos con cogollos de la misma sustancia, que pesaron 128,07 gramos y eran de una riqueza que no llegaba al diez por ciento.

Pasando por alto otras consideraciones, quizá más relevantes, es fácil llegar a la conclusión de que el presunto agricultor no era, ni mucho menos, un hacha cultivando su huerto. La calidad del cultivo, cuya riqueza no llegaba al diez por ciento, deja bastante que desear. Pero la fiscalía no lo acusa por eso. Lo acusa porque sostiene que la marihuana no era para uso particular sino para venderla a terceros, circunstancia que le proporcionó un beneficio de 300 euros, que le fueron incautados.

Mirándolo por el lado práctico, analizando el precio de las hortalizas, cabe la sospecha de que el fiscal reproche, al acusado, que podría haber obtenido la misma ganancia, o más incluso, con cualquier otro cultivo. El argumento tiene su lógica. Pero, también, su peligro, pues, hace solo unos días, un vecino de Molleda pidió soluciones para frenar el saqueo que hacen los usuarios de la ruta del agua con algunos huertos que lindan con ese trazado. Lo cual pone de manifiesto que la vigilancia policial y el empeño de los fiscales, en materia de huertos, no se lleva a cabo con el mismo celo en la vecina Corvera que en la villa del Adelantado.

Son casos distintos, pero ya quisiera el vecino de Molleda que vigilaran su huerto lo mismo que vigilaron el otro. Y, en esto, volvemos a lo de siempre, a que se observa una mayor dedicación, de los fiscales y la policía, en materia de cultivos, ya sea de plataformas, grupos antisistema, o esa hierba que llaman María, que por lo que se refiere a los robos.

Esa es la historia. Que todos los huertos, incluidos los que cultivan la hierba que creemos inofensiva, deberían vigilarse por igual. Si se vigilaran todos, si se pusiera el mismo empeño, en unos que en otros, no se daría la paradoja que estamos comentando. No resultaría lo que parece, que la policía y los fiscales vigilan y se ocupan más de la hierbabuena que de la mala hierba.

Milio Mariño / Artículo de Opinión / Diario La Nueva España

Asturies tien quince pueblos en venta

Milio Mariño

La mio collaboración nel orograma Noche tras Noche RPA

El mi lio d'esta selmana son esos pueblos d'Asturies, na menos que quince, que tienen puestu'l cartelu se viende. Quince pueblos en venta, mialma, paecen munchos pero nun son toos porque, según l'Institutu Nacional d'Estadística, en tol territoriu asturianu hai un total de 1.582 núcleos deshabitaos, de los cuálos 677 tienen entidá de pueblu y el restu son lo que llamen nucleu disemináu.

La primer entruga que nos facemos ye: ¿Quién pue vender un pueblu?. Y la respuesta abulta mui fácil: el dueñu. Pero como eso yá lo sabíemos, volvemos a entrugar lo mesmu, dando-y la vuelta: ¿Cómo llega unu a ser dueñu d’un pueblu?

Ehí la cosa ye más complicada. Depende la dómina. Hubo dómines, en tiempos de la reconquista, que la propiedá de los pueblos llográbase como recompensa por da-yos machete a los árabes. Dempués, fuimos evolucionando. Pasamos del garrote y la espada a les pistoles y les bombes, pero'l métodu siguió siendo’l mesmu: la fuerza. Agora somos más civilizaos… Agora, dende va pocu, la propiedá d'un pueblu, de les cases y los terrenos, depende de la fuerza del dineru.

Con too, mercar un pueblu nun ye caru, ha-ylos por menos de lo que cuesta un pisu. Los precios van dende 60.000 euros hasta tres millones, que ye lo que piden por un pueblu de 475 hectárees, con doce cases, que ta nun llugar preciosu, mirando a la mar y a mediu camín ente L.luarca y Cuideiru.

Polo que sabemos, los potenciales compradores d’esos pueblos son, na so mayoría, estranxeros del norte: Finlandeses, islandeses, noruegos, suizos y, últimamente, rusos. Persones d'ente 30 y 50 años que tienen interés por mercar un pueblu, pa venir a vivir y dir arreglando les cases pa los familiares y amigos o pa dedicales al turismu rural. De mou que munchos, o dalgunos, pueblos abandonaos ye mui posible que vuelvan a tener xente.

Sedría una gran noticia si nun fuera qu’esos pueblos nun van volver, nunca, a tener la xera que tuvieron. Quiciás tengan xente, pero nun tendrán vida. Colo cuál aquello de beatus ille que dicía Horaciu, lo de dichosa vida la de quien estremáu de los negocios vive nel campu, alcuérdanos que, yá entós, nun se tenía por negociu dedicase a criar vaques o semar maíz y pataques. Naquellos tiempos, los que diben al campu yera pa pasar unos díes… Como estos d’agora, que si quieren mercar un pueblu, ye por facer turismu o porque son profesionales que gracies a les nueves tecnoloxíes puen trabayar dende les sos cases por mui lloñe que tean.

Tamién habrá, seguramente, dalgún soñaor… Dalguién que vuelva al pueblu por una cuestión casi espiritual… Pero pa coyer la fesoria o'l gadañu… Pa eso, de xuru que nun vuelve naide. Asina que dellos pueblos igual vuelven a tener xente pero los praos y les tierres van siguir abandonaos como los vemos agora.

Nin Carne de pita nin de cañón: activu conxeláu

Milio Mariño

La mio collaboración nel programa Noche tras Noche, de la RPA

El mi lio d'esta selmana trata d'esa obra escrita por Maxi Rodríguez, Carne de pita, que fai 14 años foi película y agora, per San Mateo, estrenóse nel Filarmónica como obra de teatru que reflexona, en clave d'humor, sobre la complicada situación de les cuenques mineres, la so falta de futuru y la dependencia, de munches families, de les pensiones de los xubilaos.

Catorce años dempués que s'estrenara la película, la situación, lloñe d’ameyorar, foi a peor. Cada vez son más los vieyos que caltienen a les families y llogren que nun pasen fame a base de compartir con elles la so escasa pensión. La cosa ye tan preocupante que nun sé yo si por qu'aquella película foi premonitoria o porque sentó cátedra y dio pistes sobre qué facer colos vieyos cuando la palmen, y los que tan alredor dependen de la so pensión, que la fórmula corrióse como la pólvora y llegó hasta Paco León, que volvió a repetir l’argumentu de Carne de pita na so esitosa Carmina y Amén, película que tamién recurre a esconder la muerte del vieyu, nesti casu, pa nun perder la paga de navidá.

Por si lo escaecieron, Carne de pita trata d'un mineru xubiláu que'l mesmu día de la boda de la so fía muerre nun puticlub d’un ataque al corazón. Una traxedia qu’emburria a la familia a guardar la muerte en secretu yá que de la pensión del vieyu dependen na menos qu'una hermana, tres fíos, dellos nietos y una nuera.

El casu que dempués de muncho discutir, la decisión que tomen ye meter al vieyu, yá cadabre, nel arcón de los conxelaos. Y, anque lo paeza, la idea nun ye nueva nin orixinal. Vien ser la versión doméstica de lo que llamen Crioxenia. Caltener un cuerpu, conxelándolo, pa resucitalo nun futuru. Anque, nesti casu, falando de la película, quiciabes porque usen la versión probe del inventu, nun conxelen al vieyu como quien conxela una ñocla. Non lu faen pa desconxelalo depués. La idea ye mantenelo tiesu, con calter indefiníu, pa siguir cobrando la pensión.

Yá hai empreses que se dediquen a eso, a conxelar vieyos. La más grande ye Alcor, que nes sos instalaciones d’Arizona tien a 106 persones conxelaes y a otres 938 en llista d’espera pa que les pongan a 196 graos baxo cero cuando llegue'l momentu.

Eso si que pon la carne de pita a cualquiera. Sobre tou al ministru encargáu de pagar les pensiones porque un vieyu, metíu en nitróxenu llíquidu, a 196 graos baxu cero, nun quier dicir, nin muncho menos, que te muertu dafechu y sía llegal dalo de baxa na Seguridá Social. De mou que lo que faen n’Arizona podría ser una solución pa los vieyos, les families, Asturies y España entero. Los vieyos dexaríen de ser carne de cañón y convertiríense nun activu conxeláu, de rentabilidá inmediata y perspectives de futuru.

Asturies y la tercer guerra (Mundial)

Milio Mariño

La mio collaboración nel programa de la RPA Noche tras Noche

El mi lio d'esta selmana ye polo que dixo'l Papa…. Por eso de que ta preparándose la Tercer Guerra Mundial… Una guerra cuyes causes, al paecer, son l’afán de dineru y poder, el fanatismu relixosu y la industria armamentística.

Cuando'l Papa lo diz ye que dalgo sabrá. El Papa tien llinia direuta con Dios y Dios manda muncho. Manda más que los ricos. Home, nun sé si tantu como pa que lo consideremos omnipotente, pero eso vamos dexalo porque si non entamaríemos a vueltes con coses como: ¿Qué pasaría si una fuerza irresistible actuara sobre un oxetu inamovible? Y esi ye un lio que supera, con muncho, los mios llíos selmanales.

Güei, lo que toca ye analizar lo que dixo'l Papa y, sobremanera, les causes que, según él, motivaríen una tercer guerra, xusto cuando se cumplen cien años de la primera.

Llama l’atención que los Papas del mundu, el Papa Francisco y el Papá Obama, coincidan en qu'una de les causes principales d'esa posible guerra, ye l'amenaza del Estáu Islamista. Amenaza que, pa nós, nun ye tal pos los asturianos somos los únicos que, por decisión d’Alá, Mahoma y los representantes llegales, de dambos, na tierra, nun tamos amenazaos.

Too vien de que los Islamistes reclamen lo que, dicen, foi de los güelos: mediu mundu, incluyía tola Península Ibérica, menos Asturies y una rayina de costa, un cachín de nada, que va dende Tina Mayor hasta’l Bidasoa. Que nun s’empalmen los de Bilbao diciendo que'l País Vascu tamién queda fora, que ye mentira, la única comunidá que se salva ye Asturies.

Por eso, por si sirve de dalgo nesti mundu globalizáu, aportuno en qu'esa que s’anuncia, en casu que se produxera, nun sedría la nuesa guerra. Nin el Papa, nin Obama nin naide van poder convencenos de que los asturianos tamos amenazaos como cualesquiera. Los islamistes yá lu dexaron claro, Asturies ye casu aparte nel so aquello por dominar el mundu.

Atestero tanto nesi detalle que diréis qué a ónde quiero dir a parar… Que si quiero dicir que deberíemos prescindir de los soldaos acuartelaos en Cabu Noval? N'absolutu. Los soldaos tan bien onde tán, pero les autoridaes deberíen dase cuenta, yá mesmu, de que nun procede siguir mandándolos a Turquia, Iraq o Afganistan. Nun ye lóxicu que los islamistes nos esclúyan de les sos conquistes y que nós sigamos mandando soldaos, dende la Pola de Siero, pa provocalos y que camuden de paecer.

Yá sé qu'Obama apretará lo suyu. Sobre tou porque tien envidia de que los asturianos síamos los únicos que nun tamos amenazaos. Pero que se xoda. Que faiga les coses bien. Lleven cien años intentándolo y, entovía, nun fueron capaces de consiguir una victoria como la de Cuadonga. Nin con drones nin sin drones. Asina que dalguién tendría que dici-y al Papa Francisco, a Obama, Rajoy y la ONU, que nos borren d'esa tercer guerra. Que los asturianos yá cumplimos de sobra.