Encierru, o encerrona, sexual

Milio Mariño

Hasta ónde yo sé y tengo entendíu, dalgunes moces van a los Sanfermines y faen lo que-yos da pola gana, lo que vemos nesa semeya, como una parte más de la fiesta. El casu que lleí nun sé onde qu'una asociación feminista quexase d'acosu sexual, diz que hai paisanos que s'aprovechen y meten mano a les moces, que de xuru nun los conocen nin yos dieron permisu pa masuñales.

Toi mui lloñe de los que piensen que si una moza s'esnuda nuna fiesta, o si lleva un escote hasta l'embeligru o una minifalda que vien ser como un cintu, ye que va pidiendo guerra y toca-y ser responsable y pechar colo que-y pase. Tarrezo a los que piensen asina. Pero, tampoco me paez qu'eses moces que vemos nos Sanfermines seyan víctimes nin tean siendo agredíes sexualmente. Asina que toi metíu nuna rodiella que non m’aclaro. Y, cuando lo camiento, coles mios amistaes, danme por parte y parte, per tolos llaos.

Non me gusten los toros pero, a la fin, metíme nun encierru del que, toi seguro, voi salir corniáu.

A los estafaos poles Preferentes, agora estáfenlos a multes

Milio Mariño

Los que perdieron los aforros de tola vida, pol timu les Preferentes, y nun-yos quedó otra que manifestase contra los banqueros y los políticos, enfréntense, agora, con otru problema: coles multes que yos ponen por protestar.

Una muyer de 81 años qu'utiliza andador acaba de recibir una multa por coacciones. Otra señora, que se punxo delantre d'un coche de policía que tresportaba a trés conceyales, foi multada por causar desordes graves. Ella diz que lo taba grabando col móvil. Pero cayéron-y 600 euros.

La cantidá de multes por fechos asina, inclusive por facer sonar una llueca o una bocina d'eses que s'oyen nel fútbol, algama en Pontevedra a casi dos mil persones. Lo cuál nun dexa de ser allucinante porque, que te quiten los aforros yá ye pa lliate a morraes col primeru qu’atopes pero que, enriba, non te dexen nin protestar ye pa coyer una escopeta y cargate al que protexe a los lladrones, sía políticu o guardia municipal.

Si l'alternativa son les dos víbores, Esperanza y Rosa Diez, ye meyor que nos desgobierne Rajoy

Milio Mariño

Yo lo que diga'l partíu, lo que diga la morena en diferíu, dicen los ministros y altos cargos del PP, cerrando'l güeyu drechu, torciendo’l focicu y apertando'l culu, cada vez que-yos entruguen polos sobresueldos en negru. Tienen mieu de que, nuna d’estes, se-yos escape'l marrón que lleven dientro y chispien el calzoncíu. Hai quien diz, inclusu, que Rajoy aveza a quitalo como la xente quita'l papel de les madalenes.

Non m’estraña. Basta ver la cara que pon. Con esa cara ye como los periódicos de media Europa lo sacaron ayer en primera páxina. Ta vistu que, al entamu, dábemos pena, depués pena y vergüenza y agora somos la risión.

Lo lóxico sedría que marcharen toos pa casa y convocaren elecciones. Nun les van convocar. Saldrá Floriano, Pons o Cospedal diciendo que, pa qué van convocales. Que nun paga’l tiru, nin tien gota sentíu, porque seguro que díbemos volver a votar otra vegada a los mesmos… Y neso, pue que lleven razón. A les males ye meyor que nos desgobierne Rajoy que les dos víbores que tan al acechu. Esperanza y Rosa Diez.

Un Pazo que sigue nel pozu la memoria olvidada

Milio Mariño

Tou lo que podría importame de El Pazo de Meirás ye la casa na que vivió Emilia Pardo Bazán. Lo demás daríame repelús visitalo, seguro que sigui goliendo a cuartel y al fedor fascista de “Paca la culona”, que yera como llamaba Queipo de Llanu al xeneral ferrolanu. Asina que tantu me da que me da lo mesmo que la Xunta y la Familia de Franco afitaren los horarios y establezan, pa xunetu y agostu, cuatro díes de visites guiaes. Lo bochornoso ye eso, que caltengan l'espoliu y prevaleza'l caprichu del dictador percima la memoria y el legáu d'una escritora, defensora de la muyer y amiga de les llibertaes, que guardaba, ellí, obres d'arte y una biblioteca con más de 11.000 volumes.

Más bochornosu entá foi aquella quema, qu’asocedió el 18 de febreru de 1.978 y cuyes causes nunca fueron esclarecíes, que permitió a la familia de Franco sacar en camiones los oxetos de más valor y desfacer los documentos más comprometedores.

Que, el Pazo d'Emilia Pardo Bazán siga perteneciendo a la familia de Franco demuestra'l fiascu de lo que foi la restauración democrática.

El Rei tien un problema de torniellos, daquién tendría qu’apretái les tuerques

Milio Mariño

El Rei, él mesmu lo dixo, tien un problema de torniellos. Agora lo que ta por ver ye si fálta-y o sóbra-y dalgunu. Caún pue pensar lo que quiera, sobre too después del últimu comunicáu de la Casa Real, nel que s’afita que Xuan Carlos ta bastante molestu colos aturullos que reciben los miembros de la so familia.

Claro que tamién diz que nun-y preocupen, qu'hai qu'interpretalos no que valen, d’aú vienen y lo que son. Que la diverxencia d'opiniones ye normal, lo que lu fadia ye la mala educación que tienen delles persones.

Lo meyor que pue facer, daquién con un problema de torniellos, ye tar calláu. Pero la soberbia ye tan grande que nun se-y ocurre nada meyor que llamanos maleducaos y dicir que los nuesos aturullos pasalos pol forru de yá sabemos qué parte.

Tampoco tien tola culpa. La culpa ye nuesa, que lo dexamos andar perhí colos torniellos sueltos y nun-y apretamos les tuerques.

Un caballu llamáu Achtung

Milio Mariño

Prestaríame conocer al caballu Atchung, salúdalo y falar con él un bon cachu. Alvierto, pa los que sorríen, que falar colos animales nun ye difícil, lo difícil ye que t'entiendan. Con éses, toi seguro que Achtung entenderíame.

Too esto bien a cuentu d’una historia que me respigó y me fexo pensar. Achtung ye un purasangre de cuatro años que nun ganara denguna carrera nin figuraba ente los favoritos. Tal ye asina que los apuestes pagábense cuarenta a unu. Un choyu pa los qu'apostaron por él, porque'l pasáu domingu, nel hipódromu La Zarzuela, empezó, como casi siempre, l'últimu pero, ante'l plasmu de toos, ganó la carrera.

Munchos de los que taben nel hipódromu, y pa mi que tamién el caballu, sabíen que, facía malpenes unes hores, morriera, nun hospital de Madrid, Roberto López, que yera l'entrenador y cuidador d'Achtung y seique l'únicu que confiaba en que dalgún día ganaría un gran premiu.

Dicen les cróniques que l'aplausu foi atronador, que toos taben emocionaos y que dalgunu, inclusu, lloró.

Una morrada d'un padre: un añu de cárcel.

Milio Mariño

Pa educar nun hai que facelo a morraes. Nin tres, nin una, nin cinco: denguna. Dixo estu, mialma quedé d'una pieza cuando lleí qu'un padre enfrentase a un añu de cárcel, y a una orde d'alloñamientu, por dai una morrada a la fía, de 16 años, qu’entamó a patiar les puertes y a insultalo porque’l padre negábase a pagái l'arreglu del móvil.

Mientres el xuiciu, el fiscal acusó, al padre, d'un delitu de violencia doméstica y el padre esplicó-y al xuez que, anque suel facer casu a los pidimientos de la so fía, ésta aveza a reaccionar con violencia cuando nun consigue lo que quier. De mou que'l día del incidente, fartu d’oyer insultos y de que patiara los muebles, entró nel so cuartu y dio-y una morrada col fin de correxir la so actitú y de que se calmara.

Por un casu asina, un añu de cárcel y una orde d'alloñamientu paezme una burrada. Habrá quien culpe a les lleis pero yo culpo a los que les apliquen porque se supón qu'han de tener dos deos de frente. Nun pue ser qu'un policía que-y saca un güeyu a una moza salga llibre de polvu y paya y que pa un padre, que-y da una morrada a la fía, pidan esa pena.