Caravana de muyeres en Fontecha

Milio Mariño

Los de Piloña paecen empeñaos en que se fale del conceyu anque nun sía pa bien. A la Feria d'Abril andaluza, que celebraron apocayá, hai qu'añedir lo d'ayeri, una caravana de muyeres en Fontecha, que vien a demostrar que nun avanzamos malpenes nada dende aquella famosa Caravana de Plan, fai agora 28 años.

Cunten les cróniques que 55 muyeres fueron recibíes ayer pola tarde, en Fontecha, con voladores, gaita, espicha, cena y orquesta, por otros tantos o más paisanos de la llocalidá y pueblos d'alredor, encantaos de participar no que, al paecer, llamen “Campaña d'amor y repoblación”. Una campaña que ñació, y ta teniendo ésitu, en munchos pueblos de Castiella

Lo del amor nun se discute, pero lo de repoblar, pa min que van tenelo difícil, non porque nun lo intenten y pongan abondo interés sinón, más que nada, pola edá de los aficionaos y aficionaes a repoblar. Anque bonu, si de los dos oxetivos cumplen unu, seguru que se dan por satisfechos.

Arturo Fernández, Medaya d'Oru, chatina

Milio Mariño

Nun foi, pa min, denguna sorpresa que'l conseyu de Ministros concediera la Medaya d'Oru, al Méritu nel Trabayu, al xixonés Arturo Fernández. Eses medayes avecen a concedese a los que menos les merecen o les merecen mui pocu. Nel casu d’Arturo, mialma que nun-y atopo méritu dengunu. Foi un mal actor que fixo males comedies y peores películes. Pero, el Gobiernu, quiciabes consideró, como méritu, la chulería, el sofitu a la drechona y les tontures que dixo sobre la última Fuelga Xeneral y los manifestantes.

Arturo, qu’amás d’un galán de Hollywood siempre se creyó mui simpáticu, chungóse de la Fuelga y los manifestantes, diciendo que nun había que salir a la cai, a nun ser con xente guapo. Tamién dixo que, a les manifestaciones que convocaben los trabayadores, namás diba xente feo, en manada. Unes graciosaes que, tando como tan les coses, bien podía aforrales.

Naide-y niega'l drechu a tener la ideoloxía que-y de pola gana y a opinar lo que quiera, siempre que lo faiga con educación y respetu. Por eso, a los 84 años que tien, igual diba siendo hora qu'abandonara'l tonu arrayante, ranciu y chulescu, del que fixo gala tola so vida, y entamara a portase con un pocoñín de chapeta.

San Isidru, el folganzán

Milio Mariño

Como sé, de xuru, que tenéis desdexada la Hestoria Sagrada, güei quiero falavos d'un santu que se celebra estos díes. Refiérome a San Isidru, un llabrador qu’avezaba a llegar tarde y cansáu al trabayu porque tenía por zuna percorrer toles ilesies de Madrid y rezar un pocu en caúna.

Con aquel traxín, Isidru arrastraba una galbana que nun podía con ella, de mou qu'un tal Iván de Vargas, que yera'l señor pal que trabayaba, andaba al quite pa despidilo. Presentóse-y la ocasión cuando vio qu'un día llegaba colos gües a la era, sentábase embaxo d'un árbol y quedaba dormíu. Esta ye la mía, dixo'l llabrador empresariu, pero primero que pudiera llegar a onde taba'l folgazán, vio que del cielu baxaben dos ánxeles, poníase unu colos gües y otru col aráu y empezaben a llabrar la tierra.

Esi ye'l milagru más importante que-y reconocen a San Isidru. Asina, más o menos, ye como lo cuenta la Ilesia Católica.

Con esi exemplu, si a dalguién que se duerme nel trabayu lo faen Santu, yá me diréis aú vamos. Tenía razón Fátima Báñez y tamién el telediariu. Lo importante ye rezar y tener a dios de to parte.

La puerca moralina de la TVE

Milio Mariño

Fai yá nin sé sabe que nun veo la TVE, pero, polo visto, toi perdiéndome los meyores programes de los humoristes del PP. Si va una selmana, una presentadora del telediariu afitaba que rezar ye lo que meyor yos cuadra a los paraos porque quita-yos l'ansiedá, unos díes dempués dio'l triple blincu mortal, ensin rede, emitiendo un reportaxe nel qu'aconseyaba a los padres cómo vistir a les sos fíes pa que nun vaigan provocando.

Pa min que non lu pensaron bien porque, si tenemos en cuenta la edá a la que los fíos y les fíes yá nun se dexen vistir, el conseyu casi podría tomase como que los padres fomenten la perdición infantil.

Espero que sigan cola cruzada y lo siguiente sía dicinos a los güelos que nun senos ocurra calzanos una braga náutica porque ye una prenda escandalosa qu’afala y fomenta la indecencia na redolada familiar. Sentiríame bien deceicionáu si nun encamentaren pa nós la vuelta al Meyba tradicional.

Nestos conseyos, pal fomentu de la decencia, nun pido qu’incluyan a les muyeres de cincuenta años p’arriba, sían o non güeles, porque préstame pola vida que me sigan provocando. Yá lo sé, soi un golfu y un depraváu.

¿Cuantu pagaríes tú por una entrada de fútbol?

Milio Mariño

Nun sabéis cuantu me fastidía tener que da-yos la razón a los alemanes, a los franceses y a tou mariasantísima, cuando salen col aquello de que nun tenemos chapeta. Caime la cara de vergoña viendo que los precios de la final de la Copa del Rei, que va xugase en Madrid el vienres, son los más caros d'Europa.

Comparando los nuesos precios colos de les finales de Copa de les otres cuatro competiciones europees (Inglaterra, Alemaña, Francia ya Italia) nun s'averen nin de lloñe. La entrada más cara de la final inglesa costó 136 euros, la de los alemanes 125 y la d'Italia 120, pero equí n'España, les graes alta y baxa cuesten 220, el primer anfiteatru 245 y 275 la entrada de tribuna.

Ehí queda eso. Llueu, al día siguiente, vamos per ehí llorando y llamentando que tenemos más de seis millones de paraos y nun podemos cola crisis.

Y, voi dicivos otra cosa. Nun creáis que los de la Federación, los clubes o quien fuera, el que punxo'l preciu les entraes, ta barrenáu o chifló de repente. Al ritmu de venta que lleven, too apunta que'l Bernabeu tará llenu hasta la bandera.

La solución p'acabar cola fame ye comer inseutos

Milio Mariño

Nun sabíemos cómo salir d’esta y, nun descuidu, llegaron los de la FAO, un organismu de la ONU, cola solución p’acabar cola fame nel mundu. ¿Queréis comer?... Entrugaron.. ¡¡Pos comer mierda. Bonu, en realidá, nun dixeron eso, dixeron que comiéremos mosques, formigues, mosquitos, cucaraches, grillos, saltapraos, guxanos, aviespes… Hasta 1900 especies d'inseutos que, según la citada entidá, y sofitándose n'estudiu, realizáu en collaboración cola Universidá de Wageningen (Países Baxos), contienen la mesma cantidá de proteínes y minerales que la carne de xata y les grases más saludables.

Cuando vieron que s’armaba la de coyer intentaron arreglao. Sacaron un comunicáu nel qu'esclariaben que nun taben diciendo que la xente comiere bichos. Que, a cencielles, queríen dicir que los inseutos yeren un recursu alimenticiu fácil d'atopar, práuticamente gratis o bien baratu y entá por esplotar. Acabaron de xodelo porque punxeron como exemplu que n'África y n'Asia yá hai millones de persones que lleven tiempu comiéndolos.

Lo siguiente, non vos estrañe, ye que, d’equí a un par de meses, Rajoy quite'l subsidiu de 400 euros porque viendo que la xente, ensin que-y cueste un duru, pue preparar una parrillada de mosques, formigues y grillos, gastaríalo tou en vicios.

Los ricos tan delgaos y los probes cada vez más gordos

Milio Mariño

Nun digo nada nuevu si digo que la obesidá va n'aumentu y que casi toos tamos más gordos de lo qu’aconseyen los médicos. Lo que yo nun sabía, y por eso lo traigo equí, ye que dellos estudios demuestren que, en Europa y nos Estaos Xuníos, los probes tán más gordos que los ricos.

Y más que se van poner porque según el profesor Adam Drewnowski, de la Universidá de Seattle, “la obesidá va dir en aumento, pos ye la resultancia tóxica d'un ambiente económico que ta diendo a peor”.

Quier dicise que cuanto más probe yes más gochaes comes y más engordes. Pa que veáis lo que son les coses. De mou que, ensin que nos diéremos cuenta, la gordura pasó de ser un diferencial d'opulencia a un síntoma de probeza.

Nun ye por dámeles de llistu pero yo yá venía notando que los ricos avecen a tar nel so pesu y toos bien morenos. Lo que non se m'ocurriera foi rellacionar la obesidá cola probitú. Igual ye que toi un pocu gordu y mialma me fastidia que, viéndome, cualquiera puea imaxinar como ando de perres.