La foto fata

Milio Mariño

Ente les munches coses que nun entiendo ta la fatada de que los fotógrafos pidan a los deportistes que muerdan la medaya pa saca-yos una foto.

Entiendo menos que los deportistes se presten al mordigañu y apaezan clavando los dientes nel troféu.

Eses semeyes paécenme ridícules pero nun lleguen a cafiame como me cafien les de los políticos cuando los veo disfrazase. Cuando ponen esos cascos, esos gorros y eses bates que-yos sienten como un tiru y faen que paeza que se visten asina porque nos presta a nosotros. El postreru y más bochornosu exemplu diolo Rajoy, va unos díes, na visita que fexo a Renault.

Claro que tamién los hai que faen el tontu a pelu, ensin bata, nin cascu denguno. Que lo faen como ayer lo fixeron los candidatos a presidir la Generalitat, que nun se ponen d'alcuerdu nin na hora qué ye, pero prestáronse, mansos como corderos, a fotografiase toos xuntos, nel Paséu Marítimu de Barcelona, suxetando la bandera de Cataluña, faciendo como que diben en bici y, p'acabar, sentaos, na borda d'un barcu que taba en tierra firme y a tres metros del suelu.

¿Pa quién ya pa qué faen eses semeyes? Quiero creyer que nun son pa mi porque si fuere asina sedría que me tomen por fatu. Anque nun sé, tien tola pinta que debe ser eso.

Gao Ping y Pinocho

Milio Mariño

Cada día que pasa asoceden descubrimientos científicos, revelaciones de l’autoridá relixosa, ya renuncios de les autoridaes y los políticos, que demuestren que tábemos siendo engañaos por tol mundu. Non solo pol gobiernu y los bancos sinón tamién pol Papa y hasta polos qu'escribieron aquellos cuentos que nos cuntaben na nuesa infancia.

Va cuatro díes, un equipu científicos de la Universidá de Granada descubrió que'l denomináu efeutu Pinocho nun consiste, como creyíamos, en que cuando dalguién miente crez-y la ñariz. Les prebes de termodinámica llevaes a cabu polos doutores Emilio Gómez y Elvira Salazar acaben de revelar que lo qu'asocede, cuando mentimos, ye que la ñariz camuda de temperatura y ponse colorada.

¿Imaxinen si supiéremos estu antes de les elecciones?¿ Imaxinen si lo supiéremos en tantes y tantes ocasiones a lo llargo de la nuesa vida?

Hai que ver cuantes mentires, anque nun sé… nun sé si nun sedrá meyor vivir engañaos. Dixéronnos que la mula y el güe nunca tuvieren en Belén, xubiéronnos les tases xudiciales y agora lo de Pinocho.

Lo de Pinocho y lo de Gao Ping, que demuestra que yá nun ye que nos engañaren como a un chinu, ye que yera’l chinu, el que nos engañaba a nosotros.

Otra selmana Mas… y llegamos

Milio Mariño

Nun tengo por vezu facer resumes selmanales pero esti vienres apetecióme y ehí van trés pincelaes.

Lo primeru a considerar ye que, pa min, hai dos colectivos que tán reaccionando como nun imaxinaba que pudieren facelo. Refiérome a los médicos y los xueces. Xente, la mayoría de dreches, que ta defendiendo la sanidá pública y la xusticia gratuita con más determinación que munchos políticos d'esquierdes.

Lo segundu ye la campaña de Cataluña que fina güei. Mialma, me chocó qu'El Mundu llanzara esi torpedu na llinia de flotación d'Artur Más, pero depués yá cayí na cuenta. Yá me percaté de que trabayaba pa que'l PP rematare la xugada, con Montoro y la so panda, diciendo que non, y que quien sabe, y añediendo que si to padre tien millones d'euros en Suiza nun deberíes presentate a les eleiciones. Un horror d'estratexa porque'l PP y El Mundu tendríen que saber que cuantu más corrupción más votos. Ehí ta pa muestra Valencia.

Lo tercero, y yá pa rematar, foi lo del Papa cola mula y el güe. Una crueldá colos animales y los fíeles cristianos. Nun sé lo que pensaréis pero, pa min, tien más delitu que lo d'aquella muyer de pueblu que restauró l'Ecce Homo.

El Xaretón del Embeligru

Milio Mariño

   Asina ye la portada del mio llibru de rellatos que yá ta na imprenta y d'equí a nada tará na cai.

El Papa presenta un ERE en Belén

Milio Mariño

Lo últimu qu’esperaba cualquiera yera que’l Papa ficiera como los direutores de les empreses y presentare un ERE no que ye la sede central de la empresa, en Belén. Y enriba nestes feches, a un mes de les navidaes.

Les causes entá nun les sabemos pero ye pa barruntar que Beneditu debió goler que taba quedando n’evidencia delantre Rajoy, y la cúpula de la CEOE, y dixo va… Pa que queremos una mula y un güe nel Portal de Belén…

Mirándolo ensin pasión, con criterios de rentabilidá, la verdá ye que nun facien llabor, taben ehí d’adornu… Por eso que'l Papa debió ceder y dixo seguramente: Pues venga quitámoslos…

Y quítolos ensin dar cuenta a los Sindicatos nin a les autoridaes nin a San Pedru benditu. Echó mano a la Reforma Llaboral y llistu.

Esti Papa tol mundu sabe que ye alemán pero, coime, podía tener un aquello… Podía mirase un pocu… La mula y el güe yeren de los más antiguos…

Pue ser que tuviere que reducir plantiya y se viere obligáu a despidir a dalguién… Pero, anque asina fuere, enantes qu'a la mula y el güe, podía despidir al Caganet, qu’amás de perxudicar la imaxen de la Empresa teníalo bien merecíu por catalán.

Vieyos de cine y toros de película

Milio Mariño

Alló por Madrid la xente taba contenta con un programa que, va siete años, se punxera en marcha pa fomentar eso que llamen l'avieyamientu activu. Yá saben, incentivar a los vieyos pa que salgan de casa y s’esparzan un pocu.

El programa, Mayores de cine, basábase en que, los martes, los mayores de 60 años podíen dir al cine pagando namás un euru. Presentaben el DNI, pagaben un euru y podíen ver una película d'estrenu en cualesquier de les 450 sales acoyíes a esi programa.

Según los empresarios, el 77,22% de los espectadores de los martes yeren mayores de 60 años. Pero llegó González y mandó parar. La Comunidá de Madrid acaba dicir que nun apurre más perres, que’l programa costaba-yos un millón d'euros al añu y qu'hai otres coses meyores en qué gastalo.

Vamos poner que seya ciertu, nun digo que non, pero esi criteriu podíen aplícalo, tamién a los toros, que l'añu pasáu pañaron, del erariu públicu, na menos que 564 millones d'euros en subvenciones.

Daveres que nun punxe de más nin un céntimu, 564 millones llevaron los toros nel conxuntu del Estáu español. A una media de 30.000 euros les corríes y un pocu menos el restu de los festexos taurinos. Lo cuál fai que los toreros sían, na práutica, funcionarios públicos de carrera cobrando les pagues integres.

La tómbola del Gobiernu: ser español por 160.000 euros

Milio Mariño

Lo de facer español, y dai el carné nel actu, a tou aquel que compre una casa o un pisu que valga 160.000, o más, euros nun se-y ocurre al qu'asó la mantega. Hai que ser Subsecretariu, Direutor Xeneral o Ministru, del PP, pa que, depués d’escornate pensando, te bilten estes idees.

Hai que pensalo a conciencia pa ponéi esi preciu: más baratu nada. Trampes tenemos de sobra, asina que nun val comprar un horru, nin una chabola nin un pisu vieyu nuna barriada probe. La llende asítienla penriba de los 25 millones de pesetes.

Bien miráu ye una gran oportunidá pa los que lleguen en patera o, inclusu, pa los que lleguen nadando. Buenu y, tamién, pa nosotros porque yá lo dixo Rajoy: el que gasta perres nun pisu llueu compra una nevera, unos muebles…

Entovía non lo aclararon pero imaxino qu'a tolos que vengan censaránlos en Castiella... Ser español de Cataluña o del País Vascu sedrá muncho más caru… Y yá, nin vos cuento, ser asturianu… ser asturianu valdrá una millonada.

Nunca lo pensare pero igual nos sal más baratu, y nos trai cuenta, facenos alemanes o franceses… Tengo d’enterame cuantu cobren per ehí alantre por ser ciudadanu d'un país que tenga un Gobiernu con dos deos de frente.