Tuvieron nel Paraisu: Alejandro Casona en Narciandi

Milio Mariño

Dalguién escribió, dalguna vez, que los escritores que firmen con un alcuñu ye que-yos pruye dai vida a un personaxe de los qu'imaxinen. Pué ser, pero nun paez que fuere'l casu d'Alejandro Rodríguez Álvarez. Alejandro Casona, aquel dramaturgu y poeta asturianu, pertenecíente a la Xeneración del 27 ya impulsor del llamáu “teatru  poéticu”, que ñaciera, en 1903, nuna casa solariega que yera la más grande del pueblu. Na Casona de Bisuyu, una aldega de llabradores, pastores y ferreros, asitiada nel conceyu de Cangues del Narcea.

Alejandro tien camentáu, de cutiu, que Bisuyu yera l’aldega perdía, pero non nel sentíu que-y daba Palacio Valdés a Entralgo, sinón nel d’un tresmontoriu escaecíu y alloñáu del mundu. Eso dicía. Y dicíalo presumiendo de que’l padre y el güelu  ñacieren ellí y yá los llamaben los de La Casona, vezu qu’entós dábase muncho nes aldegues asturianes onde, al ser casi toos parientes, los apellíos repetíense enforma y estremaben a les families pol nome la casa na que vivíen.

 Casona presumía, abondo, de que ñaciere nuna aldega perdía, pero los padres yeren, los dos, maestros. Lo cuál fai suponer que, al entamu del sieglu XX,  apurría una bona ventaya, en cuantu a formación ya cultura. Tamién él, acabó siendo maestru, amás d'un gran defensor del ideariu de la Institución Llibre d'Enseñanza y una de les figures más relevantes de la escena española y suramericana.

Pero, ser fíu de maestros, naquellos tiempos, non solu apurria ventayes tamién devenientes, pos la infancia y l'adolescencia del dramaturgu asturianu, foi siempre n’andecha col destín de los padres. Unos padres que nun podíen tener escuela, los dos, nel mesmu sitiu y, mientres el cursu, vivíen separaos, de mou que repartíense los fíos y Casona, y los hermanos, taben unes vegaes col padre y otres cola madre.

Esplicase d’esta mena los munchos y socesivos cambeos de residencia que tuvo na so neñez y, hasta, na xuventú. Nun podemos pasar por altu que Casona ñació en Bisuyu, Cangues del Narcea, deprendió a lleer en Miranda, Avilés, entamó’l bachilleratu nel Institutu Xovellanos de Xixón, acabólo nel de Murcia y, en 1922, entró na Escuela Cimera de Maxisteriu de Madrid, onde tuvo cuatro años y salió como maestru ya inspector d'enseñanza primaria.

Aquella rémora, el tener qu’andar d’un llau pa otru, fexo que Casona casi pasare más tiempu fora que dientro d'Asturies, pero nun hubo llugar denguno, a lo llargo de la so vida, que-y influyere tantu como la tierra onde ñaciera, viviere la so infancia y parte de la xuventú. La fonda señardá que Casona sintía por Asturies foi un fautor determinante na xénesis de sos obres. “La casa de los siete balcones”, escrita nel exiliu y na que reconstrúi, con una fuerza poético estraordinario, el mundu de los sos caberos años, yera la casa escuela de Bisuyu. “La dama del alba”, una obra dramática que foi traducía a doce idiomes y llevada al cine ya la televisión, inclúi nomes propios como Falin y Telva y ta llarada de referencies asturianes.

Quier dicise que la querencia que Casona sintía per Asturies diba más alló de que fuere'l so llugar de ñacimientu y onde pasare parte de la infancia. Yera una dependencia afeutiva mui particular que biltaba de dos llugares con una significación especial: Bisuyu, el pueblu onde ñació y San Pedro de Narciandi, un pueblín de la parroquia de Santa María de Cangues d'Onís, con malpenes un centenar d'habitantes, que foi'l so primer destín profesional, dempués d'acabar maxisteriu.

 Casona sentía por Narciandi un ciñu mui especial que nunca quixo disimular. Elli tuvo, mientres el cursu 1926-1927, y ellí fixo les práutiques de maestru rural, qu'esixía'l Ministeriu, dando clase nel pórticu d'una modesta capiya, l'únicu sitiu onde podía axuntar a los neños. Entamó’l cursu atrocándolos embaxo del pórticu, a l’abertal, y más alantre, en cuantu llegó’l fríu, consiguió llevalos a la casa onde vivía, a una sala con galería apegada al primer pisu, que siguió faciendo d'aula, siquier, mientres duró la República.

Casona llegó a Narciandi y agospióse, de mano, nel Hotel Covadonga, en Cangues d'Onís. Pero asina que pasaron un par de meses, en vista de que nun-y algamaba'l sueldu, tuvo que buscar dalgo más baratu y foi vivir al pueblu,  en cá de la familia d'Antonio Blanco García, con quien caltuvo una estrencha rellación d'amistá qu'enllargó, depués, tola  vida y más alló de les nueses fronteres, yá que n’Arxentina, onde Casona acabó exiliáu, en 1937, por cuenta de la Guerra Civil, recibió'l sofitu y l'acoyida d'unos parientes de la nomada familia que vivíen en Bonos Aires.

L’añu que Casona pasó en Narciandi quedó-y grabáu na memoria, pero tamién foi inolvidable pa los cuarenta neños qu’entós formaben el censu infantil. Tampocu pasó inalvertíu pa la xente mayor pos, tiempu depués, ún de los detalles qu’entovía alcordaben yera que Casona avezaba a salir colos escolinos pa visitar una cova con restos prehistóricos que llamaben La Güelga. Una cova, asitiada cerca del ríu Güeña, que tien una bocana de fácil accesu. Tamién alcordaben que yera corriente que-yos mandara coyer fueyes d'un árbol determináu y dir tirándoles per onde fixeren el camín, con cuenta de que pudieren reconocelo a la vuelta.

Alejandro Casona guardaba munchos y mui prestosos alcuerdos del añu que pasó en Narciandi, pos sería, a lo postrero, ún de los más importantes na vida del poeta y dramaturgu asturianu. Concidiendo cola so estancia ellí publicó'l so primer llibru, una serie de poemes, tituláu El peregrino de la barba florida, y escribió la comedia La Sirena Varada, cola que llogró'l Premiu Lope de Vega y los aponderamientos de la prensa madrilana que, al otru día del so estrenu nel Teatru Real de Madrid, el 17 de Marzu de 1934, saludaron l'apaición d'un destacáu valor que venía a inocular cazumbre nueva nel ablayáu teatru.

Enantes d'aquel estrenu, en 1932, Alejandro Casona llograra'l Premiu Nacional de Lliteratura col cuentu infantil Flor de leyendas. Dempués, a partir de 1934, dirixó la compañía de teatru itinerante La Barraca, exiliándose en Bonos Aires, en 1937, por causa de la Guerra Civil, y tornando, de nuevu, a Asturies en 1962, fecha na que volvió representase'l so teatru n'España.

Alejandro Casona, que finó en Madrid el 17 de setiembre de 1965, camentaba, embelesáu, que sintía por Narciandi una señaldá mui especial. Dicía que venía ser como’l so llugar escoyíu dientro del Paraísu.

Quién sabe si'l poeta y dramaturgu asturianu nun viaxará, dacuando en vez, d'un paraísu a otru pa dar una vuelta pola cueva La Güeña, o por aquella castañal de Bisuyu, la Castañarona, qu'alcordaba con señardá y na que, al paecer, amás de coyer dientro, siete o más neños, unos díes yera un castiellu, otros un barcu y dacuando un palaciu. La Castañarona y los árboles de Narciandi, qu’apurríen fueyes a los escolinos, siempres tuvieron presentes nos alcuerdos de Casona. Y ye que los árboles, atendiendo al títulu d'una de les obres de teatru que-y dieron fama mundial, muerren de pie, pero siguen vivos cuando se vuelven papel y atroquen, nos llibros, les pallabres que los poetes escriben con ciñu pa que, cuando nos pete, podamos lleéles y esfrutar a mamplén.

 

Milio Mariño / Del llibru que toi faciendo: Tuvieron nel Paraisu