El coche y les ciudaes del futuru

La mio parrafada de los xueves nel Programa Noche tras Noche de la RPA.

El mi lio d'esta selmana ye un lio que nun voi vivir pa velo… Trata de lo que dicen que van ser les ciudaes nel futuru, dientro de cincuenta años, pero pensé que podía ser interesante traelo a colación polo que tien de novedá y porque amás yá sabéis que pequí andamos a vueltes cola ciudá grande, cola llamada área metropolitana que van facer na zona central d'Asturies. Daqué paecíu a un trés n'unu, Uviéu Xixón y Avilés, separáu por 30 kilómetros que vien ser nada.

Pos bien, andaba yo a vueltes, cavilando como pue acabar la cosa, cuando atopé un estudiu d'un grupu d'arquitectos sobre les ciudaes del futuru, encabezáu por Nicolás Negroponte, dalguién que, al paecer, ye un auténticu visionariu hasta'l puntu de que nuna conferencia que va pocu dio en Madrid, manifestó ensin cortase un pelu que del futuru yá vien de vuelta, que yá tuvo ellí munches veces.

Cuando t’atopes con un tipu asina, que diz estes coses, lo primeru sospriéndeste pero llueu, en cuanto analices lo que diz, desiguida pienses que nun ye pa tanto, qu'eso mesmu yá lo pensasti tu y nun t'atrevisti a dicilo.

Estos arquiteutos del futuru, lo que vienen dicir ye que yá podemos dir escaeciéndonos del coche y de la ciudá tal como la conocemos. Qu'esi ideal, o suañu, de tener una casina a les afueres, con un xardín, un garaxe y un coche a la puerta, va pasar a ser imposible d'equí a poco y qu'agora mesmu yá casi lo ye.

A eses idees súmense la Fundación Norman Foster y l'urbanista Ricky Burdett, que dicen que'l retu de los arquiteutos nun va ser tanto construyir viviendes sinón onde asitiales. Al paecer, nuna proyección a futuru, pocos o casi naide van querer tener coche y vivir nes afueres.

Vivir nes afueres y llegar hasta'l trabayu, los comercios o la diversión nes grandes ciudaes, conduciendo un coche ye daqué que yá ta vetáu pa la clase media. Ponen como exemplu qu'en ciudaes como Llondres, París o Nueva York, yá naide pue llegar col coche hasta'l centru y aparcar. Bonu, naide que nun tea dispuestu a pagar una media de 70 euros per día d'aparcamientu.

Esi ye’l tema que, 70 euros al día por aparcar, nun ye broma. La cosa ta poniéndose fea. Tantu que, en Oslo, p'amenorgar la circulación pol centru acaben de suprimir los aparcamientos. De mou qu’atentos a la pisada porque esi exemplu seguru que desiguida lo copien y lo planten equí.

Lo del coche y la ciudá, yá lo tenemos mal pero tou apunta que va dir a peor. De toes formes cuesta imaxinar un futuru ensin coches. Pero qué se yo, habrá qu’aceutalo o facer como aquel al que-y entrugaron… Oiga una cosa: ¿A usté qué-y molesta más la inorancia o la indiferencia?... ¿ A quién, a min?.... ¡Nin lo sé nin m'importa!

Milio Mariño