El fielatu del Güerna

La mio parrafada de los xueves nel programa Noche tras Noche de la RPA

El mi lio d'esta selmana ye pol peaxe del Güerna. Un peaxe que polo que tien d'impuestu llámolo fielatu y aprovecho pa camentar lo que munchos nun sabéis, non por ignorancia sinón porque seguru que sois más xovenes. Fielatu yera'l nome que recibíen les casetes de cobru de les tases municipales sobre'l tráficu de mercancíes. Llamábenlo asina pola referencia al fiel o balanza que d'antiguo usábase pa pesar los productos y cobrar les tases correspondientes. Más de cien años, hasta 1961, tuvieron en pie los fielatos, una especie de caseta con un paisanu dientro, que vixilaba’l trasiegu de mercancíes ente los pueblos y les ciudaes.

Por eso llamo fielatu al peaxe del Güerna. Porque agora, a principios de xineru, volvieron xubir el preciu y pasar col coche cuesta 13, 15 euros. Por eso y porque'l Ministeriu de Fomentu diz que va buscar un pactu d'Estáu sobre les autopistes de peaxe y dexa fuera la nuesa. De cuenta que si esa propuesta sal alantre, el peaxe del Güerna va ser de los más vieyos d'España.

Si les coses fueren como en principiu se plantegaron, el peaxe acabaríase dientro de trés años, nel 2021. Pero'l Gobiernu d'Aznar tomó la decisión d'ampliar, na menos, qu'en 29 años la concesión y eso significa que si naide lo remedia tendremos que siguir pagando por pasar pol Güerna hasta l'añu 2.050. Una bicoca pal concesionariu porque l'autopista abrióse al tráficu en 1983 y si se cumplen los plazos van ser 67 años los que taremos pasando por caxa.

Eso si vamos per carretera. Pero resulta que col ferrocarril tamos igual o peor. Yá van 17 años desque empecipiaron la Variante de Payares, que teníen previstu facela en cinco, y l'AVE nun lo vemos nin con prismáticos. Tol mundu nos engaña. Primero foi Zapateru que dixo que si llegaba a Presidente del Gobiernu quitaba'l peaxe del Güerna y dempués Rajoy, que dixo que lo de l'AVE yá taba fechu.

Nin lo ún nin lo otro. Nun tenemos tren d'alta velocidá y si queremos salir d’Asturies per carretera hai qu’apoquinar trece euros. Siguimos lo mesmo o bien paecíu que va cincuenta años por más que se diga que les comunicaciones son vitales p'Asturies. Digo 50 años por dicir daqué porque col tren tamos como nel sieglu XIX. Exautamente lo mesmo.

Nun ye que me quexe por quexame, ye que la realidá clama al cielu. Tamos aisllaos per tierra mar y aire. Per tierra tenemos la historia del tren y la del Güerna. Per mar cerraron, va pocu, la comunicación con Francia, el ferry Xixón-Nantes. Y per aire resulta que retayaron 150 metros la pista del aeropuertu y la mayoría les veces nun funciona’l sistema anti borrina.

Asina tamos. Y pa mi que nun nos van a tomar en serio hasta qu'un día nun garremos toos el coche y nos plantemos delantre del Negrón, p’atrocar el pasu y acabar col fielatu.

Milio Mariño