Falando de reis y osos

La mio parrafada de los xueves en Noche tras Noche

El mi lio d'esta selmana ye por dos noticies que casi coincidieron nel tiempu y, en principiu, paez que nun tienen que ver. Per un llau, el rei Felipe VI vieno a celebrar el so 50 cumpleaños n'Asturies y fíxolo visitando les instalaciones que la Central Llechera Asturiana tien, en Granda, na Pola de Siero. Y per otru, resulta que la visita real casi coincidió cola muerte de la osa Tola, que la probe morrió, fai güei ocho díes, de muerte natural pos yá tenía 29 años, que según los espertos son munchos años pa lo que ye la vida d'un osu.

Foi una coincidencia… Pero como yá me conocéis y sabéis que me gusta xuntar les coses, por aquello d'a ver lo que pasa… Pos xunté la presencia del rei y lo que signifiquen los osos p’Asturies y pa la familia real.

Xuntándolo asina, primero taría aquel desgraciáu incidente protagonizáu pol Rei Favila, que la so muerte dalgunos atribúin a un osu pardu, pero que según los espertos nun hubo tal osu… Al paecer foi'l so cuñáu Alfonso, amarutáu con una piel d'osu, quien lo cosió a puñalaes.

Otra custión que tendría que ver con reis y osos foi lo que-y asocedió al padre del rei Felipe, al Rei eméritu Juan Carlos, con aquel osu pardu llamáu Mitrofán, a quién según el xefe de guardabosques rusu Serguei Starostín, enfilaron con miel y vodka pa que'l rei pudiera cazalo, ensin peligru nengunu, nuna viesca de Rusia.

Yeren otros tiempos… Yá sé que d’esto últimu nun fai tantu, pero'l mundu evoluciona y les coses camuden hasta’l puntu de qu'agora los osos muerren, como quien diz, na cama… Y los reis celebren el so cumpleaños afalagando una vaca. Foi lo que fixo'l rei Felipe na Pola de Siero. Afalagó una vaca y dixo que quería dar el so sofitu a los ganaderos asturianos.

Y mialma que lo celebramos. Celebrámoslo anque temos un pocu murnios pola muerte de la osa Tola.

Tola morrió fai güei ocho díes na so osera de Proaza. Foi una osa que se fixo famosa primero porque quedó güérfana, con cinco meses, cuando dos cazadores furtivos mataron a la madre. Depués la fama aumentó cuando tolos medios, incluyida la televisión, sopelexaron aquel romance col osu cántabru Furaco. Un romance qu'acabó cola retresmisión del actu sexual qu'apaeció en tolos telediarios ensin que les televisiones se cortaren nin un pelu. Ye más llegaron a poner a Tola como exemplu, en comparación cola so hermana Paca, que se negó a pasar pol aru y nun aceptó los requilorios del machu cántabru.

Asina qu’esta selmana pasada tuvimos de funeral y de cumpleaños. Tuvimos con un rei que vieno a Asturies a afalagar una vaca y con una osa que coló pal cielu. La vida ye eso. Ye un amiestu de llutu y fiesta… de rises y de sollutos.

Milio Mariño