El tren que descarriló pa llamar l’atención

El mio camentariu de los xueves nel programa Noche tras Noche de la RPA

El mi lio d'esta selmana ye por esi tren que volvió a descarrilar. Por esi Alvia que venía de Barcelona y descarriló'l vienres pasáu, nun túnel que llamen Llombu del Pollín… Unu de los primeros túneles de Payares según se vien de Llión.

Nesi tren viaxaben 78 pasaxeros y, gracies a que descarriló nun túnel, namás se mancó unu. Renfe diz que l'accidente debese a la rotura d'un rail. Esa ye la versión oficial pero, pa mi, que'l tren descarriló, arrede, pa llamar l'atención…. Seguru que debe tar fartu de que nun-y faigan casu. Seguru que se siente discrimináu al ver que los trenes de toa España rueden per víes y túneles acordies con estos tiempos. Esa tuvo de ser la causa. La frustración de volver atopase colos 61 túneles de Payares. Túneles que fueron construyíos en 1884, mentanto que'l túnel nuevu sigue muertu risa esperando. Imaxino que’l tren debió dicir… Tenéisme hasta les bieles… asina que voi davos un toque… Voi descarrilar dientro d’un túnel pa que nun se manque naide… Ye lo meyor pa mover un pocu la cosa y que los medios de comunicación falen d’esti problema.

Total que l'Alvia descarriló y la repercusión foi inmediata. La conseyera d'Infraestructures, Belén Fernández, que de xuru nin s'alcordaba de que podíamos venir en tren dende Barcelona y, de pasu, vivir una aventura propia del sieglu diecinueve, desiguida reclamó l'apertura de la Variante y del túnel grandón. Esi túnel qu'acabaron va cinco años ensin qu'asocediera'l desliz del chiste… Por suerte non asocedió aquello de poner a un obreru cavando dende Llión y a otru dende Asturies… Y tener dos túneles pol preciu d’unu. Nesti casu atopáronse y la cosa salió bien… Pero tamién atoparon un manantial que mana 300 llitros d'agua per segundu. Y ehí sigue, ensin que les autoridaes sepan si facer un santuariu como'l de Cuadonga, una fábrica d'agua embotellada o un riu con criaderu de truches.

El túnel nuevu tien pa cuntar. Entamaron con un presupuestos de 1.100 millones d'euros, nel 2004, y doce años dempués lleven gastaos 4000 y tururú que te vi morena. Acabaron la obra pero siguimos esperando que se decidan a inauguralo. Asina que yá digo, la escusa oficial foi un rail rotu pero la realidá apunta a que'l tren encabronóse y fexo como facíen los obreros na seronda, decidió pasar a l'aición y reivindicar el so derechu a circular pol túnel nuevu y non por unos túneles que son de fai 136 años. Yá sé que les autoridaes nun van reconocer que'l tren descarriló arrede pa reivindicar sos derechos. Les protestes, siempre procuren callales. Sobremanera si quien protesta son les máquines. Sí, porque a la xente engáñenla con cualquier tontería pero si un tren s’empina nun hai otra vía que dai lo que pida.

Milio Mariño