El mi lio d'esta
selmana ye porque, va unos díes, el presidente del Principáu, Javier Fernández,
recibió a la TPA, nel so despachu, pa falar de les elecciones, y menuda la que se
llió. Non polo que dixo sinón porque detrás del Presidente apaecía l'ordenador
y la pantalla folgaba enriba d’una curiosa piana: una edición del diccionariu
oficial de l'Academia de la Llingua.
El casu foi que como la xente ta a toes, el detalle nun pasó desapercibíu… Y, en twitter
y Facebook armóse la de coyer… Foron munchos los que protestaron diciendo que
yera una vergüenza… Que la considerancia y el tratu que’l Presidente del
Principáu dispensa a l’asturianu quedaba claro col usu que-y da al diccionariu.
Nun yos faltaba razón. Javier podía forrar la pantalla con
un apéndiz del Aranzadi o col llibru de Gustavo Bueno: Zapatero y el
pensamientu Alicia. Alcuérdome de Gustavo porque como de xuru sabrán, el filósofu
ye un acerrimu defensor del ateísmu católicu. Nun tien problemes en declarase
atéu y cristianu. Por eso pensé que pue pasa-y otru tantu a Javier, que nun
cree na esistencia del nuesu idioma pero siéntese asturianu.
Anque paeza una contradicción nun lo ye. Cualesquier pue
nun creyer en dios y coles mesmes
defender los valores cristianos. Custión que bien pue ser el casu del nuestru
Javier... Que nun cree nel idioma asturianu y piensa qu'esi ateísmu ye
compatible con ser Presidente d'Asturies.
Son suposiciones porque tamién pue ser que’l Presidente
Javier nunca se plantegara, nin de broma, semeya custión filosófica. Nun hai nada, nin siquier un datu, que nos faiga pensar que ye un atleta mental. Barruntase
más bien curtiu… Por eso que lo d'usar el Diccionariu de la Llingua como piana
del ordenador seique seya por una custión física. Javier ye altu y les meses
que suministraben Igrafo y Almacenes Pumarin pue que nun fueren les más adecuaes,
que nun lo dexaren trabayar adoptando una postura correuta. Obliguen, seguramente,
a doblar el llombu y agazupar la columna vertebral. Lo cuál, col tiempu, pue
provocar qu’a los usuarios yos salga una gorrumba nel llombu como les que
gasten los dromedarios qu'apaecen nes caxetilles de tabacu rubiu.
A lo meyor foi por eso… Por salú llaboral y non por
despreciu a la llingua y al usu del asturianu. La xente siempres piensa no
peor. Yo, pela mio parte, si Javier confiesa que punxo'l diccionariu como piana
pa que nun-y saliera una chepa nel llombu, perdónolo. Si lo fixo pa endrechar
la so postura, más que motivu de crítica tendría que ser allabancia. Pero,
claro, non val que lu diga. Tenemos que ver cómo se porta. Si vemos que col
asuntu del asturianu sigue lo mesmu y nun endrecha entós nun lo salva nin la
caridá. Merez que lo pongamos mirando a Cuenca, colos brazos abiertos y un
diccionariu en cada mano.
Milio Mariño
No hay comentarios:
Publicar un comentario
Milio Mariño