El mi lio d'esta selmana trata de que yá tenemos n’Asturies
la guerrilla urbana del tricot. Un enclín que surdió n'Holanda, en 2004, y
consiste en cubrir con llanes de colores, texíes a ganchiyu, tou tipu
d'elementos del moblame urbanu…. Bancos, tiestos, xardineres, faroles, rotondes
y lo que se tercie.
Ocúrreseme camentalo nun vaya ser que dalguién salga de casa
y al ver una farola orniada con tapetes de ganchiyu o una estatua con un xerséi
fechu arrede piense que-y dio una tontura y ta allucinando en colores.
Pue tar tranquilu. Nun pasa nada… Anque-y cueste creyelo ye
una nueva manifestación artística. Ye lo que perhí fuera, pel norte d’Uropa,
llamen yarn bombing o urban knitting. Dalgo que yá llegó a La Calzada, en
Xixón, al traviés del grupu de ganchiyu de l'asociación cultural Mar de Niebla.
Les muyeres qu'integren esi Grupu nun tienen problemes en
definise como Guerrilleres del Ganchiyu. Dicen que tou empezó cola donación
d'un comerciu de llanes que cerró l'añu pasáu. Diéron-yos un montón de duviellos,
entamaron a texer, propunxéronse facer daqué distintu y daquién atopó
n'Internet una iniciativa que-yos paeció interesante: El yarn bombing.
La guerrilla del tricot, anicióse n'Uropa como una forma ñidia
de protesta. Al paecer, esti iviernu munches estatues de Frankfurt foron
vistíes con pantalones, faldes, medies y jerséis que, según les guerrilleres
del tricot, aportaron sospreses interesantes y fixeron los espacios públicos
más coloríos, más prestosos y menos ensin gracia.
Según Verena Kuni, profesora de Cultura Visual del Institutu
d'Educación Artística de la Universidá Goethe, la guerrilla knitter ye una
forma de protestar a lo suavín. Cuestiona quien detenta la propiedá de los
espacios públicos.
Les nueses guerrilleres nun creo que cuestionen eso pero yá
empezaron a esplegar les sos llanes na
Plaza Médicu Félix Prieto, de La Calzada, onde nunca antes s'entamara nenguna
actividá, a pesar de que ye bien utilizada polos que viven nesa zona.
El grupu de guerrilleres del ganchiyu, ta formáu por unes
quince persones que pasaron cuatro meses texendo pa preparar la so intervención.
Tamién tuvieron la gabita d'otros grupos y foron munches les participantes que
llevaron la llabor pa casa. Cunten que, inclusive tienen una guerrillera de 96
años. Una señora que diz que gracies a esi llabor recuperó muncha memoria ya
vieno-y mui bien pal celebro.
El Grupu de La Calzada caltién contautos con otros grupos d'Urban
Knitting de Bilbao y Galicia. Tamién n'Uviéu hai un grupu, pero va tiempu que
nun sal a la cai.
Na mio opinión ye d’allabar lo d'estes muyeres que se
proclamen guerrilleres de lo aburrío. Pa mi lo meyor ye que tolo que faen ye
efímeru. Que los tapetes y el ganchiyu duren lo que duren dempués que los asitien
onde sía. Cosa que, por desgracia, non socede con delles escultures d’hormigón,
bronce o fierru. Que tol mundu concide en que son horroroses y dempués de
munchos años tenemos que siguir sufriéndoles como’l primer día.
Milio Mariño
No hay comentarios:
Publicar un comentario
Milio Mariño