Esta nueche ye San Xuan

La mio collaboracion de los xueves nel Programa de la RPA Noche tras Noche.

El mi lio d'esta selmana nun pue ser otru que'l d'esta nueche, que ye la nueche de San Xuan, la fiesta celta del solsticiu de branu. Una fiesta que correspuende al día 21 y los católicos treslladaron al 24. De mou qu’agora mesmu, d'equí a nada, tarán celebrándose en toa Asturies los ritos qu'entienden, principalmente, de dos elementos: el Fueu y l'Agua.

Ehí tá… Y los que digan que tou ye superstición, allá ellos… Ellos lo pierden, esbardien diversión y remedios bonos y baratos. Asina que pa los que quieran probar, repasamos unos cuantos.

Como diximos los ritos d'esta nueche xiren en redol al fueu y l'agua.

Lo que tien que ver col fueu simbolízalo la foguera… Esa foguera na que se quema tou lo vieyo pa festexar el poder del sol. Una costume cola que se pretende alloñar los malos espíritos pero val pa muncho más. El fueu ta rellacionáu cola prevención d'epidemies, les cenices curen enfermedaes y saltar, penriba de la foguera, apurre felicidá y bona fortuna. Tamién ye conveniente quemar dalguna cinta rellacionada cola casa, pa procurar la protección de los sos habitantes y los animales si ye que los hai. El festexu termina baillando, alredor de la foguera, la Danza Prima.

Esta nueche tamién ye bien importante l'agua. Simboliza fertilidá y pureza. Considérase qu'a partir de les doce, l'agua ye milagrosa, cura enfermedaes y apurre la felicidá. Pa lo cuál hai dellos procedimientos: dir a la mar y saltar nueve foles de llombu, coyer la flor del agua o revolcase, desnudu, sobre la yerba, aprovechando la rosada. Tou esto tien un efectu máxicu. Sirve p'atopar pareya… pa tener fíos… Y pa estornar l'agüeyamientu y atraer la mocedá y la guapura. Inclusive pa ver les xanes, qu'esta nueche salen de les sos cueves y de les fontes y déxense ver pa ufiertar les sos ayalgues a los que quieran desencantales.

Otra cosa que puen facer ye coyer la flor del agua… Ritu que consiste en posar los llabios nuna fonte antes del amanecer y de que lo faiga otra persona. La flor del agua apurre fermosura, concede felicidá y un bon home, amás de contener propiedaes curatibles.

Tamién ye costume, a partir de la medianueche, que se salga pelos praos y les veres de los ríos a recoyer yerbes medicinales que depués cuélguense nes ventanes de les cases pa recibir la bendición de San Xuan.

Como veis, hai muncho que facer esta nueche…. Muncho… Y llegáu'l casu hasta podemos probar lo que tien de máxica ensin salir de casa…

Ye un ritu qu’encánta-yos a los neños…. Consiste en coyer un güevu y cascalu dientro d’un vasu d'agua. Hai que facelo a les doce en puntu… Esi güevu, mañana pela mañana, apaecerá nel vasu como un barcu de vela…

Asina que venga… A esfrutar d’esta nueche… Ahh… y otra cosa… Tolo que dixi podéis facelo ensin apagar la radio. Que tamién ye pura maxa.

Milio Mariño