Asturies: pocos neños… y munchos vieyos

La mio collaboración de los xueves nel Programa Noche tras Noche de la RPA.

El mi lio d'esta selmana ye un lio depende cómo se mire. Si tomamos, por separáu, dos datos estadísticos referíos a la población d'Asturies, tenemos un problema. Si los xuntamos siguimos teniendo'l mesmu problema pero atopamos una esplicación que, quiciabes, non sía científica pero tien sentíu.

Vamos al casu: Asturies tien una tasa de natalidá de les más baxes d'España, pero resulta que, al empar, tenémos el mayor índiz de mortalidá del país. Los dos datos xuntos llévennos a una crisis demográfica del copón. Y los espertos apunten que la solución ye que ñazan más neños… Que si, que nun digo que tea mal… Pero equivoquen el tiru… A la mio manera de ver, la escasez de ñacimientos depende, más que nada, del altu índiz de mortalidá. ¿Quién va querer ñacer equí si ye onde más y primeru se muerre? Asina que yá puen dexar de falar de tou eso que falen siempre….

Qué si la crisis… Les dificultaes económiques… Lo caro que ta la vivienda… El pocu trabayu qu'hai y lo mal pagáu que ta…. Nada… Alloriar la perdiz…. Lo que, daveres, pasa ye que los espermatozoides que van camín del óvulu, en cuantu s’enteren del índiz de mortalidá qu’hai equí, dan media vuelta y escapen xiblando.

Esta teoría, estu de qu'aumentaría la natalidá si los asturianos viviéremos más, ocurrióseme a mi... Y nun discuto que tenga pocu de científicu y muncho d’interés personal. Unu, que yá ye mayor, ta nel negociu de vivir munchos años… Dalgo que, por supuestu, nun comparte la tesorería de la Seguridá Social, que siempre acaba diciendo que'l problema d’Asturies ye qu'el 40 % de la población pasa de 64 años.

Estos, los de la Seguridá Social, la solución que baraxen, pa rebaxar esi datu, ye más ñacimientos. Nun dicen que muerran los vieyos porque nun s’atreven pero piénsenlo.

Lo que yo plantego ye que nun ñacen más neños porque'l nuesu índiz de mortalidá ye'l más altu d'España. Igual nun toi acertáu, pero yá probaron con otres midíes y tururú que te vi corneta. Va unos años, nel Conceyu de Ponga, alcordaron dar 3.000 euros a la pareyes que fueren vivir ellí y otros 3000 per cada neñu que tuvieren. Una ufierta que paecía bien guapa, pero nun dio resultáu.

Total que seguimos como tábemos… Col problema de que, n'Asturies, ñacen pocos neños y hai munchos vieyos… a pesar de que muerren primero que n'otros sitios.

Si la cosa nun sé remedia dicen que nel 2023, que yá ta ehí, vamos tener 67.000 habitantes menos y solu cuatro de cada diez asturianos tarán n'edá de trabayar. Son pocos, pero queden en menos si, como paez, tres de los cuatro van siguir en paru.

Tenémos un problema demográficu, pero la solución nun pue cayer solo d'un llau. L’índiz de natalidá hai que meyoralo… Y el de mortalidá tamién. La solución nun ye que ñazan más neños… Ye que ñazan más neños y los vieyos sigan viviendo.

Milio Mariño