Estrenar, bendicir el ramu, y dar o recibir un regalu

El mio camentariu de los xueves nel programa Noche tras Noche, de la RPA.

El mi lio d'esta selmana tien que ver colo que va a celebrase d’equi a nada, nun vaya ser que como los neños y los padres anden tan entreteníos colos xuegos, los teléfonos y les maquinuques nun cumplan como ta mandáu. Quiero dicir que nun s’alcuerden de que tamos a mediaos de marzu, l'iviernu entama a quedar atrás y tenemos que salir del lletargu… Tenémos qu’espabilar porqu’esti domingu ye Ramos,… De cuenta que, como manda la tradición, los neños tienen qu’estrenar, si se pode… Y si non tamién... Que pa eso tán los padrinos, pa llegar a ónde nun puean llegar los padres.

Por eso lu traigo equí… Pa qu'unos, los afiaos, vaigan preparando'l ramu y otros, los padrinos, preparen la cartera.

Esti domingu, hai que dir a bendicir el ramu, o la palmera. A mi gustame más el ramu de lloréu. La palmera, ol ramín d’olivu, paezme que son d’otru sitiu… El lloréu ye nuestru. Ye unu de los nuestros árboles sagraos, un árbol capaz de tornar el rayu y trayer la fortuna… Los ramos de lloréu, bendicíos el domingu, protexen les cases, les colleches y los animales. Y, amás, quiten el mal de Güeyu…. Son too ventayes y, enriba, nun cuesten nada… Basta con dar una vueltina pel monte y coyer una rama… Eso si, poniendo cuidáu de nun estrozar l'árbol.

Col ramu benditu, los afiaos, van ver a los padrinos, pa dayoslo y desea-yos suerte, y estos, primeru que lleguen los afiaos col ramu nuevu, tienen que quemar el vieyu, pa cumplir col ritu. Depués, el domingu siguiente, el de Pascua, ye cuando yos toca a ellos… A los padrinos. Que tán obligaos a dar un regalu hasta que los afiaos se casen, que ye cuando esa obligación acaba, con un bon regalu de boda.

Los regalos dependen de la edá de los afiaos: cuando son pequeños avecen a ser bollos o dulces… Y cuando son mayores dineru, anque nun ta reñíu, nin lo prohibe la tradición, que sean los dos coses.

Lo que llamamos dulces tamién depende d'ónde vivan los padrinos y los afiaos…. N'Avilés, por casu, ye un Bollu Mantecau de Pascua, un bollu escarcháu que se paez a les fueyes d'un trébole. Si falamos de L.lena y Mieres ye la pegarata, en dellos sitios el manolitu y nos pueblos pesqueros, sobremanera en Candás y Lluanco, anque tamién  n’Avilés, les marañueles…. Un dulce caseru que la so forma y sabor son distintos. Les marañueles de Lluanco y Candás son paecíes a una galleta y tienen forma de nudu marineru y n'Avilés son una especie de pan duce fecho como una estrella de cuatro picos.

Asina que yá sabéis… Esti domingo que vien y el siguiente,… los afiaos y los padrinos tenéis xera. Tenéis que cumplir con esa llei nun escrita que llamamos tradición... Estrenar, bendicir el ramu y dar, o recibir, un regalu… Non se vos olvide.

Milio Mariño